മഹാത്മാഗാന്ധി തൊഴിലുറപ്പ് നിയമം പിൻവലിക്കുന്നു, പകരം പുതിയ തൊഴിൽ നിയമവുമായി മോദി സർക്കാർ

മഹാത്മാഗാന്ധി ദേശീയ ഗ്രാമീണ തൊഴിലുറപ്പ് നിയമം (MGNREGA) റദ്ദാക്കി പകരം വികസിത് ഭാരത്–ഗാരൻ്റി ഫോർ റോസ്‌ഗർ ആൻഡ് ആജീവക മിഷൻ (ഗ്രാമിൻ) (Viksit Bharat-Guarantee for Rozgar and Ajeevika Mission, VB-G RAM G) ബിൽ, 2025 എന്ന പുതിയ ഗ്രാമീണ തൊഴിൽ നിയമം കൊണ്ടുവരാനുള്ള കരട് ബിൽ ലോക്സഭാ അംഗങ്ങൾക്കിടയിൽ വിതരണം ചെയ്ത് കേന്ദ്രം. പ്രതിരോധശേഷിയുള്ള ഗ്രാമീണ ഭാരതം കെട്ടിപ്പടുക്കുന്നതിനായി 'ശാക്തീകരണം, സംയോജനം, പരിപൂർണത' എന്നിവ പ്രോത്സാഹിപ്പിക്കാനാണ് പുതിയ ബിൽ ലക്ഷ്യമിടുന്നതെന്ന് ദി ഇന്ത്യൻ എക്സ്പ്രസ് റിപ്പോർട്ട് ചെയ്യുന്നു.

പുതിയ ബില്ലിലെ പ്രധാന നിർദ്ദേശങ്ങൾ

1. ഉറപ്പായ പ്രവൃത്തി ദിനങ്ങളുടെ വർദ്ധന: നിലവിലെ MGNREGA പ്രകാരം ഫലത്തിൽ 100 ദിവസമായി നിജപ്പെടുത്തിയിട്ടുള്ള തൊഴിൽ ഉറപ്പ്, പുതിയ ബിൽ പ്രകാരം ഗ്രാമീണ കുടുംബങ്ങൾക്ക് ഒരു സാമ്പത്തിക വർഷത്തിൽ 125 ദിവസത്തെ വേതന തൊഴിലായി വർദ്ധിപ്പിക്കാൻ നിർദ്ദേശിക്കുന്നു.

2. കേന്ദ്ര-സംസ്ഥാന വിഹിതം: നിലവിൽ അവിദഗ്ദ്ധ തൊഴിലാളികളുടെ വേതനം പൂർണമായും കേന്ദ്രം വഹിക്കുന്നതിൽ നിന്ന് മാറി, VB-G RAM G ബിൽ പ്രകാരം വേതന പേയ്‌മെൻ്റുകൾക്കായി കേന്ദ്രവും സംസ്ഥാനങ്ങളും തമ്മിൽ ഫണ്ട് പങ്കാളിത്തം കൊണ്ടുവരുന്നു. വടക്കുകിഴക്കൻ, ഹിമാലയൻ സംസ്ഥാനങ്ങൾക്കും ചില കേന്ദ്രഭരണ പ്രദേശങ്ങൾക്കും (ഉത്തരാഖണ്ഡ്, ഹിമാചൽ പ്രദേശ്, ജമ്മു കശ്മീർ) ഇത് 90:10 എന്ന അനുപാതത്തിലും മറ്റ് സംസ്ഥാനങ്ങളിലും നിയമസഭകളുള്ള കേന്ദ്രഭരണ പ്രദേശങ്ങളിലും 60:40 എന്ന അനുപാതത്തിലുമായിരിക്കും.

3. ലേബർ ബഡ്ജറ്റിന് പകരം 'നോർമേറ്റീവ് അലോക്കേഷൻ': നിലവിലെ ഡിമാൻഡ് അടിസ്ഥാനമാക്കിയുള്ള 'ലേബർ ബഡ്ജറ്റിന്' പകരം, കേന്ദ്രം വസ്തുനിഷ്ഠമായ മാനദണ്ഡങ്ങൾ അനുസരിച്ച് സംസ്ഥാനാടിസ്ഥാനത്തിൽ 'നോർമേറ്റീവ് അലോക്കേഷൻ' (ചെലവ് വിഹിതം) തീരുമാനിക്കും. ഈ വിഹിതത്തിന് അപ്പുറമുള്ള അധിക ചെലവുകൾ സംസ്ഥാന സർക്കാർ തന്നെ വഹിക്കണം.

4. 60 ദിവസത്തെ 'കൃഷി ഇടവേള': ആദ്യമായി, പ്രധാന കാർഷിക സീസണുകളിൽ (വിത്ത് വിതയ്ക്കലും വിളവെടുപ്പും) കാർഷിക തൊഴിലാളികളുടെ ലഭ്യത ഉറപ്പാക്കുന്നതിനായി 60 ദിവസം തൊഴിൽ ഉറപ്പ് പദ്ധതി താൽക്കാലികമായി നിർത്തിവയ്ക്കാനും ബിൽ നിർദ്ദേശിക്കുന്നു. കാർഷിക-കാലാവസ്ഥാ മേഖലകൾ അനുസരിച്ച് സംസ്ഥാനങ്ങൾക്ക് ഈ 60 ദിവസത്തെ കാലയളവ് മുൻകൂട്ടി അറിയിക്കാം.

5. വേതന വിതരണം: വേതനം പ്രതിവാര അടിസ്ഥാനത്തിലോ, അല്ലെങ്കിൽ ജോലി ചെയ്ത് പരമാവധി രണ്ടാഴ്ചയ്ക്കുള്ളിലോ നൽകണമെന്ന് ബിൽ വിഭാവനം ചെയ്യുന്നതായും റിപ്പോര്‍ട്ടില്‍ പറയുന്നു. വൈകിയ പേയ്‌മെൻ്റുകൾക്ക് നഷ്ടപരിഹാരം നൽകാനുള്ള വ്യവസ്ഥകൾ നിലനിർത്തുന്നുണ്ട്.

_{MGNREGA to be replaced with VB-G RAM G Bill proposing major employment guarantee reforms in rural India.}