സീ എന്റര്ടെയ്ന്മെന്റ് എന്റര്പ്രൈസസ് (ZEEL) സ്ഥാപകനും എസ്സല് ഗ്രൂപ്പ് ചെയര്മാനുമായ സുഭാഷ് ചന്ദ്രയ്ക്കെതിരെ കേന്ദ്ര അന്വേഷണ ഏജന്സിയായ സി.ബി.ഐ കേസെടുത്തതിനു പിന്നാലെ കമ്പനിയുടെ ഓഹരിവില കുത്തനെ ഇടിഞ്ഞു. സെപ്റ്റംബര് ഏഴിലെ വ്യാപാരത്തില് സീ എന്റര്ടെയ്ന്മെന്റ് ഓഹരി ആറ് ശതമാനത്തിലധികം താഴ്ന്ന് 85.42 വരെ എത്തിയിരുന്നു.
എല്.ഐ.സി ഹൗസിംഗ് ഫിനാന്സില്നിന്ന് കമ്പനികള്ക്ക് വായ്പ ലഭിക്കുന്നതിനായി സുഭാഷ് ചന്ദ്ര തന്റെ ആസ്തിമൂല്യം പെരുപ്പിച്ചുകാട്ടുന്ന രേഖകള് സമര്പ്പിച്ചെന്നാണ് പരാതി. 980 കോടി വരുന്ന രണ്ട് വായ്പകള് പിന്നീട് തിരിച്ചടയ്ക്കാതെ വന്നതിലൂടെ പലിശയും മറ്റു ചെലവുകളും ഉള്പ്പെടെ എല്.ഐ.സി ഹൗസിംഗ് ഫിനാന്സിന് 1,322 കോടിയിലധികം നഷ്ടമുണ്ടായെന്നാണ് ആരോപണം. ക്രിമിനല് ഗൂഢാലോചന, വഞ്ചന, വിശ്വാസവഞ്ചന തുടങ്ങിയ കുറ്റങ്ങള് ചുമത്തിയാണ് സി.ബി.ഐയുടെ ബാങ്കിംഗ് സെക്യൂരിറ്റീസ് ഫ്രോഡ് ബ്രാഞ്ച് ഓഗസ്റ്റ് 31ന് എഫ്.ഐ.ആര് രജിസ്റ്റര് ചെയ്തത്.
2018ല് അനുവദിച്ച രണ്ട് വായ്പകളെ ചുറ്റിപ്പറ്റിയാണ് അന്വേഷണം. വസന്ത് സാഗര് പ്രോപ്പര്ട്ടീസ് പ്രൈവറ്റ് ലിമിറ്റഡിന് 500 കോടി വായ്പയാണ് ആദ്യം അനുവദിച്ചത്. പാന് ഇന്ത്യ ഇന്ഫ്രാപ്രോജക്ട്സ് പ്രൈവറ്റ് ലിമിറ്റഡ് ഇതില് സഹവായ്പക്കാരായിരുന്നു. നിലവിലുള്ള വായ്പ ഏറ്റെടുക്കുക, അധിക വായ്പ ലഭ്യമാക്കുക, ബിസിനസ് വിപുലീകരിക്കുക തുടങ്ങിയ ആവശ്യങ്ങള്ക്കായാണ് ഈ സൗകര്യം അനുവദിച്ചത്. 2018 മാര്ച്ച് 28ന് സുഭാഷ് ചന്ദ്ര നല്കിയ തുടര്ച്ചയായ വ്യക്തിഗത ഗാരന്റിയുടെ അടിസ്ഥാനത്തിലായിരുന്നു വായ്പ.
അതേ വര്ഷം ഡിജിറ്റല് സബ്സ്ക്രൈബര് മാനേജ്മെന്റ് ആന്ഡ് കണ്സള്ട്ടന്സി സര്വീസസ് പ്രൈവറ്റ് ലിമിറ്റഡിന് 480 കോടി അനുവദിച്ചു. സ്പിരിറ്റ് ഇന്ഫ്രാപവര് ആന്ഡ് മള്ട്ടിവെഞ്ചേഴ്സ് പ്രൈവറ്റ് ലിമിറ്റഡായിരുന്നു സഹവായ്പക്കാരന്. വാടക വരുമാനത്തെ അടിസ്ഥാനമാക്കി വായ്പ നല്കുന്ന 'റെന്റല് ഡിസ്കൗണ്ടിംഗ്' സംവിധാനത്തിലായിരുന്നു ഇടപാട്. 2018 ഓഗസ്റ്റ് 10ന് സുഭാഷ് ചന്ദ്ര നല്കിയ വ്യക്തിഗത ഗാരന്റി ഈ വായ്പയ്ക്കും സുരക്ഷയായി ഉപയോഗിച്ചെന്നാണ് പരാതിയില് പറയുന്നത്.
വസന്ത് സാഗര് വായ്പയ്ക്കായി സമര്പ്പിച്ച 2018 മാര്ച്ച് 28ലെ രേഖയില് 2017 മാര്ച്ച് 31ലെ കണക്കനുസരിച്ച് സുഭാഷ് ചന്ദ്രയുടെ ആസ്തിമൂല്യം 619.76 കോടി ഡോളര് അഥവാ ഏകദേശം 59,113.21 കോടി എന്നായിരുന്നു രേഖപ്പെടുത്തിയിരുന്നത്. ഡി.ഐ.എം ആന്ഡ് കമ്പനി എന്ന സ്ഥാപനമാണ് സര്ട്ടിഫിക്കറ്റ് നല്കിയതെന്നാണ് റിപ്പോര്ട്ടുകള്.
രണ്ടാമത്തെ വായ്പയ്ക്കായി 2018 ജൂലൈ ആറിന് സമര്പ്പിച്ച മറ്റൊരു സര്ട്ടിഫിക്കറ്റില് അദ്ദേഹത്തിന്റെ ആസ്തിമൂല്യം 40,562 കോടിയാണെന്നും കാണിച്ചിരുന്നു. എം.പി.ജെ ആന്ഡ് കമ്പനി എന്ന ചാര്ട്ടേഡ് അക്കൗണ്ടന്റ് സ്ഥാപനമാണ് ഇത് നല്കിയതെന്നാണ് എല്.ഐ.സി ഹൗസിംഗ് ഫിനാന്സിന്റെ പരാതി. ഈ ആസ്തിമൂല്യ സര്ട്ടിഫിക്കറ്റുകളും സുഭാഷ് ചന്ദ്രയുടെ വ്യക്തിഗത ഗാരന്റിയും പരിഗണിച്ചാണ് വായ്പകള്ക്ക് അംഗീകാരം നല്കിയതെന്ന് പരാതിയില് ആരോപിക്കുന്നു.
സുഭാഷ് ചന്ദ്രയുടെ വ്യക്തിഗത പാപ്പരത്ത പരിഹാര നടപടികളിലാണ് പഴയ സര്ട്ടിഫിക്കറ്റുകളിലെ കണക്കുകളും പിന്നീട് വെളിപ്പെടുത്തിയ ആസ്തിവിവരങ്ങളും തമ്മിലുള്ള വലിയ അന്തരം പുറത്തുവന്നത്.
2018ല് സമര്പ്പിച്ച സര്ട്ടിഫിക്കറ്റുകളില് പറഞ്ഞിരുന്ന ആസ്തിമൂല്യം തനിക്കുണ്ടായിരുന്നില്ലെന്നാണ് പാപ്പരത്ത നടപടികള്ക്കിടെ സുഭാഷ് ചന്ദ്ര വ്യക്തമാക്കിയതെന്ന് എഫ്.ഐ.ആര് പറയുന്നു. 2024ല് തന്റെ ആസ്തിമൂല്യം 31.79 കോടി മാത്രമാണെന്നും 2017-18ല് പോലും അത് 40,000 കോടിയില് കൂടുതലായിരുന്നില്ലെന്നും അദ്ദേഹം അറിയിച്ചതായാണ് പരാതി. ഈ വൈരുധ്യമാണ് വായ്പ നേടാന് വ്യാജമോ പെരുപ്പിച്ചതോ ആയ രേഖകള് ഉപയോഗിച്ചോ എന്ന സംശയത്തിലേക്ക് നയിച്ചത്.
പ്രധാന കുടിശികയ്ക്കു പുറമേ പലിശയും മറ്റ് ചാര്ജുകളും ചേര്ത്താണ് മൊത്തം സാമ്പത്തിക നഷ്ടം 1,322 കോടിയിലധികമായി എല്.ഐ.സി ഹൗസിംഗ് ഫിനാന്സ് കണക്കാക്കിയിരിക്കുന്നത്.
വായ്പയെടുത്ത കമ്പനികളും അവയുടെ ഡയറക്ടര്മാരും സുഭാഷ് ചന്ദ്രയും ഒത്തുകളിച്ച് എല്.ഐ.സി ഹൗസിംഗ് ഫിനാന്സിനെ തെറ്റിദ്ധരിപ്പിച്ചെന്നും വായ്പത്തുക അനുവദിപ്പിച്ചശേഷം പണം വകമാറ്റിയെന്നും പരാതിയില് ആരോപിക്കുന്നു. വായ്പ തിരിച്ചുപിടിക്കാനുള്ള നടപടികളെ പരാജയപ്പെടുത്തുന്നതിനായി വ്യക്തിഗത ഗാരന്ററുടെ ആസ്തികള് മാറ്റിയതായും ആരോപണമുണ്ട്.
സുഭാഷ് ചന്ദ്രയ്ക്കു പുറമേ എഫ്.ഐ.ആറില് പേരുള്ളവര്:
* വസന്ത് സാഗര് പ്രോപ്പര്ട്ടീസ് പ്രൈവറ്റ് ലിമിറ്റഡ്
* ഡയറക്ടര് പങ്കജ് സുരോളിയ
* പാന് ഇന്ത്യ ഇന്ഫ്രാപ്രോജക്ട്സ് പ്രൈവറ്റ് ലിമിറ്റഡ്
* ഡിജിറ്റല് സബ്സ്ക്രൈബര് മാനേജ്മെന്റ് ആന്ഡ് കണ്സള്ട്ടന്സി സര്വീസസ്
* ഡയറക്ടര് അമീഷ് പാണ്ഡ്യ
* സ്പിരിറ്റ് ഇന്ഫ്രാപവര് ആന്ഡ് മള്ട്ടിവെഞ്ചേഴ്സ്
* ഡയറക്ടര് രാജീവ് ധോലാകിയ
* തിരിച്ചറിയാത്ത ചില പൊതുപ്രവര്ത്തകരും മറ്റുള്ളവരും
ഇവര്ക്കെതിരായ ആരോപണങ്ങള് അന്വേഷണഘട്ടത്തിലാണ്.
സുഭാഷ് ചന്ദ്രയുടെ വ്യക്തിഗത പാപ്പരത്ത നടപടികളെച്ചൊല്ലി നേരത്തേ തന്നെ വലിയ വിവാദം നിലനില്ക്കുന്നുണ്ട്. വിവിധ വായ്പാദാതാക്കള് ഉന്നയിച്ച അംഗീകൃത ക്ലെയിമുകളുടെ മൂല്യം 22,006.57 കോടിയാണ്. ഇതിനെതിരെ ഏകദേശം 6.25 കോടി മാത്രം നല്കുന്ന തിരിച്ചടവ് പദ്ധതിക്കാണ് ആദ്യം എന്.സി.എല്.ടി അംഗീകാരം നല്കിയത്. വായ്പാദാതാക്കള്ക്ക് ഏകദേശം 99.97% നഷ്ടം വരുത്തുന്ന പദ്ധതിയാണിതെന്ന വിമര്ശനമാണ് ഉയര്ന്നത്.
എന്നാല് 22,006 കോടി സുഭാഷ് ചന്ദ്ര നേരിട്ട് വായ്പയെടുത്ത തുകയല്ല. എസ്സല് ഗ്രൂപ്പുമായി ബന്ധപ്പെട്ട വിവിധ കമ്പനികളുടെ വായ്പകള്ക്ക് വ്യക്തിഗത ഗാരന്റി നല്കിയതിന്റെ അടിസ്ഥാനത്തില് അദ്ദേഹത്തിനെതിരെ ഉന്നയിക്കപ്പെട്ട ക്ലെയിമുകളുടെ ആകെ മൂല്യമാണത്.
കാനറ ബാങ്ക്, യൂണിയന് ബാങ്ക് ഓഫ് ഇന്ത്യ, എല്.ഐ.സി ഹൗസിംഗ് ഫിനാന്സ് തുടങ്ങിയ വായ്പാദാതാക്കള് തിരിച്ചടവ് പദ്ധതിക്കെതിരെ അപ്പീല് നടപടികള് സ്വീകരിച്ചു. തുടര്ന്ന് മുന് ഉത്തരവ് സ്റ്റേ ചെയ്യുകയും വിഷയം പരിഗണിക്കാന് എന്.സി.എല്.ടി അഞ്ചംഗ പ്രത്യേക ബെഞ്ച് രൂപീകരിക്കുകയും ചെയ്തു.
സി.ബി.ഐ കേസിലെ വായ്പക്കാരുടെ പട്ടികയില് സീ എന്റര്ടെയ്ന്മെന്റ് എന്റര്പ്രൈസസ് ഇല്ല. കേസ് സുഭാഷ് ചന്ദ്രയുടെ വ്യക്തിഗത ഗാരന്റിയും എസ്സല് ഗ്രൂപ്പുമായി ബന്ധപ്പെട്ട മറ്റു കമ്പനികളുടെ വായ്പകളും സംബന്ധിച്ചതാണ്.
എന്നിരുന്നാലും സുഭാഷ് ചന്ദ്ര സീയുടെ സ്ഥാപകനും ചെയര്മാന് എമിരിറ്റസുമാണെന്നതിനാല് നിക്ഷേപകര് പ്രമോട്ടര് ഗ്രൂപ്പുമായി ബന്ധപ്പെട്ട നിയമ, സാമ്പത്തിക, കോര്പ്പറേറ്റ് ഗവേണന്സ് അപകടസാധ്യതകള് വിലയിരുത്തി. ഇതാണ് ഓഹരിയിലെ ശക്തമായ വില്പ്പനയ്ക്ക് കാരണമായത്. സെപ്റ്റംബര് ഏഴിലെ വ്യാപാരത്തില് ഓഹരി 6.4% വരെ താഴ്ന്നതായി വിപണി റിപ്പോര്ട്ടുകള് വ്യക്തമാക്കുന്നു.
സി.ബി.ഐ കേസ് സീ എന്റര്ടെയ്ന്മെന്റിന്റെ ബാധ്യതയാണെന്ന് നേരിട്ട് വ്യാഖ്യാനിക്കാനാകില്ല. പക്ഷേ പ്രമോട്ടറുമായി ബന്ധപ്പെട്ട തുടര്ച്ചയായ നിയമപ്രശ്നങ്ങള്, കടബാധ്യതാ തര്ക്കങ്ങള്, നിയന്ത്രണ നടപടികള് എന്നിവ കമ്പനിയുടെ ഓഹരിവിലയെയും നിക്ഷേപകരുടെ വിശ്വാസത്തെയും ബാധിക്കുന്ന പ്രധാന ഘടകങ്ങളായി തുടരുകയാണ്.
Read DhanamOnline in English
Subscribe to Dhanam Magazine
