അവസാന നിമിഷം ഒരു ദിവസം നീട്ടി ഐടിആർ സമർപ്പണ തീയതി; റീഫണ്ട് ക്രെഡിറ്റിന് എത്ര സമയം ആവശ്യമാണ്?

2025 മാർച്ച് 31 ന് അവസാനിക്കുന്ന സാമ്പത്തിക വർഷത്തിൽ നേടിയ വരുമാനത്തിനുള്ള ആദായനികുതി റിട്ടേണുകൾ (ITR) സമർപ്പിക്കുന്നതിന് അവസാന നിമിഷം ഒരു ദിവസം കൂടി നീട്ടിയതായി സെൻട്രൽ ബോർഡ് ഓഫ് ഡയറക്ട് ടാക്സസ് (CBDT) അറിയിച്ചു. സി.ബി.ഡി.ടി യുടെ ഒരു ദിവസത്തെ പരിമിതമായ വിപുലീകരണം സൂചിപ്പിക്കുന്നത് അവസാന തീയതിയിൽ കൂടുതൽ വിപുലീകരണം ഉണ്ടാകാൻ സാധ്യതയില്ല എന്നാണ്. അതേസമയം ഇന്നലെ ചില പ്രൊഫഷണലുകൾ അടക്കമുളള നികുതിദായകര്‍ റിട്ടേണുകൾ സമർപ്പിക്കുന്നതിന് ഇ-ഫയലിംഗ് പോർട്ടലില്‍ ബുദ്ധിമുട്ടുകൾ നേരിടുന്നതായി സമൂഹമാധ്യമങ്ങളില്‍ വ്യക്തമാക്കി.

ഇതുവരെ ഏഴ് കോടിയിലധികം ഐടിആറുകൾ ഫയൽ ചെയ്തിട്ടുണ്ടെന്ന് റിട്ടേൺ ഫയലിംഗിലെ പുരോഗതിയെക്കുറിച്ച് തിങ്കളാഴ്ച നികുതി അതോറിറ്റി അറിയിച്ചു. റിട്ടേണുകളും ടി.ഡി.എസും സമർപ്പിക്കുന്ന നികുതിദായകരുടെ എണ്ണം ഓരോ വർഷവും ക്രമാനുഗതമായി വർദ്ധിക്കുകയാണ്.

റീഫണ്ട് എപ്പോൾ?

ആദായനികുതി റീഫണ്ട് ലഭിക്കുന്നതിനുള്ള ശരാശരി സമയം സെക്ഷൻ 143(1) പ്രകാരം ഐ.ടി വകുപ്പ് നടത്തുന്ന പരിശോധനകളെ ആശ്രയിച്ചിരിക്കുന്നു. എല്ലാ രേഖകളും കൃത്യമാണെങ്കില്‍ നികുതിദായകര്‍ക്ക് ചെറിയ കാലയളവിനുള്ളിൽ റീഫണ്ട് ലഭിച്ചേക്കാം. അതേസമയം, കിഴിവുകളിലും ഇളവുകളിലും അവലോകനം ചെയ്യാന്‍ ഈ വർഷം പുതിയ പരിശോധനകൾ അവതരിപ്പിച്ചതിനാൽ, അത്തരം ക്ലെയിമുകൾ ഉളള റിട്ടേണുകളില്‍ പ്രോസസിംഗിൽ ചില കാലതാമസങ്ങൾ പ്രതീക്ഷിക്കാം. ചില സന്ദർഭങ്ങളിൽ, തുക 15,000 രൂപയിൽ താഴെയാണെങ്കിൽ ഒരു മണിക്കൂറിനുള്ളിൽ അത് പ്രോസസ് ചെയ്യപ്പെടുകയും അതേ ദിവസം തന്നെ റീഫണ്ട് ബാങ്ക് അക്കൗണ്ടിൽ ക്രെഡിറ്റ് ചെയ്യപ്പെടുകയും ചെയ്യുന്നതാണ്.

എന്നാല്‍, അപേക്ഷകളുടെ നീണ്ട നിര ഉണ്ടാകുന്ന സാഹചര്യത്തിലും റിട്ടേണുകളിൽ വളരെയധികം സങ്കീർണതകൾ ഉണ്ടാകുമ്പോഴും റീഫണ്ട് ക്രെഡിറ്റ് ചെയ്യാൻ സാധാരണയായി ഒരു മാസമോ അതിൽ കൂടുതലോ എടുത്തേക്കാം. കാലതാമസം നികുതിദായകരെ ബുദ്ധിമുട്ടിക്കരുത് എന്ന ഉദ്ദേശത്തോടെ ഏപ്രിൽ 1 മുതൽ ആദായനികുതി വകുപ്പ് 6 ശതമാനം നിരക്കിൽ റീഫണ്ടിന് പലിശ നൽകുന്നുണ്ടെന്ന കാര്യം ശ്രദ്ധിക്കേണ്ടതാണ്.

_{CBDT extends ITR filing deadline by a day; refund timelines depend on return accuracy and verification processes.}