ഇന്ത്യയില് അതിവേഗം വളരുന്ന ഒരു പുതിയ വിഭാഗത്തെ കുറിച്ചാണ് സാമ്പത്തിക വിദഗ്ധരും പേഴ്സണല് ഫിനാന്സ് മേഖലയിലുള്ളവരും ഇപ്പോള് കൂടുതല് ചര്ച്ച ചെയ്യുന്നത്. 'ലാപ്ടോപ് ക്ലാസ്' എന്നറിയപ്പെടുന്ന ഈ വിഭാഗത്തില് പ്രധാനമായും ഐടി, ഫിനാന്സ്, കണ്സള്ട്ടിങ്, കോര്പറേറ്റ് മേഖലകളില് ജോലി ചെയ്യുന്നവരാണ്. വര്ഷത്തില് 15 ലക്ഷം മുതല് 75 ലക്ഷം രൂപ വരെ വരുമാനമുള്ള, നഗരങ്ങളിലെ ശമ്പളജീവികള്.
ഉയര്ന്ന ശമ്പളമുള്ളവരാണെങ്കിലും സാമ്പത്തിക സുരക്ഷയുടെ കാര്യത്തില് ഇവര് കൂടുതല് സമ്മര്ദം നേരിടുകയാണെന്നാണ് വിലയിരുത്തല്. നികുതി ഭാരം, ഉയരുന്ന ജീവിതച്ചെലവ്, ജോലി അനിശ്ചിതത്വം, കുറഞ്ഞ സമ്പാദ്യം എന്നിവയാണ് പ്രധാന വെല്ലുവിളികള്.
പ്രധാനമായും മെട്രോ നഗരങ്ങളിലെ വൈറ്റ്-കോളര് ജീവനക്കാര്. വാര്ഷിക വരുമാനം 15-75 ലക്ഷം രൂപ. ഉയര്ന്ന നികുതി അടയ്ക്കുന്ന ശമ്പളവിഭാഗം. സര്ക്കാര് സബ്സിഡികള്ക്ക് അര്ഹതയില്ലാത്തവരും നിരവധി നികുതി ഇളവുകളില് നിന്ന് പ്രയോജനം ലഭിക്കാത്തവരുമാണ് ഇവര്. ഈ വിഭാഗം രാജ്യത്തെ വരുമാന നികുതിയുടെ വലിയൊരു വിഹിതം വഹിക്കുന്നുണ്ടെങ്കിലും സര്ക്കാര് ക്ഷേമപദ്ധതികളില് നിന്ന് കാര്യമായ നേട്ടങ്ങള് ലഭിക്കാറില്ലെന്നാണ് വിമര്ശനം. ഈ വിഭാഗം നേരിടുന്ന മൂന്ന് വലിയ സാമ്പത്തിക വെല്ലുവിളികള് ഇവയാണ്:
1. ജോലി സുരക്ഷ കുറഞ്ഞുവരുന്നു: സാങ്കേതിക വിദ്യ അതിവേഗം മാറുകയാണ്. ആര്ട്ടിഫിഷ്യല് ഇന്റലിജന്സ്, ഓട്ടോമേഷന് എന്നിവ പല ജോലികളുടെയും സ്വഭാവം മാറ്റുകയാണ്. നിരവധി മേഖലകളില് പുതിയ നിയമനങ്ങള് കുറഞ്ഞു. പരിചയസമ്പന്നരായ ജീവനക്കാര്ക്കും കടുത്ത മത്സരം. ഒരു ശമ്പളത്തെ മാത്രം ആശ്രയിക്കുന്നത് കൂടുതല് അപകടകരമാകുന്നു. ഇനി ഉയര്ന്ന ശമ്പളം മാത്രം ജോലി സുരക്ഷ ഉറപ്പാക്കുന്നില്ല.
2. വരുമാനം കൂടുമ്പോഴും സമ്പാദ്യം കുറയുന്നു: ഉയര്ന്ന ശമ്പളമുണ്ടെന്നത് സമ്പന്നനാണെന്നതിന് തെളിവല്ല. കാരണം, ജീവിതശൈലി ചെലവുകള് ഉയരുന്നു.
വീടുവായ്പ, വാഹനവായ്പ, ക്രെഡിറ്റ് കാര്ഡ് ഇഎംഐകള് വര്ധിക്കുന്നു. കുട്ടികളുടെ വിദ്യാഭ്യാസവും ആരോഗ്യച്ചെലവും ഉയരുന്നു. ഉയര്ന്ന വരുമാനത്തിന്റെ വലിയൊരു ഭാഗം ചെലവിലേക്ക് പോകുന്നു. ഫലമായി ദീര്ഘകാല സമ്പത്ത് സൃഷ്ടിക്കുന്നതിനുള്ള നിക്ഷേപം പലര്ക്കും പരിമിതപ്പെടുന്നു.
3. പാസീവ് ഇന്കത്തിനു പിന്നാലെ ഓട്ടം: ഓഹരി വിപണി, റിയല് എസ്റ്റേറ്റ്, ട്രേഡിങ്, ഡിജിറ്റല് ആസ്തികള് എന്നിവയിലൂടെ വേഗത്തില് അധിക വരുമാനം നേടാന് പലരും ശ്രമിക്കുന്നു. എന്നാല്, ശക്തമായ സാമ്പത്തിക അടിത്തറയില്ലാതെ ഉയര്ന്ന റിസ്ക് എടുക്കുന്നത് നഷ്ടത്തിലേക്ക് നയിക്കാം. സമ്പത്ത് ഉണ്ടാകുന്നത് ഒറ്റ രാത്രികൊണ്ടല്ല. സ്ഥിരതയുള്ള നിക്ഷേപവും ദീര്ഘകാല കാഴ്ചപ്പാടുമാണ് യഥാര്ഥ സമ്പത്ത് സൃഷ്ടിക്കുന്നത്.
1. പുതിയ കഴിവുകളില് തുടര്ച്ചയായി നിക്ഷേപിക്കുക. വരുമാനം വര്ധിപ്പിക്കാന് ഏറ്റവും വലിയ നിക്ഷേപം സ്വന്തം കഴിവുകളാണ്.
2. ഒന്നിലധികം വരുമാന സ്രോതസുകള് സൃഷ്ടിക്കുക. ഒറ്റ ശമ്പളത്തെ മാത്രം ആശ്രയിക്കാതെ, പതുക്കെ അധിക വരുമാന മാര്ഗങ്ങള് വികസിപ്പിക്കുക.
3. ആദ്യം എമര്ജന്സി ഫണ്ട് ഒരുക്കുക. അപ്രതീക്ഷിത ജോലി നഷ്ടമോ ആരോഗ്യപ്രശ്നങ്ങളോ നേരിടാന് കുറഞ്ഞത് 6-12 മാസത്തെ ചെലവിനുള്ള തുക മാറ്റിവയ്ക്കണം.
4. ദീര്ഘകാല നിക്ഷേപം ശീലമാക്കുക. വിപണിയിലെ ദിവസേനയുള്ള ഉയര്ച്ച-താഴ്ചകളെ പിന്തുടരാതെ, എസ്ഐപി പോലുള്ള ക്രമബദ്ധമായ നിക്ഷേപം തുടരുക.
5. കോമ്പൗണ്ടിംഗ് വളര്ച്ചയുടെ ശക്തി പ്രയോജനപ്പെടുത്തുക. നിക്ഷേപം വളരാന് അനുവദിക്കുന്നതാണ് ദീര്ഘകാല സമ്പത്ത് സൃഷ്ടിയുടെ പ്രധാന രീതി.
ഉയര്ന്ന ശമ്പളം മാത്രം കൊണ്ട് സാമ്പത്തിക സ്വാതന്ത്ര്യം ഉറപ്പാക്കാവുന്ന കാലമല്ല ഇത്. തൊഴില്വിപണിയിലെ മാറ്റങ്ങള്, ഉയരുന്ന ചെലവുകള്, വര്ധിക്കുന്ന നികുതി ഭാരം എന്നിവ്ക്കിടയില് സാമ്പത്തിക സുരക്ഷ ഉറപ്പാക്കാന് നൈപുണ്യ വികസനം, നിയന്ത്രിത ചെലവ്, ദീര്ഘകാല നിക്ഷേപം, ഒന്നിലധികം വരുമാന സ്രോതസുകള് എന്നിവ അനിവാര്യമാണ്.
ശമ്പളം നിങ്ങളുടെ മാസച്ചെലവുകള് നിറവേറ്റും. നിങ്ങളുടെ കഴിവുകള് വരുമാനം വര്ധിപ്പിക്കും. നിങ്ങളുടെ നിക്ഷേപങ്ങളാണ് സാമ്പത്തിക സ്വാതന്ത്ര്യം സൃഷ്ടിക്കുന്നത്.
Read DhanamOnline in English
Subscribe to Dhanam Magazine
