ഡോ. ഷംഷീര് വയലില് ചെയര്മാനായ അല്മസാര് അല്ഷാമില് എഡ്യൂക്കേഷന് സൗദി അറേബ്യന് ഓഹരി വിപണിയിലേക്ക്. ഓഹരികള് സൗദി എക്സ്ചേഞ്ച് (തദാവുള്) പ്രധാന വിപണിയില് ലിസ്റ്റ് ചെയ്യും.
കമ്പനിയുടെ മൊത്തം ഓഹരി മൂലധനത്തിന്റെ 30 ശതമാനത്തെ പ്രതിനിധീകരിക്കുന്ന 30,720,400 ഓഹരികള് രജിസ്റ്റര് ചെയ്യാന് സൗദി ക്യാപിറ്റല് മാര്ക്കറ്റ് അതോറിറ്റി കമ്പനിക്ക് അനുമതി നല്കി. ലിസ്റ്റിംഗ് പൂര്ത്തിയാക്കുന്നതോടെ മിഡില് ഈസ്റ്റിലെ ഏറ്റവും വലിയ ഉന്നത വിദ്യാഭ്യാസ ഗ്രൂപ്പായി അല്മസാര് അല്ഷാമില് എഡ്യൂക്കേഷന് മാറും.
യുഎഇ ആസ്ഥാനമായുള്ള ഉന്നതവിദ്യാഭ്യാസ, സ്പെഷ്യല് എഡ്യൂക്കേഷന് ഗ്രൂപ്പ് സൗദി അറേബ്യന് ഓഹരിവിപണിയിലേക്ക് കടക്കുന്നത് ഗള്ഫ് വിദ്യാഭ്യാസ മേഖലയില് അപൂര്വവും ചരിത്രപരവുമായ നീക്കമാണ്. ജിസിസിയിലുടനീളം സ്പെഷ്യല് എഡ്യൂക്കേഷന് ഉള്പ്പെടുന്ന വിദ്യാഭ്യാസ മേഖലയില് നേതൃത്വം ഉറപ്പാക്കുകയാണ് അല്മസാറിന്റെ ലക്ഷ്യം.
ഡോ. ഷംഷീറിന്റെ നേതൃത്വത്തില് അല്മസാര് മികച്ച വളര്ച്ചയാണ് നേടിയിട്ടുള്ളത്. വരുമാനം 2022ലെ 181 ദശലക്ഷം സൗദി റിയാലില് നിന്ന് 2024ല് 437 ദശലക്ഷം സൗദി റിയാല് ആയി ഉയര്ന്നു.
സൗദിയിലെ ഹ്യൂമന് ഡെവലപ്മെന്റ് കമ്പനി, ഹ്യൂമന് റീഹാബിലിറ്റേഷന് കമ്പനി, മിഡില്സെക്സ് യൂണിവേഴ്സിറ്റി ദുബായ്, യുഎഇയിലെ നെമ ഹോള്ഡിംഗ് കമ്പനി എന്നീ ഉപസ്ഥാപനങ്ങളിലൂടെ 28,000-ലധികം കുട്ടികള്ക്ക് പഠനവും പരിചരണവും നല്കുന്ന ഗ്രൂപ്പിനു കീഴില് 39 ഡേകെയര് സെന്ററുകള്, 14 സ്കൂളുകള്, മൂന്ന് ക്ലിനിക്കുകള് എന്നിവയാണുള്ളത്.
ഞങ്ങളുടെ വളര്ച്ചയിലെ വൈകാരികവും സുപ്രധാനവുമായ ഒരു നിമിഷമാണിത്. ഐപിഒ എന്നതിലുപരി എല്ലാ വിദ്യാര്ത്ഥികള്ക്കും പരിമിതികളെ മറികടന്ന് പഠിക്കാനും ജീവിതത്തില് മുന്നേറാനും കൂടുതല് അവസരങ്ങള് നല്കാനുള്ള ഞങ്ങളുടെ ദൗത്യത്തിന്റെ പ്രതിഫലനമാണിത്-ഡോ. ഷംഷീര് വയലില് പറഞ്ഞു.
ജിസിസി മേഖലയിലെ വിദ്യാഭ്യാസ-ആരോഗ്യ രംഗത്തെ ഏറ്റവും വലിയ സംയോജിത നിക്ഷേപ സ്ഥാപനങ്ങളിലൊന്നായ അമാനത്ത് ഹോള്ഡിങ്സിന്റെ പൂര്ണ ഉടമസ്ഥതയിലുള്ളതാണ് അല്മസാര് അല്ഷാമില് എഡ്യൂക്കേഷന്. സമീപകാലത്ത് ഹെറിയറ്റ് വാട്ട് യൂണിവേഴ്സിറ്റിയുമായി സഹകരിച്ച് സൗദി അറേബ്യയില് പുതിയ ക്യാമ്പസ് സ്ഥാപിക്കാനുള്ള കരാറില് അമാനത്ത് ഒപ്പുവച്ചു. ഈ ഐപിഒ ഡോ. ഷംഷീറിന്റെ സംരംഭകയാത്രയിലെ മൂന്നാമത്തെ ഐപിഒ ലിസ്റ്റിംഗാണ്.
Read DhanamOnline in English
Subscribe to Dhanam Magazine
