40 വയസ് കഴിഞ്ഞിട്ടും വിരമിക്കൽ കാലത്തേക്ക് വേണ്ടത്ര സമ്പാദ്യം കൈവശമില്ല എന്നത് പലരെയും ആശങ്കപ്പെടുത്തുന്ന കാര്യമാണ്. നിക്ഷേപങ്ങൾ "നേരത്തെ തുടങ്ങുക" എന്ന പരമ്പരാഗത ഉപദേശം പാലിക്കാൻ സാധിച്ചില്ലെങ്കിലും, ഈ ഘട്ടത്തിൽ നിങ്ങൾക്ക് ചില പ്രത്യേക ഗുണങ്ങളുണ്ട്. ഉയർന്ന വരുമാന ശേഷി, ജീവിതത്തിലെ മുൻഗണനകളെക്കുറിച്ചുള്ള വ്യക്തത, അനാവശ്യമായ സാമ്പത്തിക പരീക്ഷണങ്ങൾ ഒഴിവാക്കാനുള്ള അനുഭവസമ്പത്ത് എന്നിവ ഈ പ്രായത്തിന്റെ പ്രത്യേകതയാണ്. ശരിയായ പ്ലാനിംഗിലൂടെ കരുത്തുറ്റ ഒരു വിരമിക്കൽ ഫണ്ട് ഇനിയും കെട്ടിപ്പടുക്കാൻ സാധിക്കും.
അതിനായി സ്വീകരിക്കേണ്ട പ്രധാന നടപടികൾ താഴെ പറയുന്നവയാണ്:
1. വൈകിപ്പോയി എന്ന ചിന്ത മാറ്റുക: മാനസികമായ തടസമാണ് ഏറ്റവും വലുത്. വിരമിക്കാൻ ഇനിയും 15 മുതൽ 25 വർഷം വരെ സമയമുണ്ടെങ്കിൽ, അത് മികച്ചൊരു സമ്പാദ്യം ഉണ്ടാക്കാൻ പര്യാപ്തമാണ്. വിരമിക്കൽ നിക്ഷേപത്തെ മാസാവസാനം മിച്ചം വരുന്ന തുകയായി കാണാതെ, മാറ്റിവെക്കാനാവാത്ത ഒരു പ്രധാന ചെലവായി (Non-negotiable) പരിഗണിച്ച് ഇതിനായി ആദ്യം തന്നെ തുക നീക്കിവെക്കുക.
2. സമ്പാദ്യ നിരക്ക് വർദ്ധിപ്പിക്കുക: നിക്ഷേപങ്ങളിൽ നിന്നുള്ള ലാഭത്തേക്കാൾ (Returns) പ്രാധാന്യം നിങ്ങൾ മാറ്റിവെക്കുന്ന തുകയ്ക്കാണ്. ശമ്പള വർദ്ധനവ്, ബോണസ് എന്നിവ ലഭിക്കുമ്പോൾ അവ നിക്ഷേപത്തിലേക്ക് തിരിച്ചുവിടുക. കൂടാതെ, വായ്പകൾ തീരുന്നത് വഴിയോ കുട്ടികൾ സാമ്പത്തികമായി സ്വതന്ത്രരാകുന്നത് വഴിയോ ലാഭിക്കാൻ കഴിയുന്ന തുകയും വിരമിക്കൽ നിക്ഷേപത്തിനായി ഉപയോഗിക്കണം.
3. ഇക്വിറ്റി ഫണ്ടുകൾ പ്രയോജനപ്പെടുത്തുക: വിരമിക്കാൻ സമയം കുറവാണെന്ന് കരുതി പണം മുഴുവൻ സുരക്ഷിതമായ നിക്ഷേപങ്ങളിൽ മാത്രം ഇടുന്നത് പണപ്പെരുപ്പത്തെ (Inflation) മറികടക്കാൻ സഹായിക്കില്ല. പോർട്ട്ഫോളിയോയുടെ ഒരു ഭാഗം ഇക്വിറ്റി ഫണ്ടുകൾ പോലുള്ള 'ഗ്രോത്ത് അസറ്റുകളിൽ' നിക്ഷേപിക്കണം. വിരമിക്കൽ കാലം അടുക്കുമ്പോൾ മാത്രം ഇവ സുരക്ഷിതമായ നിക്ഷേപങ്ങളിലേക്ക് പടിപടിയായി മാറ്റിയാൽ മതിയാകും.
4. ശരിയായ നിക്ഷേപ മാര്ഗങ്ങൾ തിരഞ്ഞെടുക്കുക: പ്രൊവിഡന്റ് ഫണ്ട് (PF), പെൻഷൻ സ്കീമുകൾ, നികുതി ഇളവുള്ള റിട്ടയർമെന്റ് പ്ലാനുകൾ എന്നിവയിൽ പരമാവധി നിക്ഷേപിക്കുക. ഇത്തരം പദ്ധതികൾ നിക്ഷേപങ്ങളിൽ അച്ചടക്കം കൊണ്ടുവരാൻ സഹായിക്കും.
5. സുരക്ഷാ കവചം ഉറപ്പാക്കുക: അപ്രതീക്ഷിതമായ ചികിത്സാ ചെലവുകൾ വിരമിക്കൽ സമ്പാദ്യത്തെ ബാധിക്കാതിരിക്കാൻ മതിയായ ഹെൽത്ത് ഇൻഷുറൻസും എമർജൻസി ഫണ്ടും കരുതിവെക്കണം. ഇത് നിങ്ങളുടെ നിക്ഷേപ പദ്ധതികളെ തടസമില്ലാതെ മുന്നോട്ട് കൊണ്ടുപോകാൻ സഹായിക്കും.
എല്ലാ തീരുമാനങ്ങളും പെർഫെക്റ്റ് ആകണമെന്നില്ല, മറിച്ച് ലക്ഷ്യത്തിലേക്കുള്ള സ്ഥിരതയാർന്ന പ്രവർത്തനമാണ് (Consistency) പ്രധാനം. ഭാവിയിൽ നിങ്ങൾക്ക് വേണ്ട ജീവിതശൈലി മുൻകൂട്ടി കണ്ട് അതിനനുസരിച്ചുള്ള ലക്ഷ്യങ്ങൾ നിശ്ചയിക്കുക. 40 കളിൽ വിരമിക്കല് സമ്പാദ്യം തുടങ്ങുന്നത് അത്ര ആകർഷകമായി തോന്നില്ലെങ്കിലും, വ്യക്തമായ പ്ലാനിംഗിലൂടെ സാമ്പത്തിക സ്വാതന്ത്ര്യം നേടുന്നത് അസാധ്യമല്ല.
Read DhanamOnline in English
Subscribe to Dhanam Magazine
