ആരോഗ്യ ഇൻഷുറൻസ് ക്ലെയിം ചെയ്യുന്ന സമയത്ത് ഉണ്ടാകുന്ന തടസങ്ങളും വൈകലും ഒഴിവാക്കാൻ ഇൻഷുറൻസ് റെഗുലേറ്ററി ആൻഡ് ഡെവലപ്മെന്റ് അതോറിറ്റി ഓഫ് ഇന്ത്യ (IRDAI) ഉപഭോക്താക്കൾക്കായി ചില പ്രധാന അവകാശങ്ങളും സമയപരിധികളും നിർബന്ധമാക്കിയിട്ടുണ്ട്. അവ ഏതൊക്കെയാണെന്ന് പരിശോധിക്കാം.
ക്യാഷ്ലെസ് പ്രീ-അപ്രൂവലിന് 1 മണിക്കൂർ: ആശുപത്രിയിൽ നിന്ന് ഇൻഷുറൻസ് കമ്പനിക്ക് ക്യാഷ്ലെസ് പ്രീ-ഓതറൈസേഷൻ അപേക്ഷ ലഭിച്ചാൽ, 1 മണിക്കൂറിനുള്ളിൽ തീരുമാനമെടുക്കാൻ കമ്പനിക്ക് ബാധ്യതയുണ്ട്.
ഡിസ്ചാർജ് അനുമതിക്ക് 3 മണിക്കൂർ: ചികിത്സയ്ക്ക് ശേഷം ആശുപത്രി ഡിസ്ചാർജ് അപേക്ഷ അയച്ചാൽ 3 മണിക്കൂറിനുള്ളിൽ ഇൻഷുറർ അന്തിമ അനുമതി നൽകണം. ഇൻഷുററുടെ വൈകൽ കാരണം ആശുപത്രി അധിക നിരക്ക് ഈടാക്കിയാൽ ആ തുക ഇൻഷുററുടെ ഷെയർഹോൾഡർ ഫണ്ടിൽ നിന്ന് നൽകേണ്ടിവരും.
5 വർഷത്തെ മൊറട്ടോറിയം പരിരക്ഷ: തുടർച്ചയായി 5 വർഷം (60 മാസം) പോളിസി നിലനിർത്തിയാൽ, ബോധപൂർവമായ തട്ടിപ്പുകൾ (fraud) ഒഴികെയുള്ള മുൻകാല വിവരങ്ങൾ മറച്ചുവെച്ചു എന്ന കാരണത്താൽ ക്ലെയിം നിരസിക്കാൻ ഇൻഷുറർക്ക് സാധിക്കില്ല.
ഒംബുഡ്സ്മാൻ നടപടികളിലെ സമയപരിധി: ക്ലെയിം തർക്കം ഇൻഷുറൻസ് ഒംബുഡ്സ്മാനിൽ എത്തിയാൽ, നോട്ടീസ് ലഭിച്ച് 7 ദിവസത്തിനുള്ളിൽ ഇൻഷുറൻസ് കമ്പനി രേഖകൾ സമർപ്പിക്കണം. വൈകിയാൽ നിലവിലുള്ള വിവരങ്ങളുടെ അടിസ്ഥാനത്തിൽ ഒംബുഡ്സ്മാന് ഏകപക്ഷീയമായി (ex parte) തീരുമാനമെടുക്കാം.
അവാർഡ് നടപ്പിലാക്കാൻ 30 ദിവസം: ഒംബുഡ്സ്മാൻ ഉത്തരവ് ലഭിച്ച് 30 ദിവസത്തിനകം ഇൻഷുറർ അത് നടപ്പിലാക്കണം. വീഴ്ച വരുത്തിയാൽ വൈകുന്ന ഓരോ ദിവസത്തിനും പരാതിക്കാരന് പ്രതിദിനം 5,000 രൂപ പിഴയായി നൽകേണ്ടി വരും.
ഈ അവകാശങ്ങളെക്കുറിച്ചുള്ള കൃത്യമായ ധാരണ അനാവശ്യ വൈകൽ നേരിടുമ്പോൾ ശരിയായ ചോദ്യങ്ങൾ ചോദിക്കാനും ക്ലെയിമുകൾ സുഗമമാക്കാനും ഉപയോക്താക്കളെ സഹായിക്കും.
Read DhanamOnline in English
Subscribe to Dhanam Magazine
