നെഗറ്റീവ് സൂചനകള്‍ വിപണിയെ തളര്‍ത്തുമോ? ഗിഫ്റ്റ് നിഫ്റ്റി താഴേക്ക്, വിറ്റൊഴിയല്‍ തുടര്‍ന്ന് വിദേശികള്‍, ജാഗ്രതയോടെ നിക്ഷേപകര്‍

ക്രിസ്മസ് അവധിക്ക് ശേഷം വ്യാപാരം പുനരാരംഭിക്കുന്ന ഇന്ത്യന്‍ ഓഹരി വിപണിയില്‍ ഇന്ന് തളര്‍ച്ചയോടെയുള്ള തുടക്കത്തിന് സാധ്യത. ആഗോള വിപണികളിലെ സമ്മിശ്ര പ്രതികരണങ്ങളും ഗിഫ്റ്റ് നിഫ്റ്റിയില്‍ നിന്നുള്ള നെഗറ്റീവ് സൂചനകളുമാണ് ആഭ്യന്തര വിപണിയെ സ്വാധീനിക്കുന്നത്.

ഇന്ത്യൻ സമയം രാവിലെ 7.15ന്‌, ഗിഫ്റ്റ് നിഫ്റ്റി 71.50 പോയിന്റ് ഇടിഞ്ഞ് 26,105.50 എന്ന നിലവാരത്തിലാണ് വ്യാപാരം നടത്തുന്നത്.

യുഎസ് വിപണിയില്‍ ഡൗ ജോണ്‍സ് 288 പോയിന്റ് ഉയര്‍ന്നു. ഏഷ്യയില്‍ നിക്കി 430 പോയിന്റ് നേട്ടത്തിലാണ്. യുഎസ് വിപണികള്‍ നേട്ടത്തില്‍ വ്യാപാരം അവസാനിപ്പിക്കുകയും ഏഷ്യന്‍ വിപണികള്‍ നേരിയ പോസിറ്റീവ് പ്രവണത കാണിക്കുകയും ചെയ്യുന്നുണ്ടെങ്കിലും, ഇന്ത്യന്‍ വിപണി കരുതലോടെയാകും ഇന്ന് നീങ്ങുക എന്നാണ് വിലയിരുത്തല്‍.

കഴിഞ്ഞ ദിവസം(ഡിസംബര്‍ 24) വ്യാപാരം അവസാനിക്കുമ്പോള്‍ ലാഭമെടുപ്പും ഏകീകരണവും (Consolidation) കാരണം വിപണി നേരിയ നഷ്ടം രേഖപ്പെടുത്തിയിരുന്നു. സെന്‍സെക്സ് 116.14 പോയിന്റ് (0.14%) താഴ്ന്ന് 85,408.70-ല്‍ ക്ലോസ് ചെയ്തു. നിഫ്റ്റി 35.05 പോയിന്റ് (0.13%) ഇടിഞ്ഞ് 26,142.10-ല്‍ വ്യാപാരം അവസാനിപ്പിച്ചു.

മീഡിയ, റിയല്‍റ്റി, മെറ്റല്‍ ഓഹരികള്‍ നേട്ടമുണ്ടാക്കിയപ്പോള്‍ ഐടി, ഫാര്‍മ, പൊതുമേഖലാ ബാങ്കുകള്‍ എന്നിവ വില്‍പന സമ്മര്‍ദ്ദം നേരിട്ടു.

സാങ്കേതിക വിശകലനം

സാങ്കേതികമായി നോക്കിയാല്‍, ഹ്രസ്വകാല ചലിക്കുന്ന ശരാശരിക്ക് (Moving Averages) മുകളിലാണ് നിഫ്റ്റി ഇപ്പോഴും തുടരുന്നത്. ഇത് വിപണിയില്‍ കാളകള്‍ക്ക് മേല്‍ക്കൈ ഉണ്ടെന്ന് സൂചിപ്പിക്കുന്നു.

നിഫ്റ്റിയ്ക്ക് 26,120ലാണ് സപ്പോര്‍ട്ടുള്ളത്. ഈ നിലവാരത്തിന് താഴേക്ക് പോയാല്‍ വിപണിയില്‍ കൂടുതല്‍ ലാഭമെടുപ്പിന് സാധ്യതയുണ്ട്. 26,235 കടന്നാല്‍ മാത്രമേ വിപണിയില്‍ വലിയ കുതിപ്പ് പ്രതീക്ഷിക്കാനാവൂ.

നിഫ്റ്റി – പ്രധാന നിലവാരങ്ങൾ

• ഇൻട്രാഡേ സപ്പോർട്ട് (15-min): 26,120 – 26,050 – 25,980

• ഇൻട്രാഡേ റെസിസ്റ്റൻസ് (15-min): 26,235 – 26,300 – 26,375

• പൊസിഷണൽ സപ്പോർട്ട്: 25,750 – 25,250

ബാങ്കിംഗ് ഓഹരികളില്‍ ഇപ്പോഴും തളര്‍ച്ച തുടരുകയാണ്. ബുധനാഴ്ച 115.95 പോയിന്റ് താഴ്ന്ന് 59,183.60-ലാണ് ബാങ്ക് നിഫ്റ്റി ക്ലോസ് ചെയ്തത്. 59,000 എന്നത് പ്രധാന ഇന്‍ട്രാഡേ സപ്പോര്‍ട്ട് ആയി തുടരുന്നു.

ബാങ്ക് നിഫ്റ്റി – പ്രധാന നിലവാരങ്ങൾ

• ഇൻട്രാഡേ സപ്പോർട്ട് (15-മിനിറ്റ്): 59,000 – 58,800 – 58,600

• ഇൻട്രാഡേ റെസിസ്റ്റൻസ് (15-മിനിറ്റ്): 59,200 – 59,400 – 59,535

• പൊസിഷണൽ സപ്പോർട്ട്: 58,580 – 57,200

• പൊസിഷണൽ റെസിസ്റ്റൻസ്: 60,000 – 61,250

വിദേശ നിക്ഷേപകര്‍ 1,721.26 കോടിയുടെ ഓഹരികള്‍ വിറ്റഴിച്ചപ്പോള്‍, ആഭ്യന്തര നിക്ഷേപകര്‍ 2,381.34 കോടിയുടെ വാങ്ങല്‍ നടത്തി വിപണിയെ താങ്ങിനിര്‍ത്തി.

കറന്‍സി & കമ്മോഡിറ്റി

രൂപ ഡോളറിനെതിരെ 89.64 എന്ന നിലവാരത്തിലാണ്. സ്വര്‍ണവില 4,533 രൂപയ്ക്കടുത്തും വെള്ളി വില 74.95 രൂപയ്ക്കടുത്തും ഉയര്‍ന്നു. ഇത് വിലപിടിപ്പുള്ള ലോഹങ്ങളില്‍ അനുകൂലമായ കുതിപ്പ് തുടരുന്നതിനെയാണ് സൂചിപ്പിക്കുന്നത്

യുഎസ് ഡോളര്‍ ഇന്‍ഡക്‌സ് 97.93 എന്ന നിലവാരത്തില്‍ നേരിയ ഇടിവോടെയാണ് വ്യാപാരം നടത്തുന്നത്. അതേസമയം, തുടക്കത്തില്‍ ഡോളറിനെതിരെ നേരിയ കരുത്ത് പ്രകടിപ്പിച്ച ഇന്ത്യന്‍ രൂപ 89.64 എന്ന നിലവാരത്തിലാണ് വ്യാപാരം തുടരുന്നത്.

വിപണി ഒരു ഏകീകരണ ഘട്ടത്തിലൂടെയാണ് കടന്നുപോകുന്നത്. ആഭ്യന്തര നിക്ഷേപകരുടെ ശക്തമായ പിന്തുണയുള്ളതിനാല്‍ വിപണിയിലുണ്ടാകുന്ന തിരുത്തലുകള്‍ നിക്ഷേപകര്‍ക്ക് മികച്ച വാങ്ങല്‍ അവസരമായേക്കാം.

Indian stock market opens weak post-Christmas amid foreign sell-off; gold and silver prices show bullish signs.