ബോക്സ് ഓഫീസ് വരുമാനം 586 കോടി, ചെലവ് 50 കോടി, സ്ത്രീ 2 എക്കാലത്തെയും വലിയ ഹിന്ദി ഹിറ്റായത് എങ്ങനെ

ബോക്സ് ഓഫീസില്‍ വിപ്ലവം സൃഷ്ടിച്ചു കൊണ്ടിരിക്കുകയാണ് അഞ്ച് ആഴ്ച മുമ്പ് തീയേറ്ററുകളിൽ എത്തിയ ഹൊറർ-കോമഡി ചിത്രം സ്ത്രീ 2. അമർ കൗശിക് സംവിധാനം ചെയ്ത ചിത്രം ഓഗസ്റ്റ് 15 നാണ് തിയേറ്ററുകളില്‍ എത്തുന്നത്.

റിലീസ് ചെയ്ത ദിവസം മുതല്‍ തിയേറ്ററുകളിലേക്ക് വലിയ ജനക്കൂട്ടത്തെയാണ് ചിത്രം ആകർഷിക്കുന്നത്. 50 കോടി ബഡ്ജറ്റിൽ നിർമ്മിച്ച ഈ ചിത്രം ഇതിനകം തന്നെ ഒരു വലിയ മാർജിനിൽ നിർമാണ ചെലവ് മറികടന്നു.

തിയേറ്ററുകളിലെത്തി 34ാം ദിവസം ചിത്രം ബോക്‌സ് ഓഫീസില്‍ നിന്ന് വാരിയത് 585.85 കോടി രൂപയാണ്. ഈ വിജയം സ്ത്രീ 2 നെ ഹിന്ദി സിനിമാ ചരിത്രത്തിലെ ഏറ്റവും മികച്ച വരുമാനം നേടിയ ചിത്രമാക്കി മാറ്റി. 584 കോടി ബോക്സ് ഓഫീസില്‍ നിന്ന് വാരിയ ഷാരൂഖ് ഖാന്റെ ജവാന്റെ റെക്കോഡാണ് ചിത്രം തകര്‍ത്തത്.

2018 ലെ ഹിറ്റ് ചിത്രമായ സ്ത്രീയുടെ തുടർച്ചയാണ് സ്ത്രീ 2. ഹൊററിന്റെയും ഹാസ്യത്തിന്റെയും മികച്ച മിശ്രിതം മൂലം ആളുകള്‍ പരക്കെ സ്വീകരിച്ച പടമാണ് സ്ത്രീ ഒന്നാം ഭാഗം.

രണ്ടാം ഭാഗത്തിലും സമാനമായ കഥാ കഥന രീതിയാണ് സ്വീകരിച്ചിരിക്കുന്നത്. സസ്പെൻസ്, നർമ്മം, അതീന്ദ്രിയഘടകങ്ങൾ തുടങ്ങിവയുടെ മിശ്രിതം പ്രേക്ഷകരെ രസിപ്പിക്കുന്നു.

ഒരു ചെറിയ പട്ടണത്തെ ഭയപ്പെടുത്തുന്ന ഒരു പ്രേതത്തെ കേന്ദ്രീകരിച്ചാണ് ഈ സിനിമ മുന്നോട്ടു പോകുന്നത്. ഒരു ഹൊറർ സിനിമയുടെ ഭയാനകമായ അന്തരീക്ഷം നിലനിർത്തിക്കൊണ്ട് കഥയെ ലളിതമായി നിലനിർത്തി നർമ്മത്തില്‍ പൊതിഞ്ഞാണ് അവതരിപ്പിക്കുന്നത്. അമർ കൗശികിന്റെ മികച്ച സംവിധാനവും അഭിനേതാക്കളുടെ മികച്ച പ്രകടനവും ചിത്രത്തിന്റെ വിജയത്തിനുളള കാരണങ്ങളാണ്. രാജ്കുമാർ റാവു, ശ്രദ്ധ കപൂർ, പങ്കജ് ത്രിപാഠി, അഭിഷേക് ബാനർജി, അപർശക്തി ഖുറാന എന്നിവരാണ് ചിത്രത്തിലെ പ്രധാന അഭിനേതാക്കൾ.

അടുത്തു തന്നെ ബോക്സ് ഓഫീസില്‍ 600 കോടിയിലെത്താനുള്ള പാതയിലാണ് ചിത്രം. വരും വാരാന്ത്യങ്ങളിൽ ചിത്രം ഈ പുതിയ നാഴികക്കല്ല് കൈവരിക്കുമെന്ന് കരുതുന്നതായി സിനിമാ നിരീക്ഷകര്‍ പറയുന്നു.

യുവതലമുറയേയും മുതിർന്ന തലമുറയേയും ഒരുപോലെ സ്വാധീനിക്കുന്ന തരത്തില്‍ ഹൊററും കോമഡിയും സംയോജിപ്പിച്ച് പ്രേക്ഷകരെ രസിപ്പിക്കാന്‍ സാധിച്ചതാണ് സ്ത്രീ 2 ന്റെ അഭൂതപൂര്‍വമായ വിജയത്തിന് കാരണം.