ഡിജിറ്റല് തിരിച്ചറിയല് സംവിധാനത്തില് വലിയ മാറ്റം കൊണ്ടുവരുന്ന പുതിയ ആധാര് മൊബൈല് ആപ് സവിശേഷ തിരിച്ചറിയല് അതോറിട്ടിയായ യു.എ.ഡി.എ.ഐ (UIDAI) കഴിഞ്ഞ ദിവസം പുറത്തിറക്കി. പഴയ രീതിയില് ആധാര് കാര്ഡിന്റെ പകര്പ്പോ മുഴുവന് നമ്പറോ ഇനി പങ്കുവെക്കേണ്ട. സ്വകാര്യതയുടെ സംരക്ഷണവും ഉറപ്പാക്കാമെന്ന് അതോറിട്ടി വിശദീകരിക്കുന്നു.
ഓഫ്ലൈൻ ആധാര് വെരിഫിക്കേഷന്
ഇന്റര്നെറ്റ് കണക്ഷന് ഇല്ലാതെയും, ആധാര് നമ്പറോ ബയോമെട്രിക് വിവരങ്ങളോ പങ്കുവെക്കാതെയും തിരിച്ചറിയല് സ്ഥിരീകരിക്കാന് പുതിയ ആപ്പ് അനുവദിക്കുന്നു.
തെരഞ്ഞെടുത്ത വിവരങ്ങള് മാത്രം
ആവശ്യത്തിനനുസരിച്ച് പേര്, പ്രായം, ജനനത്തീയതി തുടങ്ങിയ പരിമിത വിവരങ്ങള് മാത്രം പങ്കുവെക്കാം. ഉദാഹരണത്തിന്, പ്രായ പരിശോധനയ്ക്കായി മുഴുവന് ആധാര് വിശദാംശങ്ങള് നല്കേണ്ടതില്ല.
ക്യു.ആര് കോഡ് പരിശോധന
യുപിഐ ക്യു.ആര് കോഡ് സ്കാന് ചെയ്യുന്നതുപോലെ, എന്ക്രിപ്റ്റഡ് QR കോഡ് ഉപയോഗിച്ച് ഉടന് തന്നെ ആധാര് സ്ഥിരീകരണം സാധ്യമാകും. ഇത് വേഗത്തിലും സുരക്ഷിതമായും ഐഡന്റിറ്റി പരിശോധന നടത്താന് സഹായിക്കുന്നു.
മൊബൈല് നമ്പര് അപ്ഡേറ്റ്
ആധാറുമായി ബന്ധിപ്പിച്ചിരിക്കുന്ന മൊബൈല് നമ്പര് നേരിട്ട് ആപ്പിലൂടെ പുതുക്കാം. ഇനി ആധാര് സേവാ കേന്ദ്രങ്ങളില് നേരിട്ട് പോകേണ്ടതില്ല.
മള്ട്ടി-പ്രൊഫൈല് സപ്പോര്ട്ട്
ഒരു മൊബൈല് ഫോണില് അഞ്ച് ആധാര് പ്രൊഫൈലുകള് വരെ കൈകാര്യം ചെയ്യാം. കുടുംബാംഗങ്ങളുടെ ആധാര് മാനേജ്മെന്റിന് ഇത് ഏറെ സഹായകരമാണ്.
കൂടുതല് സുരക്ഷാ സൗകര്യങ്ങള്
ബയോമെട്രിക് ലോക്ക്/അണ്ലോക്ക്, ഫേസ് ഐഡി പോലുള്ള അധിക സുരക്ഷാ സംവിധാനങ്ങളും പുതിയ ആപ്പില് ഉള്പ്പെടുത്തിയിട്ടുണ്ട്.
ഡൗണ്ലോഡ് സൗകര്യം
പുതിയ ആധാര് ആപ്പ് ഗൂഗ്ള് പ്ലേ സ്റ്റോറിലും ആപ്പിള് ആപ് സ്റ്റോറിലും ഡൗണ്ലോഡിന് ലഭ്യമാണ്.
ഇതുവരെ ഹോട്ടല് ചെക്ക്-ഇന് മുതല് വിവിധ സേവനങ്ങളിലേക്കുള്ള പ്രവേശനം വരെ മുഴുവന് ആധാര് നമ്പറോ കാര്ഡ് പകര്പ്പോ നല്കേണ്ട അവസ്ഥ സാധാരണമായിരുന്നു. പുതിയ ആപ്പിലൂടെ ആവശ്യമായ വിവരങ്ങള് മാത്രം, ഉപയോക്താവിന്റെ സമ്മതത്തോടെ നല്കുന്നു. ഓഫ്ലൈൻ പരിശോധനാ സൗകര്യമുള്ളതു കൊണ്ട് ഇന്റര്നെറ്റ് ലഭ്യത കുറവുള്ള പ്രദേശങ്ങളിലും ആധാര് സേവനങ്ങള് ഉപയോഗിക്കാന് വഴിയൊരുക്കുന്നു.
Read DhanamOnline in English
Subscribe to Dhanam Magazine
