നാളെ മുതല്‍ റെയില്‍ ടിക്കറ്റ് നിരക്ക് വര്‍ധിക്കും, എന്നാല്‍ പഴയ നിരക്കില്‍ ചിലര്‍ക്കു മാത്രം യാത്ര ചെയ്യാം!

കഴിഞ്ഞ അഞ്ച് വർഷത്തിനിടെ രണ്ടാം ക്ലാസ് യാത്രാ നിരക്കുകളിൽ ആദ്യമായി വർദ്ധന വരുത്തുകയാണ് റെയില്‍വേ. 2025 ജൂലൈ 1 മുതൽ രണ്ടാം ക്ലാസ് യാത്രക്കാർക്ക് നിരക്ക് വർദ്ധനവ് റെയില്‍വേ നടപ്പിലാക്കും. ദീർഘദൂര യാത്രകൾക്ക് നിരക്ക് വർദ്ധനവ് ബാധകമാകും.

താഴെപ്പറയുന്ന രീതിയിലാണ് വര്‍ധന

• സെക്കൻഡ് ക്ലാസ് ഓർഡിനറി നിരക്ക്: 500 കിലോമീറ്ററിന് മുകളിലുള്ള യാത്രകൾക്ക് കിലോമീറ്ററിന് അര പൈസയുടെ വർദ്ധന.

• എയർ കണ്ടീഷൻ ചെയ്ത (എ.സി) ക്ലാസുകൾ: കിലോമീറ്ററിന് 2 പൈസയുടെ വർദ്ധനവ്.

• മെയിൽ/എക്സ്പ്രസ് ട്രെയിനുകൾ: കിലോമീറ്ററിന് ഒരു പൈസയുടെ വർദ്ധനവ്.

അതേസമയം ഇനിപ്പറയുന്നവയുടെ നിരക്കുകളിൽ മാറ്റമുണ്ടാകില്ല:

• പ്രതിമാസ സീസൺ ടിക്കറ്റുകൾ (എം.എസ്.ടി)

• സബർബൻ ട്രെയിൻ നിരക്കുകൾ

2025 ജൂലൈ 1 ന് മുമ്പ് ബുക്ക് ചെയ്ത ടിക്കറ്റുകൾക്ക് പുതുക്കിയ നിരക്ക് ഘടന ബാധകമാകില്ലെന്നും റെയിൽവേ വ്യക്തമാക്കി.

2020 ലും 2013 ലുമാണ് ഇതിനു മുമ്പ് പ്രധാനമായും നിരക്ക് പരിഷ്കരണം നടന്നത്. ഓർഡിനറി ട്രെയിനുകളുടെ രണ്ടാം ക്ലാസ് നിരക്ക് കിലോമീറ്ററിന് 2 പൈസയും മെയിൽ/എക്സ്പ്രസ് ട്രെയിനുകൾക്ക് 4 പൈസയും വർദ്ധിപ്പിച്ചിരുന്നു. സ്ലീപ്പർ ക്ലാസ് നിരക്ക് കിലോമീറ്ററിന് 6 പൈസയായിരുന്നു വർദ്ധിപ്പിച്ചത്.

നിലവിലെ നിരക്ക് വര്‍ധന കൊണ്ട് 1,500 കോടി രൂപയുടെ അധിക വരുമാനമാണ് പ്രതീക്ഷിക്കുന്നത്. റെയിൽവേ സ്റ്റേഷനുകളിലും ട്രെയിനുകളിലും യാത്രക്കാര്‍ക്ക് ആവശ്യമായ സേവനങ്ങളും സൗകര്യങ്ങളും വികസിപ്പിക്കാൻ ഇന്ത്യൻ റെയിൽവേയെ ഇത് സഹായിക്കും.

ജൂലൈ 1 മുതൽ ആധാർ അടിസ്ഥാനമാക്കിയുള്ള തത്കാൽ ബുക്കിംഗുകളും പ്രാബല്യത്തില്‍ വരും. തത്കാൽ ക്വാട്ടയിൽ ബുക്ക് ചെയ്യുന്ന യാത്രക്കാർ റിസർവേഷൻ സമയത്ത് അവരുടെ ആധാർ വിശദാംശങ്ങളും നൽകേണ്ടതുണ്ട്.

_{Indian Railways to hike second class and AC fares from July 1, aiming for ₹1,500 crore in additional revenue.}