വിരൽത്തുമ്പിൽ എ.ഐ കൃഷി ഉപദേശകൻ, കർഷകരുടെ പ്രശ്നങ്ങൾക്ക് പരിഹാരവുമായി ഭാരത്-വിസ്താർ ടൂള്‍ പുറത്തിറക്കി

ഇന്ത്യൻ കർഷകരെ ശാക്തീകരിക്കുന്നതിനായി രൂപകൽപ്പന ചെയ്ത അത്യാധുനിക എ.ഐ (AI) ടൂളായ ഭാരത്-വിസ്താർ (Virtually Integrated System to Access Agricultural Resources) കേന്ദ്ര കൃഷി മന്ത്രാലയം പുറത്തിറക്കി. കർഷകർക്ക് ലളിതമായ ഒരു ഫോൺ കോളിലൂടെയോ വോയിസ് സന്ദേശത്തിലൂടെയോ കൃത്യമായ വിവരങ്ങൾ വേഗത്തിൽ ലഭ്യമാക്കുക എന്നതാണ് ഈ ബഹുഭാഷാ പ്ലാറ്റ്‌ഫോമിന്റെ ലക്ഷ്യം.

കൃഷിയിലെ അപകടസാധ്യതകൾ കുറയ്ക്കാനും ഉൽപ്പാദനക്ഷമത വർദ്ധിപ്പിക്കാനും ശരിയായ സമയത്ത് ശരിയായ തീരുമാനങ്ങൾ എടുക്കാൻ കർഷകരെ പ്രാപ്തരാക്കാനും ഇത് സഹായിക്കും. ഗ്രാമീണ മേഖലയിലെ ഡിജിറ്റൽ വിടവ് നികത്തുന്നതിനും കൃഷി ഒരു ലാഭകരമായ തൊഴിലായി മാറ്റുന്നതിനുമുള്ള നിർണായക ചുവടുവെപ്പ് എന്ന രീതിയിലാണ് അധികൃതര്‍ ഇത് അവതരിപ്പിക്കുന്നത്.

കേന്ദ്ര ബജറ്റിൽ ധനമന്ത്രി നിർമ്മല സീതാരാമൻ പ്രഖ്യാപിച്ച പദ്ധതിക്കായി 150 കോടി രൂപയാണ് വകയിരുത്തിയിരിക്കുന്നത്. അഗ്രിസ്റ്റാക്ക് (AgriStack) പോർട്ടലുകളെയും ഇന്ത്യൻ കൗൺസിൽ ഓഫ് അഗ്രികൾച്ചറൽ റിസർച്ചിന്റെ (ICAR) കാർഷിക രീതികളെയും നിര്‍മ്മിത ബുദ്ധി സംവിധാനങ്ങളുമായി ബന്ധിപ്പിക്കുന്ന ബൃഹത്തായ ഡിജിറ്റൽ പ്ലാറ്റ്‌ഫോം എന്ന രീതിയിലാണ് ഭാരത്-വിസ്താർ വിഭാവനം ചെയ്തിരിക്കുന്നത്.

പ്രധാന സവിശേഷതകൾ

അത്യാധുനിക മെഷീൻ ലേണിംഗ് മോഡലുകൾ ഉപയോഗിച്ച് ഓരോ കൃഷിയിടത്തിനും അനുയോജ്യമായ വിള ആരോഗ്യ റിപ്പോർട്ടുകളും കാലാവസ്ഥാ മുന്നറിയിപ്പുകളും കർഷകർക്ക് ലഭിക്കും. വായ്പകൾക്കും വിപണി സൗകര്യങ്ങൾക്കുമായുള്ള ഏകീകൃത ആവാസവ്യവസ്ഥയായും ഇത് പ്രവർത്തിക്കും. അക്ഷരങ്ങൾ ടൈപ്പ് ചെയ്യാൻ ബുദ്ധിമുട്ടുള്ള കർഷകർക്കായി സ്വാഭാവിക ഭാഷയിലുള്ള വോയിസ് മെസേജുകൾ വഴി വിവരങ്ങൾ തിരയാൻ സാധിക്കും. മലയാളം ഉൾപ്പെടെ 22 ലധികം പ്രാദേശിക ഇന്ത്യൻ ഭാഷകളിൽ ഈ ടൂൾ ലഭ്യമാക്കാനാണ് ലക്ഷ്യമിടുന്നത്. കൂടുതൽ വിവരങ്ങൾക്ക് vistaar.da.gov.in എന്ന ഔദ്യോഗിക വെബ്സൈറ്റ് സന്ദർശിക്കാവുന്നതാണ്.

_{The government launches Bharat-Vistaar AI platform to provide multilingual voice-based agricultural advisory services to farmers.}