ആരോഗ്യ ഇൻഷുറൻസ് വാങ്ങുന്നുണ്ടോ? ഒപ്പിടുന്നതിന് മുൻപ് പരിശോധിക്കേണ്ട പോളിസി ക്ലോസുകള്‍ എന്തൊക്കെ?

ഇന്ത്യയിൽ വർദ്ധിച്ചുവരുന്ന ചികിത്സാ ചെലവുകൾക്കിടയിൽ ഒരു ആരോഗ്യ ഇൻഷുറൻസ് പോളിസി സ്വന്തമാക്കുന്നത് വളരെ പ്രധാനമാണ്. എന്നാൽ ഉയർന്ന തുകയുടെ ഇൻഷുറൻസ് പരിരക്ഷ (Sum Insured) ഉണ്ടെന്നതുകൊണ്ട് മാത്രം എല്ലാ ആശുപത്രി ചെലവുകളും ക്ലെയിം ചെയ്യാനാകണമെന്നില്ല. പോളിസി രേഖകളിലെ ചില നിബന്ധനകൾ കാരണം ക്ലെയിം തുകയിൽ വലിയൊരു ഭാഗം സ്വന്തം കയ്യിൽ നിന്ന് നൽകേണ്ടി വന്നേക്കാം.

ഇവ ശ്രദ്ധിക്കുക

അതിനാൽ ഒരു പോളിസി തിരഞ്ഞെടുക്കുന്നതിന് മുൻപ് താഴെ പറയുന്ന ക്ലോസുകൾ കൃത്യമായി പരിശോധിക്കേണ്ടതുണ്ട്:

മുറി വാടക പരിധി (Room Rent Capping): പോളിസിയിൽ മുറി വാടകയ്ക്ക് നിശ്ചിത പരിധിയുണ്ടെങ്കിൽ, അതിലും ഉയർന്ന വാടകയുള്ള മുറി തിരഞ്ഞെടുക്കുമ്പോൾ മുറി വാടകയ്ക്ക് പുറമെ ഡോക്ടർ ഫീസ്, നഴ്സിംഗ് ചാർജ് തുടങ്ങിയ ആകെ ആശുപത്രി ബില്ലിലും ആ അനുപാതത്തിൽ തുക വെട്ടിക്കുറയ്ക്കാൻ ഇൻഷുറൻസ് കമ്പനിക്ക് സാധിക്കും.

കൺസ്യൂമബിൾസ് (Consumables): ഗ്ലൗസുകൾ, സിറിഞ്ചുകൾ, മെഡിക്കൽ കിറ്റുകൾ തുടങ്ങിയ സാമഗ്രികളുടെ ചെലവ് പലപ്പോഴും ഇൻഷുറൻസ് പരിരക്ഷയിൽ ഉൾപ്പെടാറില്ല. ഐ.സി.യു പ്രവേശനം പോലുള്ള സന്ദർഭങ്ങളിൽ ഇത് വലിയൊരു തുകയായി മാറിയേക്കാം.

സബ് ലിമിറ്റുകൾ (Sub-limits): തിമിര ശസ്ത്രക്രിയ, മുട്ടുമാറ്റിവെക്കൽ തുടങ്ങിയ ചില പ്രത്യേക ചികിത്സകൾക്ക് ഇൻഷുറൻസ് കമ്പനികൾ നിശ്ചയിച്ചിട്ടുള്ള ഉയർന്ന തുകയുടെ പരിധി പരിശോധിക്കുക.

കോ-പേയ്‌മെന്റ് (Co-payment): മുതിർന്ന പൗരന്മാരുടെയും മാതാപിതാക്കളുടെയും പോളിസികളിൽ സാധാരണയായി കാണുന്ന ഈ ക്ലോസ് പ്രകാരം ചികിത്സാ ബില്ലിന്റെ നിശ്ചിത ശതമാനം തുക രോഗി തന്നെ അടയ്ക്കേണ്ടി വരുന്നു.

ശ്രദ്ധിക്കേണ്ട മറ്റ് കാര്യങ്ങൾ

ഇന്ത്യയിൽ ചികിത്സാ ചെലവുകൾ പ്രതിവർഷം 13-15% നിരക്കിൽ വർദ്ധിക്കുന്നതിനാൽ ബേസ് പോളിസിക്കൊപ്പം കുറഞ്ഞ പ്രീമിയത്തിൽ കൂടുതൽ കവറേജ് നൽകുന്ന സൂപ്പർ ടോപ്പ്-അപ്പ് (Super Top-up) പ്ലാനുകൾ കൂട്ടിചേർക്കുന്നത് ലാഭകരമാണ്. കൂടാതെ തൊഴിൽദാതാവ് നൽകുന്ന ഇൻഷുറൻസിനെ മാത്രം ആശ്രയിക്കാതെ വ്യക്തിഗത പോളിസി നേരത്തെ തന്നെ എടുക്കുന്നതാണ് സുരക്ഷിതം.

പുതിയ നിയന്ത്രണങ്ങളും ആശ്വാസവും: നിലവിലുള്ള രോഗങ്ങളുടെ (Pre-existing conditions) വെയ്റ്റിംഗ് പീരിയഡ് പരമാവധി 36 മാസമായി പരിമിതപ്പെടുത്തിയിട്ടുണ്ട്. കൂടാതെ 60 മാസം മുടങ്ങാതെ പുതുക്കിയ പോളിസികളിൽ തട്ടിപ്പുകൾ ഒഴികെയുള്ള കാരണങ്ങളാൽ ക്ലെയിം നിരസിക്കാൻ കമ്പനികൾക്ക് സാധിക്കില്ല. അതിനാൽ പോളിസി എടുക്കുമ്പോൾ മുൻകാല രോഗവിവരങ്ങൾ കൃത്യമായി വെളിപ്പെടുത്തുന്നത് ഭാവിയിലെ ക്ലെയിം തടസങ്ങൾ ഒഴിവാക്കും.