നിങ്ങളുടെ ജോലി സുരക്ഷിതമാണോ? 2026ല് എഐ കവര്ന്നെടുത്തേക്കാവുന്ന 40 തൊഴിലുകളുടെ പട്ടിക പുറത്തുവിട്ട് മൈക്രോസോഫ്റ്റ്
പുതുവര്ഷത്തിലേക്ക് രാജ്യം ചുവടുവെക്കുമ്പോള് തൊഴില് വിപണിയില് ആശങ്ക പടര്ത്തി മൈക്രോസോഫ്റ്റിന്റെ (Microsoft) പുതിയ പഠന റിപ്പോര്ട്ട്. 2026-ഓടെ ആര്ട്ടിഫിഷ്യല് ഇന്റലിജന്സ് (AI) വലിയ തോതില് സ്വാധീനിക്കാന് സാധ്യതയുള്ള 40 തൊഴിലുകളുടെ പട്ടികയാണ് കമ്പനി പുറത്തുവിട്ടിരിക്കുന്നത്.
ഭാഷ, വിശകലനം, വിവരശേഖരണം എന്നിവയുമായി ബന്ധപ്പെട്ട ജോലികളാണ് എഐയുടെ കടന്നുകയറ്റത്തില് ഏറ്റവും കൂടുതല് ഭീഷണി നേരിടുന്നത്. മൈക്രോസോഫ്റ്റിന്റെ എഐ ചാറ്റ്ബോട്ടായ 'കോപൈലറ്റുമായി' (Copilot) നടന്ന രണ്ടുലക്ഷത്തിലധികം യഥാര്ത്ഥ സംഭാഷണങ്ങള് വിശകലനം ചെയ്താണ് ഈ റിപ്പോര്ട്ട് തയ്യാറാക്കിയിരിക്കുന്നത്. ഓരോ ജോലിയും എഐക്ക് എത്രത്തോളം കൃത്യമായി ചെയ്യാന് സാധിക്കും എന്ന് അളക്കുന്ന 'എഐ ആപ്ലിക്കബിലിറ്റി സ്കോര്' (AI Applicability Score) അടിസ്ഥാനമാക്കിയാണ് തൊഴിലുകളെ തരംതിരിച്ചിരിക്കുന്നത്.
പൂര്ണമായും ഇല്ലാതാകുമോ?
എഐയുടെ ഗോഡ് ഫാദര് എന്നറിയപ്പെടുന്ന ജഫ്രി ഹിന്റണും മൈക്രോസോഫ്റ്റ് സിഇഒ സത്യ നദെല്ലയും മുന്പ് സൂചിപ്പിച്ചതുപോലെ, തൊഴില് വിപണിയില് എഐ വലിയ മാറ്റങ്ങള് കൊണ്ടുവരുമെന്ന സൂചനയാണ് ഈ റിപ്പോര്ട്ടും നല്കുന്നത്. ഭാഷാപരമായ കഴിവുകള് ആവശ്യമായ ജോലികളില് എഐ ഇതിനോടകം തന്നെ മനുഷ്യരേക്കാള് വേഗത്തില് കാര്യങ്ങള് ചെയ്തു തുടങ്ങിയിട്ടുണ്ട്.
എന്നാല്, ഈ ജോലികള് പൂര്ണമായും ഇല്ലാതാകുമെന്നല്ല ഇതിനര്ത്ഥം. മറിച്ച്, ഈ മേഖലകളില് പ്രവര്ത്തിക്കുന്നവര് എഐ സാങ്കേതികവിദ്യ കൂടി സ്വായത്തമാക്കി തങ്ങളുടെ തൊഴില് രീതികളില് മാറ്റം വരുത്തേണ്ടി വരും. മാനുഷികമായ ഇടപെടലുകളും സര്ഗാത്മകതയും ആവശ്യമുള്ള ജോലികള്ക്ക് എഐ യുഗത്തിലും പ്രസക്തിയുണ്ടാകുമെന്നും ഗവേഷകര് ചൂണ്ടിക്കാട്ടുന്നു.
നിങ്ങള് ഈ പട്ടികയിലുള്ള ഏതെങ്കിലും ജോലി ചെയ്യുന്നവരാണെങ്കില്, പുതിയ എഐ ടൂളുകള് പഠിക്കാനും അവ നിങ്ങളുടെ തൊഴിലിന്റെ ഭാഗമാക്കാനും ശ്രമിക്കുന്നത് കരിയര് സുരക്ഷിതമാക്കാന് സഹായിക്കും.
ഭീഷണി ഈ തൊഴിലുകള്ക്ക്
പട്ടികയില് ഉള്പ്പെട്ടിട്ടുള്ള മേഖലകള് ഇവയാണ്:
ഭാഷാ പരിഭാഷകർ (Interpreters and Translators)
ചരിത്രകാരന്മാർ (Historians)
യാത്രാ സഹായികൾ/അറ്റൻഡന്റുമാർ (Passenger Attendants)
സേവന മേഖലയിലെ സെയിൽസ് പ്രതിനിധികൾ (Sales Representatives of Services)
എഴുത്തുകാരും ഗ്രന്ഥകർത്താക്കളും (Writers and Authors)
കസ്റ്റമർ സർവീസ് പ്രതിനിധികൾ (Customer Service Representatives)
സിഎൻസി ടൂൾ പ്രോഗ്രാമർമാർ (CNC Tool Programmers)
ടെലിഫോൺ ഓപ്പറേറ്റർമാർ (Telephone Operators)
ടിക്കറ്റ് ഏജന്റുമാരും ട്രാവൽ ക്ലർക്കുമാരും (Ticket Agents and Travel Clerks)
ബ്രോഡ്കാസ്റ്റ് അനൗൺസർമാരും റേഡിയോ ഡിജെകളും (Broadcast Announcers and Radio DJs)
ബ്രോക്കറേജ് ക്ലർക്കുമാർ (Brokerage Clerks)
ഫാം ആൻഡ് ഹോം മാനേജ്മെന്റ് അധ്യാപകർ (Farm and Home Management Educators)
ടെലിമാർക്കറ്റർമാർ (Telemarketers)
കോൺസിയർജ്/സഹായികൾ (Concierges)
പൊളിറ്റിക്കൽ സയന്റിസ്റ്റുകൾ (Political Scientists)
വാർത്താ വിശകലന വിദഗ്ധരും റിപ്പോർട്ടർമാരും (News Analysts, Reporters, and Journalists)
ഗണിതശാസ്ത്രജ്ഞർ (Mathematicians)
സാങ്കേതിക എഴുത്തുകാർ (Technical Writers)
പ്രൂഫ് റീഡർമാർ (Proofreaders and Copy Markers)
ഹോസ്റ്റുമാരും ഹോസ്റ്റസ്സുമാരും (Hosts and Hostesses)
എഡിറ്റർമാർ (Editors)
ബിസിനസ് അധ്യാപകർ - കോളേജ് തലം (Business Teachers, Postsecondary)
പിആർ സ്പെഷ്യലിസ്റ്റുകൾ (Public Relations Specialists)
ഡെമോൺസ്ട്രേറ്റർമാരും ഉൽപ്പന്ന പ്രചാരകരും (Demonstrators and Product Promoters)
അഡ്വർടൈസിംഗ് സെയിൽസ് ഏജന്റുമാർ (Advertising Sales Agents)
ന്യൂ അക്കൗണ്ട്സ് ക്ലർക്കുമാർ (New Accounts Clerks)
സ്റ്റാറ്റിസ്റ്റിക്കൽ അസിസ്റ്റന്റുമാർ (Statistical Assistants)
കൗണ്ടർ ആൻഡ് റെന്റൽ ക്ലർക്കുമാർ (Counter and Rental Clerks)
ഡാറ്റാ സയന്റിസ്റ്റുകൾ (Data Scientists)
പേഴ്സണൽ ഫിനാൻഷ്യൽ അഡ്വൈസർമാർ (Personal Financial Advisors)
ആർക്കൈവിസ്റ്റുകൾ (Archivists)
ഇക്കണോമിക്സ് അധ്യാപകർ - കോളേജ് തലം (Economics Teachers, Postsecondary)
വെബ് ഡെവലപ്പർമാർ (Web Developers)
മാനേജ്മെന്റ് അനലിസ്റ്റുകൾ (Management Analysts)
ഭൂമിശാസ്ത്രജ്ഞർ (Geographers)
മോഡലുകൾ (Models)
മാർക്കറ്റ് റിസർച്ച് അനലിസ്റ്റുകൾ (Market Research Analysts)
പബ്ലിക് സേഫ്റ്റി ടെലികമ്മ്യൂണിക്കേറ്റർമാർ (Public Safety Telecommunicators)
സ്വിച്ച് ബോർഡ് ഓപ്പറേറ്റർമാർ (Switchboard Operators)
ലൈബ്രറി സയൻസ് അധ്യാപകർ - കോളേജ് തലം (Library Science Teachers, Postsecondary)
ഈ ജോലികൾ ചെയ്യുന്നവർക്ക് കമ്പ്യൂട്ടറുകളുടെ സഹായത്തോടെ തങ്ങളുടെ തൊഴിൽ കൂടുതൽ വേഗത്തിലും കൃത്യതയോടെയും ചെയ്യാൻ സാധിക്കും എന്നതാണ് ഇതിന്റെ മറ്റൊരു വശം. തൊഴിൽ നഷ്ടപ്പെടുന്നതിനേക്കാൾ, തൊഴിൽ രീതി മാറുന്നു എന്നതാകും 2026-ലെ സാഹചര്യം.
Microsoft report lists 40 jobs at risk from AI by 2026, with language and data analysis roles most affected
Read DhanamOnline in English
Subscribe to Dhanam Magazine
