ഇന്ത്യയിലെ ആരോഗ്യരംഗം വലിയൊരു മാറ്റത്തിലൂടെയാണ് കടന്നുപോകുന്നത്. രോഗം വന്ന ശേഷം ചികിത്സ തേടുന്ന സമീപനത്തില്‍ നിന്ന്, രോഗം വരാതിരിക്കാനുള്ള ജാഗ്രതയിലേക്കാണ് രാജ്യത്തിന്റെ ശ്രദ്ധ മാറുന്നത്. ആരോഗ്യത്തെ 'ചികിത്സ' എന്ന അതിര്‍വരമ്പില്‍ ഒതുക്കാതെ ജീവിതശൈലി, മാനസിക ആരോഗ്യവും ആരോഗ്യ സംരക്ഷണത്തിനായുള്ള കരുതലും ഉള്‍പ്പെടുന്ന സമഗ്രമായ വെല്‍നെസ് ആശയമാണ് ഇപ്പോള്‍ ഇന്ത്യയില്‍ ശക്തമാകുന്നത്.
ആഗോള തലത്തില്‍ തന്നെ ഏറ്റവും വേഗത്തില്‍ വളരുന്ന വെല്‍നെസ് വിപണികളിലൊന്നായി ഇന്ത്യ മാറിക്കഴിഞ്ഞു. 2026ഓടെ 72 മുതല്‍ 78 ബില്യണ്‍ ഡോളര്‍ വരെ മൂല്യമെത്തുമെന്ന് കണക്കാക്കുന്ന ഈ മേഖലയ്ക്ക് ഏകദേശം 28 ശതമാനമാണ് വാര്‍ഷിക വളര്‍ച്ച. ആഗോള ശരാശരിയേക്കാള്‍ പലമടങ്ങ് വേഗമാണ് ഇന്ത്യയിലെ ഈ വളര്‍ച്ച.
ആരോഗ്യം എന്നത് അസുഖം വന്നാല്‍ ആശുപത്രിയിലേക്കുള്ള യാത്ര മാത്രമല്ലെന്ന തിരിച്ചറിവാണ് ഈ മാറ്റത്തിന്റെ അടിസ്ഥാനം. 'വെല്‍നെസ്' എന്നത് ദീര്‍ഘകാല ആരോഗ്യവും ജീവിത നിലവാരവും സംരക്ഷിക്കുന്ന ഒരു സമീപനമാണെന്ന ബോധ്യം വലിയൊരു വിഭാഗം ഇന്ത്യക്കാരില്‍ വളര്‍ന്നുവരികയാണ്. ശരീരാരോഗ്യത്തിനൊപ്പം മാനസിക സമതുലിതാവസ്ഥയും ജീവിത ശൈലിയും ഇതിന്റെ ഭാഗമാണ്.
ജീവിതശൈലി രോഗങ്ങളുടെ വര്‍ധന
പ്രമേഹം, രക്തസമ്മര്‍ദം, ഹൃദ്രോഗങ്ങള്‍ തുടങ്ങിയ ജീവിതശൈലി രോഗങ്ങളാണ് ഇന്ത്യയിലെ മരണനിരക്കില്‍ വലിയ പങ്ക് വഹിക്കുന്നത്. വ്യായാമക്കുറവ്, തെറ്റായ ഭക്ഷണരീതി, ജോലി സമ്മര്‍ദം എന്നിവ ആരോഗ്യത്തെ ബാധിക്കുന്നുവെന്ന തിരിച്ചറിവ് കൂടുതല്‍ പേരെ മുന്‍കൂട്ടി ജാഗ്രത പാലിക്കാന്‍ പ്രേരിപ്പിച്ചു.
ചികിത്സാചെലവിന്റെ ഭാരം
ഇന്ത്യയില്‍ ചികിത്സാചെലവുകളുടെ പകുതിയിലേറെയും ആളുകള്‍ സ്വന്തം പോക്കറ്റില്‍ നിന്നാണ് വഹിക്കുന്നത്. ആരോഗ്യ ഇന്‍ഷുറന്‍സ് വ്യാപകമാകുന്നുണ്ടെങ്കിലും, ഗുരുതര ചികിത്സകള്‍ വലിയ സാമ്പത്തിക ആഘാതമുണ്ടാക്കുന്ന സാഹചര്യമാണ് ഇപ്പോഴും. ഇതാണ് 'രോഗം വരാതിരിക്കാന്‍ ശ്രദ്ധിക്കാം' എന്ന ചിന്ത ശക്തമാക്കുന്നത്.
ടെക്നോളജിയും യുവതലമുറയും
വെയറബിള്‍ ഡിവൈസുകള്‍, ഫിറ്റ്നസ് ആപ്പുകള്‍, ഡിജിറ്റല്‍ ഹെല്‍ത്ത് പ്ലാറ്റ്ഫോമുകള്‍ എന്നിവ ആരോഗ്യനിരീക്ഷണം വ്യക്തികളുടെ കൈകളിലേക്കെത്തിച്ചു. ഹൃദയമിടിപ്പ് മുതല്‍ ഉറക്ക ഗുണനിലവാരം വരെ നിരീക്ഷിക്കാന്‍ സാധിക്കുന്ന സാങ്കേതികവിദ്യകള്‍ വെല്‍നെസിനെ ദിനചര്യയുടെ ഭാഗമാക്കി. ഇന്ത്യയില്‍ 71 ശതമാനം ആളുകള്‍ ടെക്നോളജി അധിഷ്ഠിത ആരോഗ്യ ഉപകരണങ്ങള്‍ ഉപയോഗിക്കുന്നുവെന്നാണ് കണക്ക്.
ജോലിസ്ഥലങ്ങളില്‍ വെല്‍നെസ് സംസ്‌കാരം
ജീവനക്കാരുടെ ആരോഗ്യവും ഉല്‍പാദനക്ഷമതയും തമ്മിലുള്ള ബന്ധം കമ്പനികള്‍ തിരിച്ചറിഞ്ഞതോടെ, ജോലിസ്ഥലങ്ങളില്‍ വെല്‍നെസ് പ്രോഗ്രാമുകള്‍ സാധാരണമാകുകയാണ്. മാനസികാരോഗ്യ പിന്തുണ മുതല്‍ ഫിറ്റ്നസ് പദ്ധതികള്‍ വരെ ഉള്‍പ്പെടുന്ന ഈ സമീപനം 'അസുഖം വന്നാല്‍ അവധി' എന്ന പഴയ ചിന്തയില്‍ നിന്ന് വ്യത്യസ്തമാണ്.
ഇന്ന് ഇന്ത്യയിലെ വെല്‍നെസ് വിപണി വൈവിധ്യമാര്‍ന്നതാണ്. ഡയറ്ററി സപ്ലിമെന്റുകളും ന്യൂട്രാസ്യൂട്ടിക്കല്‍സും വലിയ ഡിമാന്റാണ് കാണിക്കുന്നത്. 2026 ഓടെ 18 മുതല്‍ 30 ബില്യണ്‍ ഡോളര്‍ വരെ മൂല്യമെത്തുമെന്ന് കണക്കാക്കുന്ന ഈ മേഖല, ആരോഗ്യബോധം എത്രമാത്രം വ്യാപകമാണെന്നതിന്റെ സൂചനയാണ്.
യോഗ, പ്രാണായാമം, ഓര്‍ഗാനിക് ഭക്ഷണം, ആയുര്‍വേദം തുടങ്ങിയ പരമ്പരാഗത രീതികളും പുതിയ ശാസ്ത്രീയ പരിശോധനകളുടെയും ടെക്നോളജിയുടെയും സഹായത്തോടെ വീണ്ടും മുഖ്യധാരയിലേക്കെത്തുകയാണ്. പുരാതന അറിവും ആധുനിക തെളിവുകളും കൂട്ടിച്ചേര്‍ന്നൊരു ആരോഗ്യ സമീപനമാണ് ഇവിടെ രൂപപ്പെടുന്നത്.
വിദഗ്ധര്‍ പറയുന്നത് പോലെ, ഇന്ത്യയിലെ ഈ വെല്‍നെസ് മാറ്റം ഒരു ട്രെന്‍ഡല്ല; ദീര്‍ഘകാല ആരോഗ്യ സമീപനത്തിലുള്ള അടിസ്ഥാനപരമായ മാറ്റമാണ്. ജീവിതശൈലി രോഗങ്ങളുടെ വെല്ലുവിളികളും, വര്‍ധിച്ച ബോധവല്‍ക്കരണവും, സാങ്കേതിക പിന്തുണയും ഒന്നിച്ചെത്തുമ്പോള്‍, ഇന്ത്യയുടെ ആരോഗ്യ കഥ ഇനി കൂടുതല്‍ പ്രതിരോധത്തിലൂന്നിയ ജാഗ്രതയായിരിക്കും.
Read DhanamOnline in English
Subscribe to Dhanam Magazine
