ബംഗളൂരു ആസ്ഥാനമായി പ്രവർത്തിക്കുന്ന ലോജിസ്റ്റിക് സ്ഥാപനമായ അഫ്ലോഗ് ഗ്രൂപ്പിന്റെ (Aflog Group) സ്ഥാപകൻ രോഹിത് ഷ്രോഫ്, 2026-ഓടെ തന്റെ ബിസിനസ് ഇന്ത്യയ്ക്ക് പുറത്തേക്ക് മാറ്റാൻ പദ്ധതിയിടുന്നു. കഴിഞ്ഞ 18 മാസത്തിനിടെ ഏകദേശം 4 കോടി രൂപ ജിഎസ്ടിയും (GST) ആദായനികുതിയും അടച്ചിട്ടും നികുതി അധികൃതരിൽ നിന്ന് നേരിടേണ്ടി വരുന്ന അമിതമായ പരിശോധനകളും നടപടികളുമാണ് ഇത്തരമൊരു തീരുമാനത്തിന് പിന്നിലെന്ന് അദ്ദേഹം വ്യക്തമാക്കുന്നു.
ഇന്ത്യയിലെ നികുതി വ്യവസ്ഥയിൽ വലിയ പോരായ്മകളുണ്ടെന്ന് രോഹിത് ഷ്രോഫ് പറയുന്നു. കൃത്യമായി നികുതി അടയ്ക്കുന്നവരെപ്പോലും സംശയത്തോടെ വീക്ഷിക്കുന്ന രീതിയാണ് നിലവിലുള്ളത്. ഇന്ത്യയിലെ ജനസംഖ്യയുടെ അഞ്ച് ശതമാനത്തിൽ താഴെ മാത്രമാണ് നേരിട്ട് ആദായനികുതി അടയ്ക്കുന്നത്. എന്നാൽ ഈ ചെറിയ വിഭാഗം നിരന്തരമായ നോട്ടീസുകൾക്കും ഓഡിറ്റുകൾക്കും വിശദീകരണങ്ങൾക്കും വിധേയരാകുന്നുവെന്നും രോഹിത് പറഞ്ഞു.
പ്രതിമാസ ജിഎസ്ടി റിട്ടേണുകളും ടിഡിഎസ് (TDS) പ്രസ്താവനകളും കൃത്യമായി സമർപ്പിച്ചിട്ടും പ്രാദേശിക ജിഎസ്ടി ഓഫീസുകളിൽ നിന്നും കേന്ദ്ര ആദായനികുതി വിഭാഗങ്ങളിൽ നിന്നും ആവർത്തിച്ചുള്ള പരിശോധനകൾ ഉണ്ടാകുന്നു. ഈ വ്യവസ്ഥയോട് പോരാടുന്നത് ബിസിനസ് നടത്തുന്നതിനേക്കാൾ കൂടുതൽ സമയവും ഊർജവും പണവും നഷ്ടപ്പെടുത്തുന്ന ഒന്നാണെന്ന് രോഹിത് ഷ്രോഫ് പറയുന്നു. നികുതി അടയ്ക്കുന്ന ബിസിനസ് ഉടമകൾ രാഷ്ട്രീയമായി സ്വാധീനമില്ലാത്ത ന്യൂനപക്ഷമായതിനാൽ അവർ എളുപ്പത്തിൽ ലക്ഷ്യം വെക്കപ്പെടുന്നു എന്നും അദ്ദേഹം കൂട്ടിച്ചേർത്തു.
ഇന്ത്യയിലെ ചട്ടക്കൂടുകൾ ബിസിനസ് വളർച്ചയെ പ്രോത്സാഹിപ്പിക്കുന്നതിന് പകരം തടസപ്പെടുത്തുകയാണ് ചെയ്യുന്നത്. ഈ തീരുമാനം രാജ്യസ്നേഹത്തിന്റെ പ്രശ്നമല്ലെന്നും മറിച്ച് പ്രായോഗികമായ വെല്ലുവിളികളും ബിസിനസ് ചെയ്യാനുള്ള എളുപ്പക്കുറവുമാണ് (Ease of doing business) തന്നെ ഇതിലേക്ക് നയിച്ചതെന്നും അദ്ദേഹം വ്യക്തമാക്കി. ഇന്ത്യയിലെ സംരംഭകർ വിദേശ രാജ്യങ്ങളിൽ മികച്ച വിജയം കൈവരിക്കുന്നത് അവിടെ ഇത്തരം പീഡനപരമായ നിയമങ്ങൾ ഇല്ലാത്തതുകൊണ്ടാണെന്നും രോഹിത് അഭിപ്രായപ്പെട്ടു.
After paying ₹4 crore in taxes, Bengaluru entrepreneur plans to exit India citing harassment and regulatory burdens.
Read DhanamOnline in English
Subscribe to Dhanam Magazine
