ജിഎസ്ടി കുറവിന്റെ മെച്ചം ലഘുഭക്ഷണങ്ങളിലും ലഭിക്കും. നേരത്തെ ചുമത്തിയിരുന്ന 18 ശതമാനം സ്ലാബിൽ നിന്ന് ലഘുഭക്ഷണങ്ങളുടെ ജിഎസ്ടി 5 ശതമാനമെന്ന താഴ്ന്ന സ്ലാബിലേക്ക് മാറിയിരിക്കുകയാണ്. പഴംപൊരി, വട, അട, കൊഴുക്കട്ട തുടങ്ങിയ ലഘുഭക്ഷണങ്ങളുടെ വില ഇതുമൂലം കുറയും. മുമ്പ് 12 ശതമാനം സ്ലാബിൽ നികുതി ചുമത്തിയിരുന്ന മിക്സ്ചർ, വേഫറുകൾ (മധുരമുള്ള നേർത്ത ബിസ്ക്കറ്റ് തുടങ്ങിയ ഉൽപ്പന്നങ്ങള്) തുടങ്ങിയവയും 5 ശതമാനം സ്ലാബിലേക്ക് മാറിയിട്ടുണ്ട്. സെപ്റ്റംബര് 22 മുതലാണ് പരിഷ്കരിച്ച ജിഎസ്ടി നിരക്ക് പ്രാബല്യത്തില് വരുന്നത്.
ബേക്കറികളിൽ പഴംപൊരിയുടെ വിലയില് 10 ശതമാനത്തിന്റെ കുറവാണ് ഉണ്ടാകുക. വൻകിട ലഘുഭക്ഷണ നിർമ്മാതാക്കളും ബേക്കറികളും വില കുറയ്ക്കാൻ തത്വത്തിൽ ധാരണയായിട്ടുണ്ട്. ഏകദേശം 10 രൂപ വിലയുള്ള പഴംപൊരിക്ക് 1 രൂപയുടെ കുറവാണ് ഉണ്ടാകുക. എന്നാല് ജിഎസ്ടി കുറച്ചതിന്റെ നേട്ടം തങ്ങള്ക്ക് ലഭിക്കുന്നില്ലെന്ന ആശങ്കയും ബേക്കറി ഉടമകള് പങ്കുവെക്കുന്നുണ്ട്.
വനസ്പതി പോലുള്ള ഉല്പ്പന്നങ്ങള്ക്ക് 5 ശതമാനം നികുതി നൽകുകയും അതിനുള്ള ഇൻപുട്ട് ക്രെഡിറ്റ് നേടുകയും വേണം. കഴിഞ്ഞ കുറച്ച് മാസങ്ങളായി ബേക്കറി ഉല്പ്പന്നങ്ങളുടെ ഇൻപുട്ടുകളുടെ വിലയിലുണ്ടായ വർദ്ധനവ് അസാധാരണമാണെന്നും ഇവര് ചൂണ്ടിക്കാട്ടുന്നു.
പരമ്പരാഗത ലഘുഭക്ഷണങ്ങൾക്ക് വ്യത്യസ്ത നികുതി നിരക്ക് ചുമത്തിയിരുന്നത് നേരത്തെ ആശയക്കുഴപ്പത്തിന് ഇടയാക്കിയിരുന്നു. ഉദാഹരണമായി പഴംപൊരിക്ക് 18 ശതമാനവും ഉണ്ണിയപ്പത്തിന് 5 ശതമാനവുമായിരുന്നു നികുതി. പൊറോട്ട, റൊട്ടി തുടങ്ങിയവക്ക് 18 ശതമാനം നികുതി ചുമത്തിയിരുന്നു, അതേസമയം ബ്രെഡിനെ ഒഴിവാക്കിയിരുന്നു.
എല്ലാ ലഘുഭക്ഷണങ്ങൾക്കും രുചികരമായ ഭക്ഷണങ്ങൾക്കും 5 ശതമാനം നികുതി നിരക്ക് ഏർപ്പെടുത്തിയത് ആശയക്കുഴപ്പം ഒഴിവാക്കുന്നതാണ്. സെപ്റ്റംബർ 22 മുതൽ മിക്ക ബേക്കറികളിലും ഉൽപ്പന്നങ്ങൾ 7 മുതല് 10 ശതമാനം വരെ വിലക്കുറവിൽ ലഭ്യമാക്കുമെന്നാണ് കരുതുന്നത്.
GST rate cut brings price reduction to snacks like pazhampori, vada, mixture from September 22.
Read DhanamOnline in English
Subscribe to Dhanam Magazine
