അമേരിക്കയും ഇറാനും തമ്മിലുള്ള സമാധാന ധാരണാ നീക്കങ്ങള് ആഗോള വിപണികളില് വലിയ ആശ്വാസം ഉണ്ടാക്കിയിട്ടുണ്ട്. പശ്ചിമേഷ്യയിലെ സംഘര്ഷം അവസാനിക്കുമെന്ന പ്രതീക്ഷ ശക്തമായതോടെ ബ്രെന്റ് ക്രൂഡ് വില കുത്തനെ താഴ്ന്നു. ഹോര്മുസ് കടലിടുക്ക് വീണ്ടും തുറക്കപ്പെടുമെന്ന പ്രതീക്ഷയാണ് എണ്ണവിപണിയെ സ്വാധീനിക്കുന്നത്.
വന്തോതില് അ്സംസ്കൃത എണ്ണ ഇറക്കുമതി ചെയ്യേണ്ടി വരുന്ന ഇന്ത്യക്ക് വലിയ ആശ്വാസമാണ് സമാധാന നീക്കങ്ങള്. ക്രൂഡ് വില കുറഞ്ഞാല് രാജ്യത്തിന്റെ ഇറക്കുമതി ചെലവ് കുറയും. പണപ്പെരുപ്പ സമ്മര്ദം താഴും. ധനക്കമ്മി നിയന്ത്രണവിധേയമാകും. ഈ സാഹചര്യത്തില് സെന്സെക്സും നിഫ്റ്റിയും തുടര്ച്ചയായ ദിവസങ്ങളില് നേട്ടം രേഖപ്പെടുത്തി.
എണ്ണ കമ്പനികള്: ക്രൂഡ് വില ഇടിയുമ്പോള് ഏറ്റവും കൂടുതല് പ്രയോജനം ലഭിക്കുന്നത് എണ്ണ വിപണന കമ്പനികള്ക്കാണ്. ശ്രദ്ധിക്കേണ്ട ഓഹരികള്: ഹിന്ദുസ്ഥാന് പെട്രോളിയം കോര്പറേഷന്, ഭാരത് പെട്രോളിയം കോര്പറേഷന്, ഇന്ത്യന് ഓയില് കോര്പറേഷന്, ഓയില് ഇന്ത്യ തുടങ്ങിയവ. ഇവ അസംസ്കൃത എണ്ണ വാങ്ങി പെട്രോളും ഡീസലും മറ്റ് ഉല്പന്നങ്ങളുമാക്കി വില്ക്കുന്ന കമ്പനികളാണ്. ക്രൂഡ് വില കുറയുമ്പോള് ഉല്പാദന ചെലവ് കുറയുന്നതിനാല് ലാഭക്ഷമത മെച്ചപ്പെടും. സമാധാന ധാരണയുടെ വാര്ത്തകള്ക്ക് പിന്നാലെ ഈ ഓഹരികളുടെ വില ഗണ്യമായി ഉയര്ന്നിരുന്നു.
വ്യോമയാന മേഖല: എയര്ലൈന് കമ്പനികളുടെ ചെലവിന്റെ വലിയൊരു പങ്ക് ഇന്ധനമാണ്. അതിനാല് എണ്ണവില ഇടിയുന്നത് ഈ മേഖലയ്ക്ക് നേരിട്ടുള്ള നേട്ടമാണ്. ശ്രദ്ധിക്കേണ്ട ഓഹരി-ഇന്ഡിഗോ. പശ്ചിമേഷ്യയിലെ സംഘര്ഷം വിമാന സര്വീസ് അവതാളത്തിലാക്കിയിരുന്നു. സമാധാന ധാരണയിലൂടെ വിമാന സര്വീസുകള് സാധാരണ നിലയിലാകുമെന്നും ജെറ്റ് ഇന്ധനച്ചെലവ് കുറയുമെന്നും പ്രതീക്ഷിക്കുന്നു. ഇതിന്റെ ഫലമായി ഇന്ഡിഗോ ഓഹരിക്കും കുതിപ്പ്.
ഇന്ഫ്രാസ്ട്രക്ചര് കമ്പനികള്: പശ്ചിമേഷ്യയിലെ നിര്മാണ-അടിസ്ഥാനസൗകര്യ പദ്ധതികളില് വന് സാന്നിധ്യമുള്ള ഇന്ത്യന് കമ്പനികള്ക്ക് സമാധാന ധാരണ വലിയ അവസരമാണ്. ലാര്സന് ആന്ഡ് ടൂബ്രോ (L&T) ഈ ഗണത്തിലാണ്. എല് ആന്ഡ് ടിയുടെ ഓര്ഡര് ബുക്കിന്റെ 37 ശതമാനവും പശ്ചിമേഷ്യയില് നിന്നാണ്. പുതിയ പദ്ധതികള് വീണ്ടും സജീവമാകാനുള്ള സാധ്യതയുണ്ട്. ഈ ഓഹരിയും ഉയരങ്ങളിലേക്ക് നീങ്ങുന്നു. മറ്റൊന്ന് കെ.ഇ.സി ഇന്റര്നാഷണല്. ഇവരുടെ ഓര്ഡര് ബുക്കിന്റെ 20 ശതമാനവും പുതിയ ഓര്ഡറുകളുടെ 28 ശതമാനവും പശ്ചിമേഷ്യയില് നിന്നുള്ളതാണ്. മേഖലയില് സ്ഥിരത മടങ്ങിയെത്തിയാല് കമ്പനിക്ക് ഗുണകരമാകും.
തുറമുഖ-ലോജിസ്റ്റിക്സ് മേഖല: ഈ മേഖലയില് നേട്ടമുണ്ടാക്കുന്നവരില് പ്രധാനികള് അദാനി പോര്ട്സാണ്. ഇസ്രായേലിലെ ഹൈഫ തുറമുഖം ഉള്പ്പെടെ പശ്ചിമേഷ്യന് മേഖലയില് സാന്നിധ്യമുള്ള അദാനി പോര്ട്സ് വ്യാപാര പ്രവാഹം സാധാരണ നിലയിലാകുന്നതിലൂടെ അദാനി പോര്ട്സിന് നേട്ടമാകും.
കാര്ഷിക കയറ്റുമതി കമ്പനികള്: എല്.ടി ഫുഡ്സ് തുടങ്ങിയ കമ്പനികള്ക്കും പശ്ചിമേഷ്യന് സമാധാനാന്തരീക്ഷം വലിയൊരു ആശ്വാസമാണ്. ബസുമതി അരിയുടെ ഏറ്റവും വലിയ വിപണികളിലൊന്നാണ് പശ്ചിമേഷ്യ. ഇറാന്, സൗദി അറേബ്യ, യുഎഇ തുടങ്ങിയ രാജ്യങ്ങളിലേക്കുള്ള കയറ്റുമതി വീണ്ടും ശക്തിപ്പെടാന് സാധ്യതയുണ്ട്. കെ.ആര്.ബി.എല്ലിന്റെ ബസുമതി കയറ്റുമതി വരുമാനത്തിന്റെ 60 ശതമാനത്തിലേറെയും പശ്ചിമേഷ്യയില് നിന്നാണ് ലഭിക്കുന്നത്.
ഉപഭോഗ, ബാങ്കിംഗ്, നിര്മാണ മേഖലകള്: സമാധാന ധാരണ സ്ഥിരത കൈവരിക്കുകയും എണ്ണവില താഴ്ന്ന നിലയില് തുടരുകയും ചെയ്താല് ഉപഭോഗ, ഗതാഗത, നിര്മാണ, അടിസ്ഥാന സൗകര്യവികസന, ബാങ്കിംഗ്, ധനകാര്യ സേവന മേഖലകളില് ദീര്ഘകാല നേട്ടമുണ്ടാകും. കുറഞ്ഞ ഇന്ധനച്ചെലവ് ഉപഭോക്താക്കളുടെ കൈവശം കൂടുതല് പണം ബാക്കിയാക്കും. അത് സമ്പദ്വ്യവസ്ഥയില് ഡിമാന്റ് വര്ധിപ്പിക്കും.
സമാധാന ധാരണക്ക് പിന്നാലെ ചില കമോഡിറ്റി അധിഷ്ഠിത കമ്പനികള്ക്ക് തിരിച്ചടിയും നേരിട്ടു. ഇതില് ഹിന്ഡാല്കോ, നാല്കോ, വേദാന്ത തുടങ്ങി അലുമിനിയം കമ്പനികള് പ്രധാനം. പശ്ചിമേഷ്യയില് നിന്നുള്ള വിതരണ സാധ്യത വര്ധിച്ചതോടെ ആഗോള അലുമിനിയം വില താഴ്ന്നു. ഇതേ തുടര്ന്ന് ഈ കമ്പനികളുടെ ഓഹരികള് നന്നായി ഇടിഞ്ഞു.
(ഈ കുറിപ്പ് പഠനത്തിനും വിശകലനത്തിനും മാത്രം. നിക്ഷേപ ശുപാര്ശയല്ല. നിക്ഷേപങ്ങള്ക്ക് വിദഗ്ധരുടെ അഭിപ്രായം തേടുന്നത് ഉചിതം.)
Read DhanamOnline in English
Subscribe to Dhanam Magazine
