സ്റ്റാര്ട്ടപ്പുകള്ക്ക് കടലോളം അവസരങ്ങളൊരുക്കുന്ന ഇന്ത്യയിലെ ഏറ്റവും വലിയ ബീച്ച് സൈഡ് സ്റ്റാര്ട്ടപ്പ് സംഗമമായ ഹഡില് ഗ്ലോബലിന്റെ ഏഴാം പതിപ്പിന് ഡിസംബറില് കോവളത്ത് തിരിതെളിയും. കേരള സ്റ്റാര്ട്ടപ്പ് മിഷന്റെ നേതൃത്വത്തില് ഡിസംബര് 11 മുതല് 13 വരെ ദി ലീല കോവളം, എ റാവിസ് ഹോട്ടലില് നടക്കുന്ന 'ഹഡില് ഗ്ലോബല് 2025' മുഖ്യമന്ത്രി പിണറായി വിജയന് ഉദ്ഘാടനം ചെയ്യും.
അത്യാധുനിക സാങ്കേതികവിദ്യാ ഉത്പന്നങ്ങളും ആശയങ്ങളും കൈമുതലായ സ്റ്റാര്ട്ടപ്പുകള്ക്ക് അപാര സാധ്യതകളാണ് ഹഡില് ഗ്ലോബല് മുന്നോട്ട് വെയ്ക്കുന്നത്. പ്രായഭേദമെന്യേ ആര്ക്കും ഭാഗമാകാം. 15ലധികം രാജ്യങ്ങളില് നിന്നായി ആയിരക്കണക്കിന് പ്രതിനിധികള് ഇത്തവണത്തെ ഹഡില് ഗ്ലോബലിന്റെ ഭാഗമാകും. ലോകമെമ്പാടുമുള്ള 200ലധികം നിക്ഷേപകരെത്തുന്ന സ്റ്റാര്ട്ടപ്പ് സംഗമത്തില് ഇന്ത്യയിലും വിദേശത്തുമുള്ള 6000ത്തിലധികം സ്റ്റാര്ട്ടപ്പുകള്, 100 ഏയ്ഞ്ചല് നിക്ഷേപകര്, നയരൂപകര്ത്താക്കള്, മെന്റര്മാര്, കോര്പറേറ്റുകള്, പ്രഭാഷകര് തുടങ്ങിയവര് പങ്കെടുക്കും. സ്റ്റാര്ട്ടപ്പുകള്ക്ക് നൂതനാശയങ്ങള് പ്രദര്ശിപ്പിക്കുന്നതിനും മൂലധനം സമാഹരിക്കുന്നതിനും പ്രഗത്ഭരായ വ്യവസായ സംരംഭകരുടെ മെന്റര്ഷിപ്പ് സ്വീകരിക്കുന്നതിനുമുള്ള വേദിയായി ഹഡില് ഗ്ലോബല് 2025 മാറുമെന്ന് സംഘാടകര് അറിയിച്ചു.
സ്റ്റാര്ട്ടപ്പുകളെ പിന്തുണയ്ക്കുന്നതിനായി മുന്കാല ഹഡില് ഗ്ലോബല് വേദികളില് അന്താരാഷ്ട്ര സ്ഥാപനങ്ങള്, ആഗോള നിക്ഷേപകര്, സര്ക്കാര് ഏജന്സികള് എന്നിവരുമായി ധാരണാപത്രം ഒപ്പിട്ടിരുന്നു. കേരളത്തിലെ സ്റ്റാര്ട്ടപ്പുകള്ക്ക് ബെല്ജിയം, ഓസ്ട്രേലിയ എന്നീ രാജ്യങ്ങളുമായുള്ള സഹകരണത്തിനും ഹഡില് ഗ്ലോബല് വഴിയൊരുക്കി. സ്റ്റേറ്റ് ബാങ്ക് ഓഫ് ഇന്ത്യ പോലുള്ള ഇന്ത്യയിലെ പ്രധാന സ്ഥാപനങ്ങളെയും സംസ്ഥാനത്തെ സ്റ്റാര്ട്ടപ്പ് ആവാസവ്യവസ്ഥയുടെ ഭാഗമാക്കാനായി.
നിര്മ്മിത ബുദ്ധി (എ.ഐ), ഫിന്ടെക്, ബ്ലോക്ക് ചെയിന്, ഹെല്ത്ത്ടെക്, ലൈഫ് സയന്സസ്, ഓഗ്മെന്റഡ്/വെര്ച്വല് റിയാലിറ്റി, സ്പേസ്ടെക്, ഇ-ഗവേണന്സ്, ഇന്റര്നെറ്റ് ഓഫ് തിംഗ്സ് എന്നിവയുള്പ്പെടെയുള്ള ഭാവി മേഖലകള്ക്കാണ് ഹഡില് ഗ്ലോബലില് പ്രാധാന്യം നല്കുന്നത്. ഈ മേഖലകളിലെ സ്റ്റാര്ട്ടപ്പുകള് മികച്ച ആശയങ്ങള് അവതരിപ്പിക്കും. ഇതുമായി ബന്ധപ്പെട്ട് നിക്ഷേപകരുമായുള്ള തത്സമയ ചര്ച്ചകള്, പൈലറ്റ് ഫണ്ടിംഗ്, ആഗോള വിപണി സാധ്യതകള് എന്നിവയെ കുറിച്ച് അറിയാനുള്ള അവസരവും ലഭ്യമാകും.
ഇന്വെസ്റ്റര് ഓപ്പണ് പിച്ചുകള്, ഫൗണ്ടേഴ്സ് മീറ്റ്, ഇംപാക്റ്റ് 50, പിച്ച് ഇറ്റ് റൈറ്റ്, സണ് ഡൗണ് ഹഡില്, റൗണ്ട്ടേബിളുകള് എന്നിങ്ങനെയുള്ള സെഷനുകള് ഇക്കൊല്ലത്തെ ഹഡില് ഗ്ലോബലില് ഉണ്ടാകും. പിച്ച് മത്സരങ്ങള്, സ്റ്റാര്ട്ടപ്പ് എക്സ്പോകള്, നിക്ഷേപക സംഗമങ്ങള്, ഫയര്സൈഡ് ചാറ്റുകള്, മാസ്റ്റര്ക്ലാസുകള്, ക്യൂറേറ്റഡ് നെറ്റ് വര്ക്കിംഗ് അനുഭവങ്ങള് എന്നിവയും സ്റ്റാര്ട്ടപ്പ് സംഗമത്തെ ആകര്ഷകമാക്കും.
Read DhanamOnline in English
Subscribe to Dhanam Magazine
