കേരള വ്യവസായ വകുപ്പിന്റേയും, കേന്ദ്ര എം.എസ്.എം.ഇ. മന്ത്രാലയത്തിന്റെയും സഹകരണത്തോടെ കേരള സ്റ്റേറ്റ് സ്മോള് ഇന്ഡസ്ട്രീസ് അസോസിയേഷനും, മെട്രോമാര്ട്ടും ചേര്ന്ന് സംഘടിപ്പിക്കുന്ന രണ്ടാമത് ഇന്ത്യ ഇന്റര്നാഷണല് ഇന്ഡസ്ട്രിയല് എക്സ്പോയും വ്യവസായി മഹാസംഗമവും 2026 ജനുവരി 16, 17, 18 തീയതികളില് കൊച്ചി അഡ്ലക്സ് ഇന്റര്നാഷണല് കണ്വെന്ഷന് സെന്ററില് നടക്കും. വ്യവസായി മഹാസംഗമം 17ന് മുഖ്യമന്ത്രി പിണറായി വിജയന് ഉദ്ഘാടനം ചെയ്യും. വ്യവസായ വകുപ്പ് മന്ത്രി പി. രാജീവ് മുഖ്യപ്രഭാഷണം നടത്തും.
ജനുവരി 16ന് എക്സ്പോയുടെ ഉദ്ഘാടനം ധനമന്ത്രി കെ എന് ബാലഗോപാല് നിര്വഹിക്കും. 18ന് നടക്കുന്ന സമാപന സമ്മേളനം കേന്ദ്ര സഹമന്ത്രി ജോര്ജ് കുര്യന് ഉദ്ഘാടനം ചെയ്യും.
കേരളത്തിന്റെ വ്യവസായ മേഖലയുടെ പുത്തന് ഉണര്വ് ലക്ഷ്യമിട്ട് സംഘടിപ്പിക്കുന്ന എക്സിബിഷനില് വിവിധ രാജ്യങ്ങളില് നിന്ന് ഉള്പ്പെടെ ഇതിനോടകം അറുന്നൂറോളം എക്സിബിറ്റേഴ്സും, ഇരുപതിനായിരത്തിലധികം ട്രേഡ് വിസിറ്റേഴ്സും രജിസ്റ്റര് ചെയ്തിട്ടുണ്ട്. കേരളത്തിലെ 14 ജില്ലകളില് നിന്നായി കെ.എസ്.എസ്.ഐ.എ അംഗങ്ങളായ പതിനായിരത്തിലധികം വ്യവസായികളും എക്സ്പോയുടെ ഭാഗമാകും.
ആധുനിക രീതിയിലുള്ള ഓട്ടോമാറ്റിക് മിഷനറികള്, എന്ജിനീയറിങ്, ഫുഡ്, കെമിക്കല്, പ്ലാസ്റ്റിക്, ഓയില്, ഗ്യാസ്, റബ്ബര്, കശുവണ്ടി, കാര്ഷിക അധിഷ്ഠിത ഉപകരണങ്ങള് തുടങ്ങി ഇന്ത്യയിലെ വിവിധ സംസ്ഥാനങ്ങളില് നിന്നും ചൈന, യു.കെ, യുഎഇ, ജര്മ്മനി, ദക്ഷിണകൊറിയ, ജപ്പാന് തുടങ്ങിയ രാജ്യങ്ങളില് നിന്നുമുള്ള അറുന്നൂറോളം പ്രമുഖ മെഷിനറി നിര്മ്മാതാക്കള്, അവരുടെ ഉത്പന്നങ്ങളും, നൂതന സാങ്കേതികവിദ്യകളും മേളയില് പ്രദര്ശിപ്പിക്കും.
കേരളത്തിലെ പൊതുമേഖലാ സ്ഥാപനങ്ങള്ക്കുള്ള പ്രത്യേക പവലിയന് മേളയുടെ പ്രധാന ആകര്ഷണമാണ്. പുതിയ വ്യവസായങ്ങള് തുടങ്ങാന് ആഗ്രഹിക്കുന്നവര്ക്ക് മെഷിനറി നിര്മ്മാതാക്കളുമായി ബന്ധപ്പെടുന്നതിനായി ഹെല്പ് ഡെസ്കുകള് സജജമാക്കും. വായ്പകള് എളുപ്പത്തില് ലഭ്യമാക്കാന് സഹായിക്കുന്നതിനായി വിവിധ ബാങ്കുകളുടെ ഹെല്പ്പ്ഡെസ്കുകളും ഉണ്ടാകും. കേന്ദ്ര എം.എസ്.എം.ഇ. മന്ത്രാലയത്തിന്റെ പ്രത്യേക സ്റ്റാളുകളും സജ്ജീകരിക്കും.
വ്യവസായങ്ങളെ ആഗോള വിപണിയിലേക്ക് വ്യാപിപ്പിക്കുന്നത് സംബന്ധിച്ചുള്ള സെമിനാറുകള്, ചര്ച്ചകള്, ബയര്-സെല്ലര് മീറ്റിംഗുകള്, വെണ്ടര് ഡെവലപ്മെന്റ് പ്രോഗ്രാമുകള് എന്നിവയും സംഘടിപ്പിക്കും.
വിവിധതരം റോബോട്ടുകള് സെന്സറുകള്, എ.ഐ. അനുബന്ധ മെഷിനറികള് എന്നിവയ്ക്കൊപ്പം, നിര്മ്മാണം, ഓട്ടോമൊബൈല്, ഉത്പാദനം, ഹോസ്പിറ്റാലിറ്റി, കാര്ഷികം തുടങ്ങിയ മേഖലകളില് ഉപയോഗിക്കാവുന്ന മെഷിനറികളുടെ പ്രദര്ശനം, കേരളത്തിന്റെ വ്യാവസായിക വളര്ച്ചയ്ക്ക് കരുത്തേകും. സംസ്ഥാനത്തിന്റെ വ്യവസായ ചരിത്രത്തിലെ ഏറ്റവും വലിയ എക്സിബിഷനായിരിക്കും ഇത്തവണത്തേതെന്ന് സംഘാടകര് പറഞ്ഞു.
രജിസ്ട്രേഷനും കൂടുതല് വിവരങ്ങള്ക്കുമായി www.iiie.in എന്ന വെബ്സൈറ്റ് സന്ദര്ശിക്കാം. ഫോണ് 9947733339, 9995139933,
കെ. എസ്. എസ്. ഐ. എ സംസ്ഥാന പ്രസിഡന്റ് എ. നിസാറുദ്ദീന്, ജനറല് സെക്രട്ടറി ജോസഫ് പൈകട, ട്രഷറര് ബി. ജയകൃഷ്ണന്, ഐ.ഐ.ഐ.ഇ ചെയര്മാന് കെ.പി. രാമചന്ദ്രന് നായര്, വൈസ് പ്രസിഡന്റുമാരായ എ.വി. സുനില്നാഥ്, പി.ജെ. ജോസ്, കെ.എസ്.എസ്.എഫ് ചെയര്മാനും മുന് പ്രസിഡന്റുമായ ഖാലിദ് എം, എക്സ്പോ സിഇഒ സിജി നായര്, ജോയിന്റ് സെക്രട്ടറിമാരായ എം.എം. മുജീബ് റഹിമാന്, കെ.വി അന്വര്, കെ.എസ്.എസ്.ഐ.എ ന്യൂസ് ചീഫ് എഡിറ്റര് എസ്. സലീം, എന്നിവര് കൊച്ചിയില് നടന്ന പത്രസമ്മേളനത്തില് പങ്കെടുത്തു.
Read DhanamOnline in English
Subscribe to Dhanam Magazine
