കേരളത്തിൻ്റെ സ്വപ്ന പദ്ധതികളിൽ ഒന്നായ ദേശീയപാത 66-ൻ്റെ (NH-66) വീതികൂട്ടൽ പ്രവർത്തനം സംസ്ഥാനത്തിൻ്റെ വടക്കന് ജില്ലകളില് അതിവേഗം പുരോഗമിക്കുന്നു. അതേസമയം ആലപ്പുഴ, തിരുവനന്തപുരം തുടങ്ങിയ തെക്കൻ ഭാഗങ്ങളിലെ പണികൾ ഇഴഞ്ഞുനീങ്ങുകയാണ്. ആറ് വരി ദേശീയപാതയുടെ പണികള് പൂര്ത്തിയാകുമ്പോള് വാഹനങ്ങള്ക്ക് വളരെ വേഗത്തില് ലക്ഷ്യ സ്ഥാനത്ത് എത്താന് സാധിക്കും.
220 കിലോമീറ്റർ ദൈർഘ്യമുള്ള എറണാകുളം-തിരുവനന്തപുരം പാത രണ്ടര മണിക്കൂർ കൊണ്ട് വാഹനങ്ങള്ക്ക് പിന്നിടാന് സാധിക്കുമെന്നാണ് കരുതുന്നത്. പാതയിലൂടെ മണിക്കൂറിൽ 100 കിലോമീറ്റര് വേഗതയില് വാഹനങ്ങള്ക്ക് സഞ്ചരിക്കാന് സാധിക്കും. തിരുവനന്തപുരത്ത് നിന്ന് കാസർഗോഡ് വരെ ട്രാഫിക് സിഗ്നലുകളും വലത് വശത്തേക്കുളള തിരിവുകളും പരമാവധി ഒഴിവാക്കുന്ന തരത്തിലാണ് എന്.എച്ച് 66 അതിവേഗ പാത വിഭാവനം ചെയ്യുന്നത്.
ഊരാളുങ്കൽ ലേബർ കോൺട്രാക്ട് കോപ്പറേറ്റീവ് സൊസൈറ്റിയുടെ നേതൃത്വത്തില് നിര്മ്മാണ പ്രവര്ത്തനങ്ങള് നടത്തിയ കാസർഗോഡിലെ 39 കിലോമീറ്റർ തലപ്പാടി-ചെങ്കള പാത ഗതാഗതത്തിനായി തുറന്നുകൊടുത്തു. 37 കിലോമീറ്റർ ചെങ്കള-നീലേശ്വരം, 40 കിലോമീറ്റർ നീലേശ്വരം-തളിപ്പറമ്പ് എന്നീ റീച്ചുകളില് പണികള് വേഗത്തില് പുരോഗമിക്കുകയാണ്. രാമനാട്ടുകര-വളാഞ്ചേരി (39.68 കിലോമീറ്റർ), വളാഞ്ചേരി-കാപ്പിരിക്കാട് (37.35 കിലോമീറ്റർ) എന്നീ റീച്ചുകളുടെ പണികള് 99 ശതമാനത്തോളം പൂർത്തിയായി.
കോഴിക്കോട് ബൈപാസിന്റെ ഭാഗമായ വെങ്ങളം-രാമനാട്ടുകര (28.4 കിലോമീറ്റർ) സ്ട്രെച്ചിന്റെ പണികള് ഏകദേശം പൂര്ത്തിയായിക്കഴിഞ്ഞു. അതേസമയം അദാനി ഇൻഫ്രാസ്ട്രക്ചർ കൈകാര്യം ചെയ്യുന്ന വാഗഡ് ഇൻഫ്രാപ്രോജക്റ്റ്സിന് ഉപകരാർ നൽകിയിരിക്കുന്ന അഴിയൂർ-വെങ്ങളം (40.8 കിലോമീറ്റർ) റീച്ചിന്റെ ജോലികൾ പകുതി പോലും പൂർത്തിയായിട്ടില്ല.
എന്നാൽ, തെക്കൻ കേരളത്തിലെ കാര്യങ്ങൾ വ്യത്യസ്തമാണ്. തിരുവനന്തപുരത്തെ കടമ്പാട്ടുകോണം-കഴക്കൂട്ടം (30 കി.മീ.), ആലപ്പുഴയിലെ തുറവൂർ-പൂവാർ (38 കി.മീ.) തുടങ്ങിയ ഭാഗങ്ങളിൽ പണികൾ മന്ദഗതിയിലാണ്. കരാറുകാരുമായുള്ള തർക്കങ്ങൾ, ചുവന്ന മണ്ണ് ഉൾപ്പെടെയുള്ള നിർമ്മാണ സാമഗ്രികളുടെ ദൗർലഭ്യം, പ്രാദേശിക എതിർപ്പുകൾ, ചിലയിടങ്ങളിലെ രൂപകൽപ്പന സംബന്ധിച്ച തർക്കങ്ങൾ എന്നിവയാണ് പ്രധാനമായും കാലതാമസത്തിന് കാരണമാകുന്നത്.
വടക്കൻ കേരളത്തിൽ 2025 അവസാനത്തോടെ കാസർകോട് മുതൽ എറണാകുളം വരെ യാത്ര സുഗമമാക്കാൻ കഴിയുമെന്ന പ്രതീക്ഷ നിലനിൽക്കുമ്പോൾ, തെക്കൻ കേരളത്തിലെ പ്രധാന റീച്ചുകൾക്ക് 2026 ജൂലൈ വരെയാണ് പുതുക്കിയ സമയപരിധി. NH-66 പൂർത്തിയാവുന്നതോടെ കേരളത്തിൻ്റെ ഗതാഗത മേഖലയിൽ വൻ കുതിച്ചുചാട്ടം ഉണ്ടാകുമെന്നതിൽ സംശയമില്ല. എന്നാൽ ഈ വികസനത്തിൻ്റെ ഫലം സംസ്ഥാനത്തിന് പൂർണ്ണമായി ലഭിക്കണമെങ്കിൽ, തെക്കൻ ജില്ലകളിലെ കാലതാമസം എത്രയും പെട്ടെന്ന് പരിഹരിക്കേണ്ടതുണ്ട്.
NH-66 expansion to cut travel time between Kasaragod and Thiruvananthapuram by half, with rapid northern progress and southern delays.
Read DhanamOnline in English
Subscribe to Dhanam Magazine
