എട്ടാം ശമ്പള കമ്മീഷൻ: ഫിറ്റ്മെന്റ് ഘടകം ശമ്പള വർദ്ധന കുറയ്ക്കുമോ? ജീവനക്കാരിൽ ആശങ്ക

എട്ടാം ശമ്പള കമ്മീഷൻ ശുപാര്‍ശകള്‍ 2026 ജനുവരി 1 മുതൽ പ്രാബല്യത്തിൽ വരുമെന്നാണ് നേരത്തെ പ്രഖ്യാപിച്ചിരുന്നത്. ടേംസ് ഓഫ് റഫറൻസ് (ToR) സംബന്ധിച്ചുളള ചര്‍ച്ചകള്‍ പുരോഗമിക്കുന്നതിനാല്‍ എട്ടാം ശമ്പള കമ്മീഷന്റെ അംഗങ്ങളെയും ചെയർപേഴ്‌സണെയും ഇതുവരെ നിയമിച്ചിട്ടില്ല. 1.2 കോടിയിലധികം കേന്ദ്ര സർക്കാർ ജീവനക്കാരും പെൻഷൻകാരും ശമ്പളത്തിനും പെൻഷൻ പരിഷ്കരണത്തിനുമായി എട്ടാം ശമ്പള കമ്മീഷൻ രൂപീകരിക്കുന്നതിനായി ആകാംക്ഷയോടെ കാത്തിരിക്കുകയാണ്. കമ്മീഷൻ അംഗങ്ങളുടെ നിയമനത്തിലെ കാലതാമസവും ഔദ്യോഗിക വിജ്ഞാപനം പുറപ്പെടുവിക്കുന്നതിലെ കാലതാമസവും കണക്കിലെടുക്കുമ്പോൾ കമ്മീഷൻ ശുപാര്‍ശകള്‍ നടപ്പാക്കുന്നത് 2027 ലേക്ക് നീളാനുളള സാധ്യതകളുണ്ടെന്നാണ് കരുതുന്നത്.

എട്ടാം ശമ്പള കമ്മീഷന്റെ ഏറ്റവും സൂക്ഷ്മമായി നിരീക്ഷിക്കപ്പെടുന്ന ഘടകങ്ങളിലൊന്നായിരിക്കും ഫിറ്റ്മെന്റ് ഘടകം (fitment factor). സർക്കാർ ജീവനക്കാരുടെ ശമ്പളം, പെൻഷനുകൾ, അലവൻസുകൾ എന്നിവ പരിഷ്കരിക്കുന്നതിന് ഫിറ്റ്മെന്റ് ഘടകം പ്രധാനമാണ്. പണപ്പെരുപ്പം, ജീവനക്കാരുടെ ആവശ്യങ്ങൾ, സർക്കാരിന്റെ സാമ്പത്തിക ശേഷി തുടങ്ങിയ വിവിധ ഘടകങ്ങൾ പരിഗണിച്ചാണ് ഫിറ്റ്മെന്റ് ഘടകം നിർണയിക്കുന്നത്. നിലവിലുള്ള അടിസ്ഥാന ശമ്പളത്തിൽ ഗുണിക്കുന്ന ഗുണകമാണ് ഫിറ്റ്മെന്റ് ഘടകം. ഏഴാം ശമ്പള കമ്മീഷനിൽ ഈ ഘടകം 2.57 ആയിരുന്നു, അതിനാൽ ഏറ്റവും കുറഞ്ഞ ശമ്പളം 7,000 രൂപയിൽ നിന്ന് 18,000 രൂപയായി വർദ്ധിച്ചു.

ഒരു സർക്കാർ ജീവനക്കാരന്റെ ശമ്പളത്തിൽ അടിസ്ഥാന ശമ്പളം, ക്ഷാമബത്ത (ഡിഎ), വീട്ടുവാടക അലവൻസ് (എച്ച്ആർഎ), ഗതാഗത അലവൻസ് എന്നിവ ഉൾപ്പെടുന്നു. മൊത്തം വരുമാനത്തിന്റെ 51.5 ശതമാനം അടിസ്ഥാന ശമ്പളമാണ്, ഡിഎ ഏകദേശം 30.9 ശതമാനവും, എച്ച്ആർഎ ഏകദേശം 15.4 ശതമാനവും, ഗതാഗത അലവൻസ് ഏകദേശം 2.2 ശതമാനവുമാണ്. കൊട്ടക് ഇൻസ്റ്റിറ്റ്യൂഷണൽ ഇക്വിറ്റീസിന്റെ റിപ്പോർട്ട് അനുസരിച്ച്, എട്ടാം ശമ്പള കമ്മീഷന്റെ ഫിറ്റ്മെന്റ് ഘടകം ഏകദേശം 1.8 ആയിരിക്കുമെന്നാണ് പ്രതീക്ഷിക്കുന്നത്. ഇത് ഏകദേശം 13 ശതമാനം ശമ്പള വർദ്ധനവിന് കാരണമാകും.

ആംബിറ്റ് ക്യാപിറ്റലിന്റെ റിപ്പോർട്ട് അനുസരിച്ച്, എട്ടാം ശമ്പള കമ്മീഷന്റെ ഫിറ്റ്മെന്റ് ഘടകം 1.83 നും 2.46 നും ഇടയിലാണെന്ന് കണക്കാക്കപ്പെടുന്നു. ഇതനുസരിച്ച് ഒരു ജീവനക്കാരന്റെ നിലവിലെ അടിസ്ഥാന ശമ്പളം 50,000 രൂപയാണെങ്കിൽ, അത് 91,500 മുതൽ 1,23,000 രൂപ വരെയാകാം. അടിസ്ഥാന ശമ്പളത്തിൽ ഡിയർനെസ് അലവൻസ് (ഡിഎ) ഉള്‍പ്പെടുത്തി പിന്നീട് പുനഃക്രമീകരിക്കുന്നതിനാല്‍ യഥാർത്ഥ ശമ്പള വർദ്ധനവ് ഇതിനേക്കാൾ കുറവായിരിക്കാം. ഫിറ്റ്മെന്റ് ഘടകം അംബിറ്റിന്റെ റിപ്പോർട്ട് അനുസരിച്ച് 2.46 വരെയാണെങ്കിൽ പോലും, യഥാർത്ഥ ശമ്പള വർദ്ധനവ് 30 ശതമാനം മുതൽ 34 ശതമാനം വരെ മാത്രമായിരിക്കും. ശമ്പളത്തിന്റെ 2 മടങ്ങ് അല്ലെങ്കിൽ 2.5 മടങ്ങ് വര്‍ധന പ്രതീക്ഷിക്കുന്നവർക്ക് നിരാശയുണ്ടാക്കുന്നതാണ് ഇത്.

_{8th Pay Commission’s fitment factor may limit salary hikes, disappointing employees expecting bigger raises.}