പെൻഷൻ തടസമില്ലാതെ വിതരണം ചെയ്യുന്നത് ഉറപ്പാക്കുന്നതിനായി പെൻഷൻകാർ തങ്ങളുടെ ഡിജിറ്റൽ ലൈഫ് സർട്ടിഫിക്കറ്റ് (ജീവൻ പ്രമാൺ) അടിയന്തരമായി സമർപ്പിക്കണമെന്ന് എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷൻ (EPFO). സാങ്കേതികവിദ്യയുടെ സഹായത്തോടെ വീട്ടിലിരുന്നു തന്നെ വളരെ എളുപ്പത്തിൽ ലൈഫ് സർട്ടിഫിക്കറ്റ് സമർപ്പിക്കാനുള്ള സംവിധാനങ്ങൾ ഇ.പി.എഫ്.ഒ ഒരുക്കിയിട്ടുണ്ട്.
സ്മാർട്ട്‌ഫോൺ വഴിയുള്ള ഫെയ്സ് ഓതന്റിക്കേഷൻ (Face Authentication): സ്മാർട്ട്‌ഫോണിൽ ഉമങ് (UMANG) ആപ്പ് ഉപയോഗിച്ച് ജീവൻ പ്രമാൺ സമർപ്പിക്കാം. ആൻഡ്രോയിഡ് 10 അല്ലെങ്കിൽ ഐ.ഒ.എസ് 14 പതിപ്പുകളിലോ അതിനു മുകളിലോ പ്രവർത്തിക്കുന്ന സ്മാർട്ട്‌ഫോണുകളിൽ 'ആധാർ ഫെയ്സ് ആർ.ഡി' (Aadhaar Face RD) സർവീസ് ഉപയോഗിച്ച് അഡിഷണൽ ബയോമെട്രിക് ഉപകരണം ഇല്ലാതെ തന്നെ ഫെയ്സ് ഓതന്റിക്കേഷൻ പൂർത്തിയാക്കാൻ സാധിക്കും.
വീട്ടുപടിക്കൽ തപാൽ ജീവനക്കാരുടെ സേവനം: ഇന്ത്യ പോസ്റ്റ് പേയ്‌മെന്റ് ബാങ്കിന്റെ (IPPB) സൗജന്യ ഡോർസ്റ്റെപ്പ് സേവനത്തിനായി 033-22029000 എന്ന നമ്പറിൽ ബന്ധപ്പെട്ട് പോസ്റ്റ്മാൻ വഴി വീട്ടിലിരുന്ന് സർട്ടിഫിക്കറ്റ് സമർപ്പിക്കാം.
നേരിട്ടുള്ള സമർപ്പണം: തൊട്ടടുത്തുള്ള ഇ.പി.എഫ്.ഒ ഓഫീസുകളിലോ കോമൺ സർവീസ് സെന്ററുകളിലോ (CSC) നേരിട്ടെത്തി സർട്ടിഫിക്കറ്റ് നൽകാവുന്നതാണ്.
ജീവൻ പ്രമാൺ എങ്ങനെ പ്രവർത്തിക്കുന്നു? ആധാർ അധിഷ്ഠിത ബയോമെട്രിക് ഓതന്റിക്കേഷൻ ഉപയോഗിച്ച് പ്രവർത്തിക്കുന്ന ഡിജിറ്റൽ സംവിധാനമാണിത്. സർട്ടിഫിക്കറ്റ് വിജയകരമായി ജനറേറ്റ് ചെയ്തു കഴിഞ്ഞാൽ ലഭിക്കുന്ന തനതായ 'പ്രമാൺ ഐ.ഡി' (Pramaan ID) ഇലക്ട്രോണിക് സംവിധാനത്തിലൂടെ പെൻഷൻ വിതരണ ഏജൻസിക്ക് നേരിട്ട് അയച്ചുനൽകുന്നു. അതിനാൽ ബാങ്കുകളിലോ പോസ്റ്റ് ഓഫീസുകളിലോ ഭൗതിക പകർപ്പുകൾ നേരിട്ട് സമർപ്പിക്കേണ്ടതില്ല.
ജീവൻ പ്രമാൺ ലൈഫ് സർട്ടിഫിക്കറ്റ് ജനറേറ്റ് ചെയ്യുന്നതിന് ആധാർ നമ്പർ അല്ലെങ്കിൽ വെർച്വൽ ഐ.ഡി (Virtual ID) നിർബന്ധമാണ്. കൂടാതെ താഴെ പറയുന്ന വിവരങ്ങൾ കൈവശം കരുതേണ്ടതുണ്ട്:
പെൻഷൻ പേയ്‌മെന്റ് ഓർഡർ (PPO) നമ്പർ
പെൻഷൻ അക്കൗണ്ട് വിവരങ്ങൾ
പെൻഷൻ സാങ്ഷൻ ചെയ്യുന്ന അതോറിറ്റിയുടെ പേര്
പെൻഷൻ വിതരണം ചെയ്യുന്ന ഏജൻസിയുടെ പേര്
സർട്ടിഫിക്കറ്റിന്റെ കാലാവധി: ജീവൻ പ്രമാൺ സർട്ടിഫിക്കറ്റ് വർഷം മുഴുവൻ ഒരുപോലെ പ്രാബല്യത്തിൽ ഉണ്ടാകണമെന്നില്ല. അതത് പെൻഷൻ അതോറിറ്റികളുടെ നിബന്ധനകൾക്കനുസരിച്ചാണ് ഇതിന്റെ കാലാവധി നിശ്ചയിക്കുന്നത്. നിശ്ചിത കാലാവധി കഴിയുമ്പോൾ പുതിയ ഡിജിറ്റൽ ലൈഫ് സർട്ടിഫിക്കറ്റ് ജനറേറ്റ് ചെയ്യേണ്ടതാണ്.
Read DhanamOnline in English
Subscribe to Dhanam Magazine