വരുമാനമോ ശമ്പളമോ വർദ്ധിക്കുന്നത് സാമ്പത്തിക ഭദ്രത നൽകുമെന്ന് കരുതപ്പെടുന്നുണ്ടെങ്കിലും, അത് എപ്പോഴും ഉയർന്ന സമ്പാദ്യത്തിലേക്ക് നയിക്കണമെന്നില്ല. വരുമാനം കൂടുമ്പോൾ അതിനനുസരിച്ച് ജീവിതച്ചെലവുകൾ ഉയരുന്നതിനാൽ യുവാക്കളായ ഉദ്യോഗസ്ഥരിൽ ഭൂരിഭാഗത്തിനും ആവശ്യമായ സമ്പാദ്യം ഉണ്ടാക്കാൻ സാധിക്കുന്നില്ല. നിങ്ങളുടെ സമ്പാദ്യത്തെ അറിഞ്ഞോ അറിയാതെയോ കാർന്നുതിന്നുന്ന 5 പ്രധാന ശീലങ്ങൾ താഴെ പറയുന്നവയാണ്:
വരുമാനത്തിനൊപ്പം ജീവിതച്ചെലവ് കൂട്ടുക (Lifestyle Inflation): ശമ്പള വർദ്ധനവ് ഉണ്ടാകുമ്പോൾ മെച്ചപ്പെട്ട വീട്, ഇടയ്ക്കിടെയുള്ള യാത്രകൾ, ആഡംബര വാങ്ങലുകൾ എന്നിവയ്ക്കായി കൂടുതൽ പണം ചെലവഴിക്കുന്ന രീതിയാണിത്. ഇത് ലഭിക്കുന്ന അധിക വരുമാനത്തിന്റെ ഭൂരിഭാഗവും ഇല്ലാതാക്കുന്നു.
മാസാന്ത്യത്തിൽ ബാക്കിയാകുന്നത് മാത്രം സമ്പാദിക്കുക: ചെലവുകൾ കഴിഞ്ഞ് മാസാന്ത്യത്തിൽ ബാക്കിയാകുന്ന തുക മാത്രം സമ്പാദിക്കാൻ മാറ്റിവെക്കുന്നത് സുസ്ഥിരമായ സമ്പാദ്യ രീതിയെ ബാധിക്കും. അതിനാൽ മാസം തുടക്കത്തിൽ തന്നെ വരുമാനത്തിന്റെ 20-30% വരെ തുക സമ്പാദ്യത്തിനും നിക്ഷേപങ്ങൾക്കുമായി മാറ്റി വെക്കേണ്ടതുണ്ട്.
ആവർത്തന ചെലവുകളുടെ (Recurring Expenses) ആഘാതം നിസാരവത്കരിക്കുക: വായ്പാ ഇ.എം.ഐകൾ, വാടക, സബ്‌സ്‌ക്രിപ്ഷനുകൾ, ഭക്ഷണം ഓർഡർ ചെയ്യൽ, ക്രെഡിറ്റ് കാർഡ് ചെലവുകൾ എന്നിവ മാസം മുഴുവൻ വിഭജിക്കപ്പെട്ടിരിക്കുന്നതിനാൽ ഇവയുടെ ആകെ തുക ബജറ്റിനെ എങ്ങനെ ബാധിക്കുന്നുവെന്ന് തിരിച്ചറിയാൻ വൈകുന്നു.
അടിയന്തര ഫണ്ട് (Emergency Fund) കരുതാതിരിക്കൽ: അപ്രതീക്ഷിത ചികിത്സാ ചെലവുകൾക്കോ സാമ്പത്തിക തടസങ്ങൾക്കോ ആയി കുറഞ്ഞത് 6 മാസത്തെ അവശ്യ ചെലവുകൾക്കുള്ള തുക അടിയന്തര ഫണ്ടായി സൂക്ഷിക്കേണ്ടതുണ്ട്. ഇതിന്റെ അഭാവത്തിൽ ആളുകൾ ദീർഘകാല നിക്ഷേപങ്ങളിൽ നിന്ന് പണം പിൻവലിക്കാനോ ഉയർന്ന പലിശയ്ക്ക് കടമെടുക്കാനോ നിർബന്ധിതരാകുന്നു.
സമ്പാദ്യത്തെ ദീർഘകാല ശീലമാക്കാതെ ഭാരമായി കാണുക: തുടക്കത്തിൽ തന്നെ വലിയൊരു തുക സമ്പാദിക്കാൻ ശ്രമിക്കുന്നത് ദൈനംദിന ആവശ്യങ്ങൾക്ക് ബുദ്ധിമുട്ടുണ്ടാക്കുകയും സമ്പാദ്യം പാതിവഴിയിൽ അവസാനിപ്പിക്കാൻ ഇടയാക്കുകയും ചെയ്യും. 20% സമ്പാദ്യത്തോടെ തുടങ്ങി വരുമാനം ഉയരുന്നതിനനുസരിച്ച് അത് ക്രമേണ 25-30% ആയി വർദ്ധിപ്പിക്കുന്നതാണ് അനുയോജ്യം.
കൃത്യമായ ചെലവ് നിരീക്ഷണത്തിലൂടെയും സാമ്പത്തിക അച്ചടക്കത്തിലൂടെയുമാണ് ദീർഘകാല സാമ്പത്തിക ഭദ്രത ഉറപ്പാക്കാൻ സാധിക്കുക.
Read DhanamOnline in English
Subscribe to Dhanam Magazine
