ശരിയായ ലോണുകള്‍ എങ്ങനെ കണ്ടെത്താം, മോശം ലോണുകള്‍ നിങ്ങളുടെ സാമ്പത്തിക സ്ഥിതി തകര്‍ക്കുന്നത് എങ്ങനെ?

ലോണ്‍ എടുക്കുക എന്നത് സാധാരണയായി മോശം കാര്യമായാണ് പരിഗണിക്കുന്നത്. എന്നാല്‍ എല്ലാ ലോണുകളും ഉപയോക്താക്കള്‍ക്ക് വിനാശകരമല്ല. ചില തരത്തിലുള്ള ലോണുകള്‍ യഥാർത്ഥത്തിൽ വ്യക്തിയുടെ സമ്പത്ത് വര്‍ധിപ്പിക്കാന്‍ ഉപകരിക്കുന്നതാണ്. അതേസമയം ചില ലോണുകള്‍ ഉപയോക്താവിന്റെ സാമ്പത്തിക ആരോഗ്യത്തിന് കൂടുതൽ അപകടസാധ്യത സൃഷ്ടിക്കുന്നതാണ്. അതിനാല്‍ നല്ല ലോണും മോശം ലോണും തമ്മിലുള്ള വ്യത്യാസം മനസിലാക്കേണ്ടത് പ്രധാനമാണ്.

ധനകാര്യ സ്ഥാപനങ്ങളില്‍ നിന്ന് കടം വാങ്ങുന്ന പണത്തെയാണ് ലോണ്‍ എന്നു പറയുന്നത്. അവ നിശ്ചിത കാലയളവിനുളളില്‍ തിരിച്ചടയ്ക്കുമെന്ന വ്യവസ്ഥയിലാണ് ലഭിക്കുന്നത്. സാധാരണയായി പലിശ സഹിതമാണ് ഇവ തിരിച്ചടയ്ക്കേണ്ടത്. കടം വാങ്ങിയ പണം നല്ല ലോണാണോ മോശം ലോണാണോ എന്നത്, അത് എങ്ങനെ ഉപയോഗിക്കുന്നു എന്നതിനെയും അതിനായി ബന്ധിപ്പിച്ചിരിക്കുന്ന നിബന്ധനകളെയും ആശ്രയിച്ചിരിക്കുന്നു.

നല്ല ലോണ്‍ എന്നത് മൂല്യം വർദ്ധിപ്പിക്കുന്നതോ, സ്ഥിരമായ വരുമാനം നൽകുന്നതോ ആയ എന്തെങ്കിലുമായിരിക്കണം. അത് നിങ്ങളുടെ ഭാവിയിലേക്കുള്ള ഒരു നിക്ഷേപമായി വേണം കരുതാന്‍.

നല്ല ലോണിന്റെ ഉദാഹരണങ്ങൾ:

വിദ്യാഭ്യാസ വായ്പകൾ: ലോണ്‍ എടുത്ത് പൂര്‍ത്തിയാക്കുന്ന വിദ്യാഭ്യാസത്തിൽ നിന്ന് പലപ്പോഴും ഉണ്ടാകുന്ന വരുമാന വർദ്ധനവും തൊഴിലവസരങ്ങളും മികച്ച ഒരു നിക്ഷേപമെന്ന നിലയില്‍ കണക്കാക്കാം.

ഭവന വായ്പകൾ: മിക്ക റിയൽ എസ്റ്റേറ്റ് വസ്തുക്കളും കാലക്രമേണ മൂല്യം വർദ്ധിപ്പിക്കുന്നതും നികുതി ആനുകൂല്യം നൽകുന്നതും ആയിരിക്കും.

ബിസിനസ് ലോണുകൾ: ലാഭം നേടാൻ കഴിയുന്ന ഒരു സംരംഭം സൃഷ്ടിക്കുന്നതിനോ വികസിപ്പിക്കുന്നതിനോ ആണ് ഇവ ഉപയോഗിക്കുന്നത്.

എന്തുകൊണ്ടാണ് ഇവ നല്ലതായി കണക്കാക്കുന്നത്?

• മറ്റ് പണം കടം വാങ്ങുന്ന മാര്‍ഗങ്ങളെ അപേക്ഷിച്ച്, പുതിയ സമ്പത്ത് സൃഷ്ടിക്കുന്നതിന് കൂടുതല്‍ വഴക്കമുളള ഓപ്ഷനുകൾ ലോണുകള്‍ എടുക്കുന്നത് വാഗ്ദാനം ചെയ്യുന്നു.

• ന്യായമായ പലിശ നിരക്കുകൾ ഇവയുടെ മറ്റൊരു മെച്ചമാണ്.

• ചില സന്ദർഭങ്ങളിൽ പലിശയ്ക്ക് നികുതി കിഴിവുകളും ലഭിക്കുന്നു.

• കൃത്യസമയത്ത് പണമടച്ചാൽ നിങ്ങളുടെ ക്രെഡിറ്റ് ചരിത്രം മെച്ചപ്പെടുത്തുന്നതിനും ഇതിലൂടെ സാധിക്കും.

പെട്ടെന്ന് മൂല്യം കുറയുന്നതോ ദീർഘകാല നേട്ടങ്ങൾ കുറവുള്ളതോ ആയ കാര്യങ്ങള്‍ക്ക് പണം കടം വാങ്ങുന്നതിനെയാണ് മോശം ലോണ്‍ എന്ന് പറയുന്നത്. സാധാരണയായി മോശം ലോണിന് പ്രത്യേകിച്ച് സാമ്പത്തിക വരുമാനങ്ങള്‍ ഉണ്ടാകില്ല. കൂടാതെ ഉയർന്ന പലിശ നിരക്കും ആയിരിക്കും. നന്നായി കൈകാര്യം ചെയ്തില്ലെങ്കിൽ മോശം ലോണ്‍ ഒരു ബാധ്യതയായി മാറിയേക്കാം.

മോശം ലോണിന്റെ ഉദാഹരണങ്ങൾ:

ക്രെഡിറ്റ് കാർഡ്: ആഡംബര വാങ്ങലുകൾക്കായി ക്രെഡിറ്റ് കാർഡില്‍ കടം എടുക്കുന്നത്.

സുരക്ഷിതമല്ലാത്ത പേഴ്സണല്‍ ലോണുകള്‍: ജീവിതശൈലി മെച്ചപ്പെടുത്തുന്നതിനോ അവധിക്കാലം ചെലവഴിക്കുന്നതിനോ വേണ്ടി എടുക്കുന്നത്.

വാഹന വായ്പകൾ: വായ്പ തിരിച്ചടയ്ക്കുന്നതിന് മുമ്പായി ആസ്തി പൂർണമായും മൂല്യത്തകർച്ചയ്ക്ക് വിധേയമാകുകയാണെങ്കില്‍.

എന്തുകൊണ്ടാണ് ഇവ മോശം ലോണായി കണക്കാക്കുന്നത്?

• ഉയർന്ന പലിശ ആയിരിക്കും, എന്നാല്‍ വരുമാനം ഒന്നും ഉണ്ടാകില്ല.

• ഇത്തരം ലോണുകളില്‍ പണമൊഴുക്ക് ഉണ്ടായിരിക്കില്ല.

• ശരിയായി പരിപാലിച്ചില്ലെങ്കിൽ കൂടുതൽ കടത്തിലേക്ക് വഴുതിവീഴാനുളള സാധ്യതകള്‍ ഉണ്ട്.

• നിങ്ങളുടെ ക്രെഡിറ്റ് സ്കോറിനെ പ്രതികൂലമായി ബാധിച്ചേക്കാം.

ലോണ്‍ പൂർണമായും ഒഴിവാക്കുന്നതാണ് നല്ലത് എന്നാണ് പലരുടെയും തെറ്റിധാരണ. ബുദ്ധിപൂർവമായി ലോണ്‍ എടുക്കുന്നത് വ്യക്തിയുടെ സാമ്പത്തിക വളർച്ചയെ ത്വരിതപ്പെടുത്തുന്നതും കൂടുതല്‍ അവസരങ്ങൾ സൃഷ്ടിക്കുന്നതും ആയിരിക്കും.

ലോണ്‍ എങ്ങനെ ബുദ്ധിപൂർവം ഉപയോഗിക്കാം?

നിങ്ങൾക്ക് യഥാർത്ഥത്തിൽ താങ്ങാൻ കഴിയുന്നത് മാത്രം ലോണ്‍ ആയി വാങ്ങുക.

ലോണ്‍ എടുക്കുന്നതിന്റെ പലിശ, ഫീസ്, ചെലവുകൾ എന്നിവ മനസിലാക്കുക .

വ്യക്തിയുടെ ആഗ്രഹത്തേക്കാൾ ആവശ്യത്തിന് മുൻഗണന നൽകുക.

നിങ്ങളുടെ ക്രെഡിറ്റ് ഉപയോഗം പരമാവധി കുറഞ്ഞ നിലയിൽ നിലനിർത്തുക.

കൃത്യസമയത്ത് ബില്ലുകൾ അടയ്ക്കുന്നത് നിങ്ങളുടെ ക്രെഡിറ്റ് ചരിത്രം കെട്ടിപ്പടുക്കാൻ സഹായിക്കുന്നതാണ്.

സാമ്പത്തിക സാക്ഷരത, മിതമായ കടം, ചുരുങ്ങിയ ചെലവ് എന്നിവ വ്യക്തിയെ മോശം ലോണില്‍ നിന്ന് മോചിപ്പിക്കും. നല്ല ലോണിനും മോശം ലോണിനും ഇടയിലുള്ള സൂക്ഷ്മമായ വ്യത്യാസങ്ങൾ മനസ്സിലാക്കുന്നതിലൂടെയാണ് കടം വാങ്ങുന്ന പണം നിങ്ങൾക്ക് ക്രിയാത്മകമായി ഉപയോഗിക്കാന്‍ സാധിക്കുക.

_{Understanding the difference between good and bad loans helps individuals make smarter financial decisions and avoid debt traps.}