ഇന്നത്തെ ഡിജിറ്റൽ യുഗത്തിൽ നിരവധി വലിയ എഡ്യുടെക് (EdTech) പ്ലാറ്റ്ഫോമുകൾ വിപണിയിലുണ്ടെങ്കിലും, അവയിൽ നിന്നെല്ലാം തികച്ചും വേറിട്ടുനിൽക്കുന്ന ഒരു പുതിയ ഓൺലൈൻ വിദ്യാഭ്യാസ കൂട്ടായ്മയ്ക്ക് രൂപം നൽകിയിരിക്കുകയാണ് രണ്ട് മലയാളി വിദ്യാർത്ഥികൾ. പ്ലസ് ടുവിന് പഠിക്കുന്ന യാദവ് എം. (കണ്ണൂർ ഏച്ചൂർ സ്വദേശം), പ്ലസ് വണ്ണിന് പഠിക്കുന്ന ആദർശ് ആര്.എസ് (കോഴിക്കോട് ഉള്ളിയേരി സ്വദേശം) എന്നിവര് ചേർന്നാണ് ഈ സംരംഭം മുന്നോട്ട് കൊണ്ടുപോകുന്നത്.
വാട്സ്ആപ്പ് പഠന കൂട്ടായ്മയിലൂടെ പരസ്പരം പരിചയപ്പെട്ട ഇവർ, സാധാരണക്കാരായ കുട്ടികൾക്ക് പഠനം എളുപ്പമാക്കുക എന്ന ലക്ഷ്യത്തോടെ മൊബൈൽ ആപ്ലിക്കേഷനും വാട്സ്ആപ്പ് ഗ്രൂപ്പുകളും വഴി ട്യൂഷൻ ക്ലാസുകൾ നൽകുന്നു. 10-ാം ക്ലാസ്, പ്ലസ് വൺ, പ്ലസ് ടു ക്ലാസുകളിലെ കുട്ടികൾക്കായാണ് ഇവർ പ്രധാനമായും ക്ലാസുകൾ നൽകുന്നത്. നിലവിൽ പ്ലസ് വണ്ണിലെ ബയോ സയൻസ്, കൊമേഴ്സ് സയൻസ് ബാച്ചുകൾക്കായി ക്ലാസുകൾ ലഭ്യമാണ്. 'എഡ്യുകണക്ട്' (EduConnect) എന്ന പ്ലാറ്റ്ഫോമിനാണ് ഇവര് രൂപം നല്കിയിരിക്കുന്നത്.
വൻകിട കോർപ്പറേറ്റ് എഡ്യുടെക് പ്ലാറ്റ്ഫോമുകളിൽ നിന്ന് ഈ കൂട്ടായ്മയെ വ്യത്യസ്തമാക്കുന്ന പ്രധാന ഘടകങ്ങൾ താഴെ പറയുന്നവയാണ്:
വലിയ ഫീസുകൾ ഈടാക്കുന്ന ബൈജൂസ് (Byju's) പോലുള്ള പ്രമുഖ പ്രൈവറ്റ് എഡ്യുടെക് പ്ലാറ്റ്ഫോമുകളിൽ നിന്ന് ഈ സംരംഭത്തെ വ്യത്യസ്തമാക്കുന്ന ഏറ്റവും വലിയ ഘടകം ഇതിന്റെ കുറഞ്ഞ ചെലവാണ്. കോർപ്പറേറ്റ് കമ്പനികൾ വലിയ തുകകൾ ഫീസായി വാങ്ങുമ്പോൾ, ഈ വിദ്യാർത്ഥി കൂട്ടായ്മ കുട്ടികളിൽ നിന്ന് വളരെ ചെറിയൊരു തുക മാത്രമാണ് ഈടാക്കുന്നത്. ഇത് പ്രധാനമായും സാമ്പത്തികമായി പിന്നോക്കം നിൽക്കുന്ന കുടുംബങ്ങളിൽ നിന്നുള്ള കുട്ടികൾക്ക് വലിയൊരു അനുഗ്രഹമാണ്. പഠിക്കാൻ ആഗ്രഹമുള്ള എന്നാൽ വലിയ ട്യൂഷൻ ഫീസ് നൽകാൻ കഴിയാത്തതുമായ കുട്ടികൾക്ക് സഹായകരമാകണം എന്ന ലക്ഷ്യത്തോടെയാണ് തങ്ങള് പ്രവർത്തിക്കുന്നതെന്ന് യാദവ് ധനം ഓണ്ലൈനോട് പറഞ്ഞു.
ഈ പ്ലാറ്റ്ഫോമിന്റെ ഏറ്റവും വലിയ സവിശേഷത ഇത് നടത്തുന്നത് വിദ്യാർത്ഥികൾ തന്നെയാണ് എന്നതാണ്. പ്ലസ് വൺ, പ്ലസ് ടു ക്ലാസുകളിൽ പഠിക്കുന്ന യാദവിനും ആദർശിനും തങ്ങളുടെ സഹപാഠികളായ കുട്ടികൾ അനുഭവിക്കുന്ന പഠനപരമായ പ്രശ്നങ്ങൾ കൃത്യമായി മനസിലാക്കാൻ സാധിക്കുന്നു. പരമ്പരാഗത അധ്യാപകരിൽ നിന്ന് വ്യത്യസ്തമായി, ഒരു പ്രത്യേക സബ്ജക്റ്റിലെ ഏത് ഭാഗത്താണ് കുട്ടികൾക്ക് ബുദ്ധിമുട്ട് നേരിടുന്നത് എന്ന് വിദ്യാർത്ഥികൾ എന്ന നിലയിൽ ഇവർക്ക് എളുപ്പത്തിൽ തിരിച്ചറിയാനും അത് പരിഹരിക്കാനും സാധിക്കുന്നു.
ഇതൊരു ഔദ്യോഗിക ക്ലാസ് എന്നതിലുപരി കൂട്ടുകാർ ഒത്തുചേർന്നു നടത്തുന്ന ഒരു 'കമ്പൈൻഡ് സ്റ്റഡി' (Combined study) പോലെയാണ് കുട്ടികൾക്ക് അനുഭവപ്പെടുന്നത്. പ്രായത്തിലുള്ള തുല്യത കാരണം കുട്ടികൾക്ക് കൂടുതൽ ഫ്രണ്ട്ലി ആയ രീതിയിൽ സംശയങ്ങൾ ചോദിക്കാനും പഠിക്കാനും സാധിക്കുന്നതായും യാദവ് പറയുന്നു. പത്താം ക്ലാസിൽ പഠിക്കുമ്പോൾ തന്നെ സുഹൃത്തുക്കൾക്ക് യാദവ് ക്ലാസുകൾ എടുത്തു നൽകിയിരുന്നു. എല്ലാവർക്കും തന്റെ ക്ലാസുകൾ മനസ്സിലാകുന്നുണ്ടെന്ന് തിരിച്ചറിഞ്ഞതോടെയാണ് ഇതൊരു പാഷനായി ഇവർ കൊണ്ടുനടക്കാൻ തുടങ്ങിയത്.
സാധാരണ എഡ്യുടെക് പ്ലാറ്റ്ഫോമുകൾ കുട്ടികളുടെ പഠനത്തിൽ മാത്രം ശ്രദ്ധ കേന്ദ്രീകരിക്കുമ്പോൾ, ഈ സംരംഭം സ്കൂൾ അധ്യാപകരെയും മുൻഗണനാ പട്ടികയിൽ ഉൾപ്പെടുത്തിയിട്ടുണ്ട്. ഇതിന്റെ ഭാഗമായി പുതുതായി ആരംഭിച്ച പദ്ധതിയാണ് 'എഐ ഫോർ ടീച്ചേഴ്സ്'. ആധുനിക സാങ്കേതികവിദ്യയായ നിർമ്മിതബുദ്ധിയെക്കുറിച്ച് (AI) കൃത്യമായ ധാരണയില്ലാത്ത അധ്യാപകർക്ക് എഐ ടൂളുകൾ പരിചയപ്പെടുത്തുകയും അവർക്ക് എഐ കോച്ചിങ് നൽകുകയും ചെയ്യുക എന്നതാണ് ഇതിലൂടെ ലക്ഷ്യമിടുന്നത്. ഈ പരിശീലനത്തിലൂടെ അധ്യാപകർക്ക് ക്ലാസുകളിൽ എഐ ടൂളുകൾ ഉപയോഗിച്ച് സ്ലൈഡുകൾ തയാറാക്കാനും കൂടുതൽ ഫലപ്രദമായി കുട്ടികൾക്ക് മുന്നിൽ കാര്യങ്ങൾ അവതരിപ്പിക്കാനും സാധിക്കുന്നു.
വളരെ ലളിതമായ ഷെഡ്യൂൾ അനുസരിച്ചാണ് ഇതിലെ ക്ലാസുകൾ നടക്കുന്നത്. ഓരോ ദിവസവും ഓരോ സബ്ജക്റ്റ് വീതം നൽകും. ക്ലാസുകൾ മുൻകൂട്ടി റെക്കോർഡ് ചെയ്ത ശേഷം ആപ്പിൽ അപ്ലോഡ് ചെയ്യുകയാണ് ചെയ്യുന്നത്. അതിനാൽ ലൈവ് ക്ലാസുകളുടേത് പോലുള്ള കൃത്യമായ സമയബന്ധിതമായ യാതൊരു ബുദ്ധിമുട്ടും കുട്ടികൾക്കില്ല.
കുട്ടികൾക്ക് തങ്ങളുടെ സൗകര്യത്തിനനുസരിച്ച് എപ്പോൾ വേണമെങ്കിലും ഈ വീഡിയോകൾ കണ്ട് പഠിക്കാവുന്നതാണ്. പഠനത്തിനിടയിൽ ഉണ്ടാകുന്ന സംശയങ്ങൾ പരിഹരിക്കാനായി ശനി, ഞായർ ദിവസങ്ങളിൽ ഇവർ ഗൂഗിൾ മീറ്റ് (Google Meet) വഴി പ്രത്യേക സംശയനിവാരണ സെഷനുകൾ നടത്തുന്നു. കുട്ടികൾ വായനയിലോ പഠനത്തിലോ കണ്ടെത്തുന്ന സംശയങ്ങൾ അടയാളപ്പെടുത്തി വെക്കുകയും ഈ വീക്കെൻഡ് മീറ്റിംഗുകളിൽ ചോദിച്ച് മനസിലാക്കുകയും ചെയ്യുന്നു.
വലിയ പരസ്യങ്ങളോ പ്രൊമോഷനുകളോ ഇല്ലാതെയാണ് ഈ പ്ലാറ്റ്ഫോം പ്രവർത്തിക്കുന്നത്. ഈ പ്ലാറ്റ്ഫോമിൽ പഠിക്കുന്ന കുട്ടികൾ തങ്ങളുടെ കൂട്ടുകാരോട് പറയുന്നതുവഴിയുള്ള 'മൗത്ത് പബ്ലിസിറ്റി' (Word of mouth) മാത്രമാണ് ഇവരുടെ പ്രചരണം. യാദവും ആദർശും കൂടാതെ മറ്റ് ചില ട്യൂഷൻ അധ്യാപകരും ഇവിടെ ക്ലാസുകൾ എടുക്കുന്നുണ്ട്. സ്കൂൾ കഴിഞ്ഞുള്ള സമയങ്ങളിലും അവധി ദിവസങ്ങളിലും സമയം കണ്ടെത്തിയാണ് ഇവർ തങ്ങളുടെ പാഷനായ ഈ സംരംഭം മുന്നോട്ട് കൊണ്ടുപോകുന്നത്. ഭാവിയിൽ കൂടുതൽ ക്ലാസുകൾ ഉൾപ്പെടുത്തി ഈ ആപ്ലിക്കേഷനെ കൂടുതൽ വിപുലീകരിക്കാനും ഒരുപാട് വിദ്യാർത്ഥികളിലേക്ക് തങ്ങളുടെ സേവനം എത്തിക്കാനുമാണ് ഇവർ ലക്ഷ്യമിടുന്നത്.
Read DhanamOnline in English
Subscribe to Dhanam Magazine
