നോ-കോസ്റ്റ് ഇഎംഐ ശരിക്കും സൗജന്യമാണോ? നിങ്ങൾ അറിയാതെ പോകുന്ന അധിക ചാർജുകൾ ഇവയാണ്

ഓൺലൈൻ ഷോപ്പിംഗ് പ്ലാറ്റ്‌ഫോമുകളിൽ സ്മാർട്ട്‌ഫോണുകൾ, ലാപ്ടോപ്പുകൾ, മറ്റ് ഗൃഹോപകരണങ്ങൾ എന്നിവ വാങ്ങുമ്പോൾ നോ-കോസ്റ്റ് ഇഎംഐ (No-cost EMI) ഇന്ന് സര്‍വ സാധാരണമായി കാണുന്ന ഓപ്ഷനാണ്. പലിശയില്ലാതെ പണമടയ്ക്കാം എന്ന വാഗ്ദാനം ലാഭകരമായി തോന്നുമെങ്കിലും ഇതിൽ പല മറഞ്ഞിരിക്കുന്ന ചെലവുകളും ഉണ്ട്. അവ ഏതൊക്കെയാണെന്ന് പരിശോധിക്കാം.

പ്രധാനമായ മറഞ്ഞിരിക്കുന്ന ചെലവുകൾ

• ഡിസ്കൗണ്ടുകളുടെ നഷ്ടം: ഉൽപ്പന്നം മുഴുവൻ പണമടച്ചു വാങ്ങുമ്പോൾ ലഭിക്കുന്ന ഇൻസ്റ്റന്റ് കാർഡ് ഡിസ്കൗണ്ടുകളോ ക്യാഷ്ബാക്ക് ഓഫറുകളോ നോ-കോസ്റ്റ് ഇഎംഐ തിരഞ്ഞെടുക്കുമ്പോൾ പലപ്പോഴും പ്ലാറ്റ്‌ഫോമുകൾ ഒഴിവാക്കാറുണ്ട്. അതായത്, പലിശ നൽകുന്നില്ലെങ്കിലും ഉൽപ്പന്നത്തിന് യഥാർത്ഥത്തിൽ നിങ്ങൾ കൂടുതൽ വില നൽകേണ്ടി വരുന്നു.

• പ്രോസസിംഗ് ഫീസും ജിഎസ്ടിയും: മിക്ക ബാങ്കുകളും ഒരു നിശ്ചിത പ്രോസസിംഗ് ഫീസോടെയാണ് പർച്ചേസുകൾ ഇഎംഐ ആക്കി മാറ്റുന്നത്. കൂടാതെ പലിശ തുക 'സെല്ലർ' ഡിസ്കൗണ്ടായി നൽകുന്നുണ്ടെങ്കിലും, ആ പലിശ തുകയ്ക്ക് മേൽ ഈടാക്കുന്ന ജിഎസ്ടി (GST) ഉപഭോക്താവ് തന്നെ നൽകേണ്ടി വരും.

• ക്രെഡിറ്റ് എക്സ്പോഷർ: ഓരോ ഇഎംഐയും ഒരു വായ്പയായാണ് (Loan) കണക്കാക്കുന്നത്. ഒന്നിലധികം ഇഎംഐകൾ ഒരേസമയം എടുക്കുന്നത് നിങ്ങളുടെ ക്രെഡിറ്റ് എക്സ്പോഷർ വർദ്ധിപ്പിക്കുകയും ഭാവിയിൽ ഹോം ലോൺ അല്ലെങ്കിൽ കാർ ലോൺ ലഭിക്കാനുള്ള സാധ്യതയെ ബാധിക്കുകയും ചെയ്യും.

നോ-കോസ്റ്റ് ഇഎംഐ എന്നത് സൗകര്യപ്രദമായ ഒരു സാമ്പത്തിക സാധ്യതയാണെങ്കിലും, അത് പൂർണമായും സൗജന്യമല്ല. അതിനാൽ, മുൻകൂട്ടി പണമടയ്ക്കുമ്പോഴുള്ള ആകെ ചെലവും ഇഎംഐ വഴി നൽകേണ്ടി വരുന്ന ആകെ തുകയും തമ്മിൽ താരതമ്യം ചെയ്ത ശേഷം മാത്രമായിരിക്കണം ഉപയോക്താക്കള്‍ തീരുമാനമെടുക്കേണ്ടതെന്ന കാര്യം പ്രത്യേകം ശ്രദ്ധിക്കുക.

_{No-cost EMI schemes often hide extra charges like processing fees, GST, and discount losses—making them not truly free.}