കേരളത്തില് മാറ്റമില്ലാതെ സ്വര്ണവില. ഗ്രാമിന് 8,755 രൂപയും പവന് 70,040 രൂപയുമാണ് ഇന്നത്തെ വില. റെക്കോഡ് വിലയായ 74,320 രൂപയിലെത്തിയ ശേഷമാണ് തിരിച്ചിറക്കം. കനം കുറഞ്ഞ ആഭരണങ്ങള് നിര്മിക്കാന് ഉപയോഗിക്കുന്ന 18 കാരറ്റ് സ്വര്ണത്തിന് ഗ്രാമിന് 7,185 രൂപയാണ് വില. വെള്ളി വില ഗ്രാമിന് 109 രൂപക്കാണ് വ്യാപാരം.
ആഗോള വ്യാപാര തര്ക്കങ്ങളും യുദ്ധങ്ങളും കാരണം കഴിഞ്ഞ കുറച്ച് കാലമായി സ്വര്ണവില മുകളിലേക്ക് കുതിക്കുകയാണ്. കേന്ദ്രബാങ്കുകള് കൂടുതല് സ്വര്ണം വാങ്ങാന് തുടങ്ങിയതും വിലയെ സ്വാധീനിച്ചു. കഴിഞ്ഞ മാസം അന്താരാഷ്ട്ര വിപണിയില് ഔണ്സിന് 3,500 ഡോളറിന് മുകളിലെത്തിയ സ്വര്ണം എല്ലാ പ്രവചനങ്ങളെയും കാറ്റില്പ്പറത്തി. എന്നാല് പിന്നീട് സ്വര്ണവില താഴേക്ക് വരുന്നതാണ് കണ്ടത്. റെക്കോഡ് വിലയില് നിന്നും 250 ഡോളറാണ് കുറച്ച് ദിവസങ്ങള്ക്കിടെ കുറഞ്ഞത്. ആഗോള വ്യാപാര തര്ക്കങ്ങള്ക്ക് അയവുവന്നതാണ് പ്രധാന കാരണം. ഇതോടെ സ്വര്ണവിലയില് എന്താണ് സംഭവിക്കുന്നതെന്ന കാര്യത്തില് ആശങ്കകളും ശക്തമായി.
നിലവിലെ സാഹചര്യത്തില് സ്വര്ണവില അധികം കൂടാനുള്ള സാഹചര്യമില്ലെന്നാണ് വിദഗ്ധര് പറയുന്നത്. എന്നാല് ജൂണില് നടക്കുന്ന രണ്ട് സംഭവങ്ങള് സ്വര്ണ വിലയില് കാര്യമായ സ്വാധീനമുണ്ടാക്കിയേക്കാം. പ്രതികാര തീരുവയില് ട്രംപ് അനുവദിച്ച 90 ദിവസത്തെ അവധി ജൂണ് ഒമ്പതിന് അവസാനിക്കും. ജൂണ് 17-18 തീയതികളില് യു.എസ് ഫെഡറല് റിസര്വ് യോഗം ചേരുന്നുണ്ട്. ഈ യോഗത്തില് പലിശ നിരക്കുകളില് മാറ്റം വരുത്താനുള്ള തീരുമാനമുണ്ടാകുമെന്നാണ് കരുതുന്നത്. ഈ രണ്ട് സംഭവങ്ങളും സ്വര്ണ വിലയെ സ്വാധീനിക്കുമെന്നാണ് വിദഗ്ധര് പറയുന്നത്.
ഇന്ന് ഒരുപവന് സ്വര്ണത്തിന്റെ വില 70,040 രൂപയാണെങ്കിലും ആഭരണ രൂപത്തില് ഇതേ തൂക്കത്തില് സ്വര്ണം വാങ്ങാന് കൂടുതല് പണം കൊടുക്കണം. ഇന്നത്തെ വിലക്കൊപ്പം ഏറ്റവും കുറഞ്ഞത് അഞ്ച് ശതമാനം പണിക്കൂലി, സ്വര്ണത്തിലും പണിക്കൂലിക്കും മൂന്ന് ശതമാനം നികുതി, 45 രൂപ ഹാള്മാര്ക്ക് ചാര്ജ്, അതിന് 18 ശതമാനം നികുതി എന്നിവയും ചേര്ത്ത് കൃത്യമായി പറഞ്ഞാല് 75,801 രൂപയെങ്കിലും വേണം. ആഭരണങ്ങളുടെ ഡിസൈന് അനുസരിച്ച് പണിക്കൂലിയിലും സ്വര്ണ വിലയിലും വ്യത്യാസമുണ്ടാകുമെന്ന് കൂടി മറക്കരുത്.
Read DhanamOnline in English
Subscribe to Dhanam Magazine
