നീറ്റ്-യുജി (NEET-UG) പുനഃപരീക്ഷയ്ക്ക് മുന്നോടിയായി വ്യാജവാർത്തകളും പരീക്ഷാ ചോർച്ചാ സംഭവങ്ങളും തടയാൻ നടപടികൾ ശക്തമാക്കി കേന്ദ്രസർക്കാർ. ജൂൺ 21 നാണ് പുനഃപരീക്ഷ നടക്കുന്നത്. ഇതിനായി മെറ്റ (Meta), ഗൂഗിൾ (Google), ടെലിഗ്രാം (Telegram) എന്നീ പ്രമുഖ സോഷ്യൽ മീഡിയ കമ്പനികളുമായി വിദ്യാഭ്യാസ മന്ത്രാലയം സഹകരണം ഉറപ്പാക്കി.
പരീക്ഷയ്ക്ക് മുൻപായി സോഷ്യൽ മീഡിയയിൽ, പ്രത്യേകിച്ച് ടെലിഗ്രാമിൽ പടരുന്ന വ്യാജ ചോദ്യപേപ്പറുകൾ, ക്ലിക്ക് ബൈറ്റ് പോസ്റ്റുകൾ, പാനിക് സൃഷ്ടിക്കുന്ന തെറ്റായ വിവരങ്ങൾ എന്നിവ മുൻകൂട്ടി കണ്ടെത്തി നീക്കം ചെയ്യുന്നതിനാണ് ഈ കൂട്ടായ്മ മുൻഗണന നൽകുക. ഇത്തരം വ്യാജ സന്ദേശങ്ങൾ പ്രചരിപ്പിക്കുന്ന ചാനലുകളും ഗ്രൂപ്പുകളും തിരിച്ചറിഞ്ഞ് ഉടൻ തന്നെ ബ്ലോക്ക് ചെയ്യുമെന്ന് സോഷ്യൽ മീഡിയ കമ്പനികൾ സർക്കാരിന് ഉറപ്പ് നൽകി. വിദ്യാഭ്യാസ മന്ത്രി ധർമ്മേന്ദ്ര പ്രധാന്റെ അധ്യക്ഷതയിൽ ചേർന്ന ഉന്നതതല യോഗത്തിൽ കേന്ദ്ര സുരക്ഷാ-ഇന്റലിജൻസ് ഏജൻസികളും ഈ ടെക് കമ്പനികളുടെ പ്രതിനിധികളും പങ്കെടുത്തു.
ചില പ്രത്യേക ഫോൺ നമ്പറുകൾ കേന്ദ്രീകരിച്ച് ബോട്ടുകളും (Bots) വ്യാജ ഗ്രൂപ്പുകളും ഉപയോഗിച്ച് സംഘടിതമായിട്ടാണ് ഇത്തരം കുപ്രചരണങ്ങൾ നടക്കുന്നതെന്ന് ഇന്റലിജൻസ് റിപ്പോർട്ടുകൾ വ്യക്തമാക്കുന്നു. മെയ് 3 ലെ പരീക്ഷാ ചോർച്ചയെത്തുടർന്ന് 22 ലക്ഷത്തോളം വിദ്യാർത്ഥികളാണ് ഇപ്പോൾ പുനഃപരീക്ഷ എഴുതുന്നത്. പരീക്ഷാ ചോർച്ചയെക്കുറിച്ച് സിബിഐ അന്വേഷണം നടത്തിവരികയാണ്. നിലവിലെ പ്രതിസന്ധികൾ പരിഗണിച്ച്, പരീക്ഷാ സുരക്ഷ വർദ്ധിപ്പിക്കുന്നതിന്റെ ഭാഗമായി 2027 മുതൽ നീറ്റ് പരീക്ഷ കമ്പ്യൂട്ടർ അധിഷ്ഠിതമായി (CBT) നടത്താനും സർക്കാർ ആലോചിക്കുന്നുണ്ട്.
Read DhanamOnline in English
Subscribe to Dhanam Magazine
