വിമാനയാത്രകളിൽ പവർ ബാങ്ക് കരുതാറുണ്ടോ? എങ്കിൽ ഈ അപകടം അറിഞ്ഞിരിക്കുക

ഡൽഹിയിൽ നിന്ന് ചെന്നൈയിലേക്ക് പുറപ്പെട്ട ഇൻഡിഗോ വിമാനത്തിൽ ഓവർഹെഡ് ലഗേജ് കമ്പാർട്ട്മെന്റിൽ സൂക്ഷിച്ചിരുന്ന പവർ ബാങ്കിന് തീപിടിച്ചതിനെത്തുടർന്ന് വിമാനം ഹൈദരാബാദിലേക്ക് വഴിതിരിച്ചുവിട്ടു. ഒക്ടോബർ 11-നാണ് സംഭവം നടന്നത്. ക്യാബിൻ ക്രൂ അംഗങ്ങൾ ഉടൻതന്നെ ഫയർ എക്സ്ടിൻഗൂഷർ (fire extinguisher) ഉപയോഗിച്ച് തീയണച്ചതിനെത്തുടർന്ന് വിമാനം ഹൈദരാബാദിൽ സുരക്ഷിതമായി ലാൻഡ് ചെയ്തു. യാത്രക്കാരുടെ ബാഗുകൾ ഉപയോഗിച്ച് തീ അണയ്ക്കാൻ ശ്രമിക്കുന്ന ദൃശ്യങ്ങൾ അടങ്ങിയ 36 സെക്കൻഡ് വീഡിയോ സമൂഹമാധ്യമങ്ങളിൽ പ്രചരിച്ചിരുന്നു.

പവർ ബാങ്കുകൾ എന്തുകൊണ്ട് തീപിടിക്കുന്നു?

ഭൂരിഭാഗം പവർ ബാങ്കുകളും ലിഥിയം-അയോണ്‍ ബാറ്ററികളാണ് ഉപയോഗിക്കുന്നത്. ഇവ കുറഞ്ഞ സ്ഥലത്ത് വലിയ അളവിൽ ഊർജ്ജം സംഭരിച്ചുവെക്കാൻ ശേഷിയുള്ളവയാണ്. എന്നാൽ ബാറ്ററി അമിതമായി ചൂടാകുകയോ തകരാറുകൾ സംഭവിക്കുകയോ ചെയ്താൽ ഇവ അതീവ അപകടകാരികളായി മാറും.

ചാർജ് ചെയ്യുമ്പോഴോ മറ്റൊരു ഉപകരണത്തിലേക്ക് ചാർജ് നൽകുമ്പോഴോ പവർ ബാങ്കുകൾ സ്വാഭാവികമായും ചൂട് പുറത്തുവിടാറുണ്ട്. സാധാരണഗതിയിൽ ഇത് പ്രശ്നങ്ങൾ സൃഷ്ടിക്കാറില്ല. എന്നാൽ ബാറ്ററി അമിതമായി ചൂടാവുകയും തണുത്തുറയാൻ സാധിക്കാതെ വരികയും ചെയ്യുമ്പോൾ താപനില കുത്തനെ ഉയരുന്നു. ഇതിനെ 'തെർമൽ റൺഎവേ' (Thermal Runaway) എന്നാണ് വിളിക്കുന്നത്.

ഇത്തരം തീപിടുത്തങ്ങളിൽ താപനില സെക്കൻഡുകൾക്കുള്ളിൽ 700 മുതൽ 1,000 ഡിഗ്രി സെൽഷ്യസിനു മുകളിലേക്ക് ഉയരാമെന്നാണ് വിദഗ്ധര്‍ പറയുന്നത്. ഇത് മൂലം ലിഥിയം മാത്രമല്ല, ബാറ്ററിക്കുള്ളിലുള്ള മറ്റ് രാസവസ്തുക്കളും പ്ലാസ്റ്റിക് ഭാഗങ്ങളും വേഗത്തിൽ തീപിടിക്കാൻ കാരണമാകും.

തീപിടിക്കാൻ ഇടയാക്കുന്ന പ്രധാന കാരണങ്ങൾ

ഗുണനിലവാരമില്ലാത്ത ബാറ്ററികൾ, നിർമ്മാണത്തിലെ തകരാറുകൾ, ശാരീരികമായ കേടുപാടുകൾ, അനുചിതമായ ഉപയോഗം എന്നിവയാണ് പവർ ബാങ്കുകൾക്ക് തീപിടിക്കാൻ പ്രധാന കാരണമാകുന്നത്.

ചില പവർ ബാങ്കുകളിൽ നിലവാരം കുറഞ്ഞ ബാറ്ററി സെല്ലുകളാണ് ഉപയോഗിക്കുന്നത്. ഇവയിൽ തകരാറുകളുണ്ടെങ്കിൽ പെട്ടെന്ന് ചൂടാവുകയും തീപിടിക്കുകയും ചെയ്യാം. ഇത്തരം നിർമ്മാണ തകരാറുകൾ വലിയ അപകടങ്ങൾക്ക് കാരണമാകും.

• ഷോർട്ട് സർക്യൂട്ട്: ബാറ്ററിക്കുള്ളിൽ പോസിറ്റീവ്, നെഗറ്റീവ് എന്നിങ്ങനെ രണ്ട് ടെർമിനലുകൾ പരസ്പരം തൊടാതെ പ്രത്യേകം സൂക്ഷിച്ചിട്ടുണ്ടാകും. ഇവയെ വേർതിരിക്കുന്ന സംരക്ഷണ പാളിക്ക് കേടുപാടുകൾ സംഭവിച്ചാൽ ഷോർട്ട് സർക്യൂട്ട് ഉണ്ടാകാം.

• അധിക ചൂട് ഏൽക്കുന്നത്: പവർ ബാങ്ക് നേരിട്ട് സൂര്യപ്രകാശത്തിലോ ചൂടുള്ള സ്ഥലങ്ങളിലോ വെക്കുന്നത് താപനില വർദ്ധിപ്പിക്കും. ഇതിനകം തകരാറുള്ള ബാറ്ററികളിൽ ഈ ചൂട് തീപിടുത്ത സാധ്യത ഇരട്ടിയാക്കുന്നു.

ഉപയോഗത്തിലില്ലാത്തപ്പോഴും പവർ ബാങ്ക് കത്തുമോ?

തീർച്ചയായും, ഫോണോ ചാർജറോ ബന്ധിപ്പിച്ചിട്ടില്ലാത്തപ്പോഴും പവർ ബാങ്കിന് തീപിടിക്കാം. ബാറ്ററിക്കുള്ളിൽ എന്തെങ്കിലും തകരാറുണ്ടെങ്കിൽ ഉപയോഗത്തിലില്ലാത്ത സമയത്തും അവ അമിതമായി ചൂടാകാം. നിർമ്മാണ തകരാറുകളും കേടുപാടുകളും ഷോർട്ട് സർക്യൂട്ടിലേക്ക് നയിക്കുന്നതാണ് ഇതിന് കാരണം.

വിമാനങ്ങളിൽ പവർ ബാങ്ക് വലിയ ഭീഷണിയാകുന്നത് എന്ത്കൊണ്ട്?

അടഞ്ഞുകിടക്കുന്ന വിമാനത്തിനുള്ളിൽ ബാറ്ററിക്ക് തീപിടിക്കുന്നത് വലിയ തോതിൽ ചൂടും പുകയും പുറന്തള്ളുന്നതിനാൽ അതീവ ഗുരുതരമായ സാഹചര്യങ്ങൾ സൃഷ്ടിക്കും.

ഇൻഡിഗോയുടെ ഔദ്യോഗിക വെബ്സൈറ്റ് പ്രകാരം, പവർ ബാങ്കുകളും ലൂസ് ലിഥിയം ബാറ്ററികളും ഹാൻഡ് ബാഗേജുകളിൽ മാത്രമേ അനുവദിക്കൂ. അവ യാത്രക്കാരുടെ സീറ്റിനടിയിലോ സീറ്റ് പോക്കറ്റിലോ യാത്രക്കാരുടെ പക്കൽ തന്നെയോ എപ്പോഴും കൈയെത്തും ദൂരത്ത് സൂക്ഷിക്കേണ്ടതാണ്. 2025 നവംബറിൽ ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (DGCA) പുറത്തിറക്കിയ ഉത്തരവ് പ്രകാരം വിമാനയാത്രയ്ക്കിടെ പവർ ബാങ്കുകൾ ഉപയോഗിക്കാനോ ചാർജ് ചെയ്യാനോ പാടില്ല. അടിയന്തര ഘട്ടങ്ങളിൽ വേഗത്തിൽ എടുക്കാൻ ബുദ്ധിമുട്ടായതിനാൽ ഇവ ഓവർഹെഡ് കമ്പാർട്ടുമെന്റുകളിൽ സൂക്ഷിക്കരുതെന്നും വ്യവസ്ഥയുണ്ട്.

സമാനമായ സംഭവങ്ങൾ

വിമാനങ്ങളിൽ പവർ ബാങ്ക് തീപിടിക്കുന്ന സംഭവങ്ങൾ പുതിയതല്ല. 2026 ജൂണില്‍ ലാസ് വെഗാസിലേക്ക് എത്തിയ വിമാനത്തിൽ ഒരു യാത്രക്കാരന്റെ ബാറ്ററി പാക്ക് ചൂടായി പൊട്ടിത്തെറിച്ച് സീറ്റിന് തീപിടിക്കുകയുണ്ടായി.

കഴിഞ്ഞ വർഷം ജൂലൈയില്‍ ഓസ്ട്രേലിയയിലെ ഹോബാർട്ടിന് സമീപം ബോയിങ് 737 വിമാനത്തിൽ നിന്ന് യാത്രക്കാർ പുറത്തിറങ്ങുന്നതിനിടയിൽ പവർ ബാങ്കിൽ നിന്ന് പുക ഉയർന്നിരുന്നു.

2025 മാർച്ചില്‍ പവർ ബാങ്കിൽ 'തെർമൽ റൺഎവേ' ഉണ്ടായതിനെത്തുടർന്ന് ഹോങ്കോംഗ് എയർലൈൻസിന്റെ എയർബസ് A320 വിമാനം വഴിതിരിച്ചുവിടേണ്ടി വന്നു.

സുരക്ഷിതമായി പവർ ബാങ്ക് എങ്ങനെ കൊണ്ടുപോകാം?

വിമാനയാത്രകളിൽ ശ്രദ്ധിക്കേണ്ട പ്രധാന മുൻകരുതലുകൾ:

• പവർ ബാങ്കുകൾ എപ്പോഴും ക്യാബിൻ ബാഗേജിൽ മാത്രം സൂക്ഷിക്കുക.

• യാത്രയ്ക്കിടെ പവർ ബാങ്ക് ഉപയോഗിക്കുകയോ ചാർജ് ചെയ്യുകയോ ചെയ്യരുത്.

• കേടുപാടുകൾ സംഭവിച്ച പവർ ബാങ്കുകൾ പൂർണ്ണമായും ഒഴിവാക്കുക.

• ബാറ്ററി ശേഷിയും സുരക്ഷാ വിവരങ്ങളും വ്യക്തമായി രേഖപ്പെടുത്തിയ മികച്ച ബ്രാൻഡുകൾ മാത്രം തിരഞ്ഞെടുക്കുക.

• കടുത്ത ചൂടിൽ നിന്നും സൂര്യപ്രകാശത്തിൽ നിന്നും മാറ്റിവയ്ക്കുക.

• അനുയോജ്യമായ ചാർജറുകൾ മാത്രം ഉപയോഗിക്കുക.

  An IndiGo flight from Delhi to Chennai was diverted to Hyderabad after a power bank caught fire in the overhead luggage compartment, highlighting aviation safety risks associated with lithium-ion batteries.