രാജ്യത്തെ ചെറുകിട, ഇടത്തരം സംരംഭകരെ സഹായിക്കുന്നതിന്റെ ഭാഗമായി നാഷണല് ഇന്ഡസ്ട്രീസ് റിസര്ച്ച് ആന്ഡ് ഡെവലപ്മെന്റ് കൗണ്സില് പുതിയ ആപ്ലിക്കേഷന് വികസിപ്പിച്ചു. ഇന്ഡ്ആപ്പ് എന്ന പേരിലുള്ള ഈ ഡിജിറ്റല് പ്ലാറ്റ്ഫോമിലൂടെ ഇന്ത്യന് ബ്രാന്ഡുകള്ക്കും ചെറുകിട സംരംഭകര്ക്കും ആഗോള കമ്പനികളുമായി മത്സരിക്കാനുള്ള അവസരം ലഭിക്കുമെന്നാണ് പ്രതീക്ഷ.
എട്ട് മന്ത്രാലയങ്ങളുടെ പിന്തുണയുള്ള ഇന്ഡ്ആപ്പ് പ്രധാനമായും ലക്ഷ്യംവയ്ക്കുന്നത് രാജ്യത്തെ എംഎസ്എംഇ സംരംഭകരെയാണ്. സര്ക്കാര് പദ്ധതികളെക്കുറിച്ചുള്ള വിവരങ്ങള് നല്കുക, മൂലധന ലഭ്യത സുഗമമാക്കുക, ബിസിനസ്സ് കൂടുതല് ആളുകളിലേക്ക് എത്തിക്കുക, പരിശീലനത്തിനും ശേഷി വികസനത്തിനും സഹായിക്കുക തുടങ്ങി വിവിധ ഡിജിറ്റല് സേവനങ്ങള് ലഭ്യമാക്കാന് ഇന്ഡ്ആപ്പ് സഹായിക്കുന്നു.
ഇന്ഡ്ആപ്പിന്റെ മാര്ക്കറ്റ് പ്ലേസില് തങ്ങളുടെ ഉത്പന്നങ്ങളും സേവനങ്ങളും ലിസ്റ്റ് ചെയ്യാന് സാധിക്കും. ആപ്പിന്റെ ഉദ്ഘാടനം നവംബര് 26ന് സൂക്ഷ്മ, ചെറുകിട, ഇടത്തരം സംരംഭക വകുപ്പ് മന്ത്രി ജിതിന് റാം മാഞ്ചി നിര്വഹിക്കും.
ഭക്ഷ്യ സംസ്കരണ മന്ത്രാലയം, കൃഷി മന്ത്രാലയം, ഫിഷറീസ്-മൃഗസംരക്ഷണം-ക്ഷീരവികസന മന്ത്രാലയം, വാണിജ്യ-വ്യവസായ മന്ത്രാലയം, പരിസ്ഥിതി-വനം-കാലാവസ്ഥാ വ്യതിയാന മന്ത്രാലയം, കോര്പ്പറേറ്റ് കാര്യ മന്ത്രാലയം, പുതിയതും പുനരുപയോഗിക്കാവുന്നതുമായ ഊര്ജ്ജ മന്ത്രാലയം തുടങ്ങിയ മറ്റ് മന്ത്രാലയങ്ങളുടെ പദ്ധതികളും അനുമതികളും ഈ ആപ്പിലൂടെ ലഭ്യമാകും.
Read DhanamOnline in English
Subscribe to Dhanam Magazine
