ഭക്ഷ്യ സുരക്ഷാ വകുപ്പിന്റെ നേതൃത്വത്തില് ആഗസ്റ്റ് ഒന്നിനും രണ്ടിനും സംസ്ഥാന വ്യാപകമായി ഓപ്പറേഷന് ഫോസ്കോസ് (FOSCOS) ലൈസന്സ് ഡ്രൈവ് 2023 എന്ന പേരില് സ്ഥാപനങ്ങളുടെ ലൈസന്സ് പരിശോധനകള് നടത്താന് ആരോഗ്യവകുപ്പ്. മുഴുവന് ഭക്ഷ്യ സംരംഭകരെയും ഭക്ഷ്യ സുരക്ഷാ ലൈസന്സ് പരിധിയില് കൊണ്ടുവരികയാണ് ലക്ഷ്യം.
ലൈസന്സ് ഇല്ലെങ്കില് നിയമവിരുദ്ധം
പരിശോധനയുടെ ഭാഗമായി ഭക്ഷ്യ സുരക്ഷാ ലൈസന്സ് ഇല്ലാതെ ഇത്തരം സംരംഭങ്ങള് നടത്തുന്നവര്ക്കെതിരെ ഭക്ഷ്യസുരക്ഷാ ഗുണനിലവാര നിയമപ്രകാരമുള്ള നടപടികള് സ്വീകരിക്കും. ഭക്ഷ്യസുരക്ഷാ ഗുണനിലവാര നിയമം 2006 പ്രകാരം എല്ലാ ഭക്ഷ്യ സംരംഭകരും എഫ്.എസ്.എസ്.എ.ഐ. ഭക്ഷ്യസുരക്ഷാ ലൈസന്സ് എടുക്കേണ്ടതാണ്.
സ്വന്തമായി ഭക്ഷണം നിര്മ്മിച്ച് വില്പന നടത്തുന്നവര്, തെരുവ് കച്ചവടക്കാര്, ഉന്തുവണ്ടിയില് കച്ചവടം നടത്തുന്നവര്, താല്കാലിക കച്ചവടക്കാര് എന്നിവര്ക്കു മാത്രമാണ് രജിസ്ട്രേഷന് അനുമതിയോടെ പ്രവര്ത്തിക്കാവുന്നത്. ജീവനക്കാരെ ഉള്പ്പെടുത്തി തട്ടുകട നടത്തുന്നവരും ലൈസന്സ് എടുക്കേണ്ടതാണ്. എന്നാല് നിരവധി കച്ചവട സ്ഥാപനങ്ങള് ലൈസന്സ് എടുക്കുന്നതിനു പകരം രജിസ്ട്രേഷന് മാത്രം എടുത്ത് പ്രവര്ത്തിക്കുന്നതായി പരിശോധനകളില് കണ്ടെത്തിയതിന്റെ അടിസ്ഥാനത്തിലാണ് പരിശോധന കര്ശനമാക്കിയത്.
അടച്ചുപൂട്ടല് ഉള്പ്പടെയുള്ള നടപടികള്
ലൈസന്സിന് പകരം രജിസ്ട്രേഷന് മാത്രമെടുത്ത് പ്രവര്ത്തിക്കുന്നവരെ ലൈസന്സ് ഇല്ലാത്തവരായി പരിഗണിച്ച് നടപടി സ്വീകരിക്കും. ഭക്ഷ്യ സുരക്ഷാ ലൈസന്സ് ഇല്ലാതെ പ്രവര്ത്തിക്കുന്നതോ ഭക്ഷ്യസുരക്ഷ ലൈസന്സ് പരിധിയില് വന്നിട്ടും ഭക്ഷ്യസുരക്ഷാ രജിസ്ട്രേഷനില് പ്രവര്ത്തിക്കുന്നതോ ആയ സ്ഥാപനങ്ങള് ശ്രദ്ധയില്പ്പെട്ടാല് അടച്ചുപൂട്ടല് ഉള്പ്പടെയുള്ള നടപടികള് സ്വീകരിക്കും.ലൈസന്സ് ലഭിക്കുന്നതിനായി foscos.fssai.gov.in എന്ന പോര്ട്ടലിലൂടെ അപേക്ഷിക്കാവുന്നതാണ്.
Read DhanamOnline in English
Subscribe to Dhanam Magazine
