കേരളം ഇന്ന് സമാനതകളില്ലാത്ത കാലാവസ്ഥാ വെല്ലുവിളികളെ നേരിട്ടുകൊണ്ടിരിക്കുകയാണ്. കഴിഞ്ഞ കുറച്ചു വർഷങ്ങളായി മഴയുടെ പാറ്റേണിൽ വന്നിട്ടുള്ള മാറ്റങ്ങൾ സംസ്ഥാനത്തിന്റെ കാർഷിക, സാമ്പത്തിക, സാമൂഹിക മേഖലകളെ ആഴത്തിൽ ബാധിച്ചിരിക്കുന്നു. നിലവിൽ നേരിടുന്ന മഴക്കുറവും വരാനിരിക്കുന്ന അതിതീവ്ര മഴയ്ക്കുള്ള സാധ്യതകളും ഒരു 'എൽ നിനോ' (El Niño) വർഷത്തിന്റെ ലക്ഷണങ്ങളാണെന്ന് വിദഗ്ധർ ചൂണ്ടിക്കാട്ടുന്നു.
പസഫിക് സമുദ്രത്തിലെ ഉപരിതല ജലം അസാധാരണമായി ചൂടാകുന്ന പ്രതിഭാസമാണ് എൽ നിനോ. സമുദ്രജലത്തിലെ താപനില സാധാരണയേക്കാൾ രണ്ട് ഡിഗ്രിയോ അതിലധികമോ വർദ്ധിക്കുമ്പോഴാണ് ഇതിനെ 'സൂപ്പർ എൽ നിനോ' എന്ന് വിളിക്കുന്നത്. അന്തരീക്ഷത്തിലെ വായുസഞ്ചാരത്തെയും മർദ്ദ വ്യതിയാനങ്ങളെയും ഇത് സങ്കീർണമായി ബാധിക്കുന്നു. 2026 ഒരു എൽ നിനോ വർഷമാണെന്നും ഇത് സൂപ്പർ എൽ നിനോ ആയി മാറാൻ 90 ശതമാനം സാധ്യതയുണ്ടെന്നും വിവിധ കാലാവസ്ഥാ മോഡലുകൾ പ്രവചിക്കുന്നതായി കൊച്ചിയിലെ കുസാറ്റ് (CUSAT) അഡ്വാൻസ്ഡ് സെന്റർ ഫോർ അറ്റ്മോസ്ഫെറിക് റഡാർ റിസർച്ചിലെ (ACARR) സയന്റിസ്റ്റും പ്രമുഖ കാലാവസ്ഥാ നിരീക്ഷകനുമായ ഡോ. എം.ജി. മനോജ് ധനം ഓണ്ലൈനോട് പറഞ്ഞു.
ഈ മാസം അവസാനത്തോടെയോ അടുത്ത മാസത്തോടെയോ സൂപ്പര് എല് നിനോ പ്രതിഭാസം രൂപപ്പെടുമോയെന്ന് അറിയാനാകുമെന്നും ഡോ. മനോജ് പറഞ്ഞു. സൂപ്പര് എല് നിനോ ആണെങ്കില് അതിന്റെ പ്രത്യാഘാതം ആഗോള തലത്തില് വളരെ തീവ്രവും ഭീകരവുമായിരിക്കും. ഇത് മഴയുടെ അളവിനേക്കാൾ ഉപരി മഴ പെയ്യുന്ന രീതിയെയാണ് കാര്യമായി ബാധിക്കുന്നത്.
സാധാരണ ലഭിക്കേണ്ട മിതമായ മഴയ്ക്ക് പകരം, ദിവസങ്ങളോളം പെയ്യാതിരിക്കുകയും പിന്നീട് കുറഞ്ഞ സമയത്തിനുള്ളിൽ അതിതീവ്രമായി പെയ്യുകയും ചെയ്യുന്ന രീതിയാണിപ്പോൾ കണ്ടുവരുന്നത്.
മേഘവിസ്ഫോടനത്തിന് (Cloudburst) സമാനമായ ഇത്തരത്തിലുള്ള അതിതീവ്ര മഴയാണ് വയനാട്, റാന്നി, ആറന്മുള തുടങ്ങിയ സ്ഥലങ്ങളിൽ മിന്നൽ പ്രളയങ്ങൾക്കും ഉരുൾപൊട്ടലുകൾക്കും കാരണമാകുന്നത്. സാധാരണ എൽ നിനോ വർഷങ്ങളിൽ മഴയിൽ 15 മുതൽ 20 ശതമാനം വരെ കുറവ് അനുഭവപ്പെടാറുണ്ടെങ്കിലും, ലഭിക്കുന്ന മഴയുടെ തീവ്രത നാശനഷ്ടങ്ങൾ വർദ്ധിപ്പിക്കുന്നു.
പ്രളയവും പ്രകൃതിക്ഷോഭങ്ങളും അടക്കമുളള കാലാവസ്ഥ വ്യതിയാനങ്ങള് കേരളത്തിന്റെ സാമ്പത്തിക വ്യവസ്ഥയ്ക്ക് ഏൽപ്പിക്കുന്ന ആഘാതം ഭീമമാണ്. 2018-ലെ പ്രളയം മാത്രം കേരളത്തിന്റെ ജി.ഡി.പിയിൽ ഏകദേശം 35,000 കോടി രൂപയുടെ നേരിട്ടുള്ള നഷ്ടം ഉണ്ടാക്കിയതായി പഠനങ്ങൾ സൂചിപ്പിക്കുന്നു. എന്നാൽ പരോക്ഷമായ നഷ്ടങ്ങൾ കൂടി കണക്കിലെടുത്താൽ ഇത് ഒരു ലക്ഷം കോടി രൂപയിലധികം വരും. ജനങ്ങളുടെ തൊഴിൽ നഷ്ടം, ആരോഗ്യ പ്രശ്നങ്ങൾ, മാനസിക ആഘാതം (മെന്റൽ ട്രോമ) എന്നിവയെല്ലാം ഇതിൽ ഉൾപ്പെടുന്നു. ഒരു പ്രളയം സംസ്ഥാനത്തിന്റെ ജി.ഡി.പിയുടെ ഏകദേശം 30 ശതമാനത്തോളം കവർന്നെടുക്കുന്നത് വികസന പ്രവർത്തനങ്ങളെ വർഷങ്ങളോളം പിന്നോട്ടടിക്കുന്നു. റീബിൽഡ് കേരള പോലുള്ള പദ്ധതികൾക്കായി ബജറ്റിൽ വലിയ തുക മാറ്റി വയ്ക്കേണ്ടി വരുന്നത് മറ്റ് ജനക്ഷേമ പ്രവർത്തനങ്ങളെ ബാധിക്കും.
മഴയുടെ ഈ വ്യതിയാനം കേരളത്തിലെ മിക്കവാറും എല്ലാ മേഖലകളെയും ബാധിക്കുന്നുണ്ട്:
കൃഷി: മഴക്കുറവ് മൂലം (20 ശതമാനത്തില് കൂടുതലാണ് ഈ മണ്സൂണ് സീസണിലെ മഴക്കുറവ്) വിളകൾ കരിഞ്ഞുപോകുന്നതും അതിതീവ്ര മഴയിൽ കൃഷി നശിക്കുന്നതും ഭക്ഷ്യ സുരക്ഷയെ ബാധിക്കുകയും വിലക്കയറ്റത്തിന് (Inflation) കാരണമാവുകയും ചെയ്യുന്നു.
ഊർജം: ഡാമുകളിൽ വെള്ളം കുറയുന്നത് ജലവൈദ്യുത പദ്ധതികളെയും വൈദ്യുതി ഉൽപ്പാദനത്തെയും ബാധിക്കുന്നു.
ആരോഗ്യം: പുതിയ തരം വൈറസുകളുടെ വ്യാപനം, പലതരം പനികൾ, കാലാവസ്ഥാ മാറ്റം മൂലമുണ്ടാകുന്ന അണുബാധകൾ എന്നിവ ആരോഗ്യ മേഖലയ്ക്ക് വലിയ വെല്ലുവിളിയാണ്.
ബയോഡൈവേഴ്സിറ്റി: പ്രളയത്തിൽ ഫലഭൂയിഷ്ഠമായ മേൽമണ്ണ് ഒലിച്ചുപോകുന്നത് ഗ്രൗണ്ട് വാട്ടർ റീചാർജിനെ ബാധിക്കുകയും വേനലിൽ കടുത്ത വരൾച്ചയ്ക്ക് കാരണമാവുകയും ചെയ്യുന്നു. ഇത് പരിഹരിക്കാനാകാത്ത ജൈവവൈവിധ്യ നഷ്ടമാണ് ഉണ്ടാക്കുന്നതെന്നും ഡോ. എം.ജി. മനോജ് പറഞ്ഞു.
ഇൻഷുറൻസ്: വന്യമായ കാലാവസ്ഥാ വ്യതിയാനം മൂലം കാർഷിക, ഭവന ഇൻഷുറൻസ് മേഖലകളിൽ കമ്പനികൾക്ക് വലിയ നഷ്ടമുണ്ടാകുന്നു.
കുടിവെള്ളം, ജലവൈദ്യുത നിലയങ്ങളുടെ പ്രവര്ത്തനം, ജലസേചനം, കാലാവസ്ഥാ വ്യതിയാനങ്ങൾക്ക് വിധേയമായ വ്യവസായങ്ങള് തുടങ്ങിയ വിവിധ മേഖലകളെ മഴക്കുറവ് വലിയ തോതിലാണ് ബാധിക്കുക. പ്രത്യക്ഷമായോ പരോക്ഷമായോ ജീവിതത്തിന്റെ എല്ലാ മേഖലകളെയും കാലാവസ്ഥ എന്ന പ്രതിഭാസം സ്വാധീനിക്കുന്നു.
പ്രകൃതി പ്രതിഭാസങ്ങളെ (മഴക്കുറവും പ്രളയവും) നമുക്ക് തടയാൻ കഴിയില്ലെങ്കിലും അവയെ ശാസ്ത്രീയമായി മാനേജ് ചെയ്യാൻ സാധിക്കും. അതിനായി താഴെ പറയുന്ന കാര്യങ്ങളിൽ ശ്രദ്ധ കേന്ദ്രീകരിക്കണം:
ജലസംരക്ഷണം: മുറ്റത്ത് ടൈലുകളും കോൺക്രീറ്റും പാകുന്നത് പരമാവധി കുറച്ച് മഴവെള്ളം മണ്ണിലേക്ക് ഇറങ്ങാൻ അനുവദിക്കുക. വാഹനങ്ങൾ പോകുന്ന വഴിയിൽ മാത്രം ടൈലുകൾ പാകുന്നത് ഒരു പോംവഴിയാണ്.
റൂഫ് ടോപ്പ് ഹാർവെസ്റ്റിംഗ്: വീടിന്റെ മുകളിൽ വീഴുന്ന വെള്ളം റോഡിലേക്ക് ഒഴുക്കി വിടാതെ ഭൂമിയിലേക്ക് ഇറക്കി വിടുകയോ സംഭരിക്കുകയോ ചെയ്യുക.
തണ്ണീർത്തട സംരക്ഷണം: വയലുകളും തണ്ണീർത്തടങ്ങളും നികത്തുന്നത് ഒഴിവാക്കണം. ഇവ പ്രകൃതിദത്തമായ 'ഫ്ലഡ് പ്ലെയിനുകളായി' പ്രവർത്തിച്ച് പ്രളയസാധ്യത കുറയ്ക്കുന്നു.
മഴക്കുഴികൾ: മഴ കുറവുള്ള പ്രദേശങ്ങളിൽ മഴക്കുഴികൾ നിർമ്മിച്ച് ഭൂഗർഭ ജലനിരപ്പ് ഉയർത്താൻ ശ്രമിക്കണം.
മാലിന്യ നിർമ്മാർജ്ജനം: ജലാശയങ്ങളിൽ മാലിന്യം തള്ളുന്നത് ഒഴിവാക്കി അവ വൃത്തിയായി സൂക്ഷിക്കുന്നത് വെള്ളത്തിന്റെ സുഗമമായ ഒഴുക്കിനും ശേഖരണത്തിനും സഹായിക്കും.
കാലാവസ്ഥാ വ്യതിയാനം ഒരു യാഥാർത്ഥ്യമായി മാറിക്കഴിഞ്ഞ സാഹചര്യത്തിൽ, വ്യക്തിപരമായ മാറ്റങ്ങളും കൃത്യമായ സർക്കാർ നയങ്ങളും (Policy Interventions) ഒത്തുചേർന്നാൽ മാത്രമേ നമുക്ക് ഈ പ്രതിസന്ധികളെ അതിജീവിക്കാൻ സാധിക്കൂ. ഓരോ വ്യക്തിയും തന്റെ ജീവിതശൈലിയിൽ വരുത്തുന്ന മാറ്റങ്ങൾ വലിയൊരു പരിസ്ഥിതി സംരക്ഷണത്തിന് തുടക്കമിടുമെന്ന കാര്യം ഓര്ക്കുക.
Read DhanamOnline in English
Subscribe to Dhanam Magazine
