നിങ്ങളുടെ ബാങ്ക് അക്കൗണ്ട് ബ്ലോക്ക് ആയോ? മരവിപ്പിച്ച അക്കൗണ്ട് എങ്ങനെ വീണ്ടും സജീവമാക്കാം?

ബാങ്ക് അക്കൗണ്ട് മരവിപ്പിക്കുന്നത് വലിയൊരു സാമ്പത്തിക പ്രതിസന്ധിയായി തോന്നാമെങ്കിലും, മിക്കപ്പോഴും ഇത് കേവലം പേപ്പർ വർക്കുകളുമായി ബന്ധപ്പെട്ട പ്രശ്നമായിരിക്കും. നിങ്ങളുടെ ബാങ്ക് അക്കൗണ്ട് ഫ്രീസ് ചെയ്താൽ ആദ്യം ചെയ്യേണ്ടത് ബാങ്കിന്റെ മൊബൈൽ ആപ്പ് പരിശോധിച്ച് അതിന്റെ തരം തിരിച്ചറിയുകയും കാരണം കണ്ടെത്തുകയും ചെയ്യുക എന്നതാണ്. ആപ്പിൽ "ഡെബിറ്റ് ബ്ലോക്ക്ഡ്" (Debit blocked) അല്ലെങ്കിൽ "കംപ്ലയൻസ് റെസ്‌ട്രിക്ഷൻ" (Restricted due to compliance) എന്നിങ്ങനെയുള്ള വിവരങ്ങൾ കണ്ടേക്കാം. ആപ്പ് വഴി വ്യക്തമായ വിവരം ലഭ്യമല്ലെങ്കിൽ ബാങ്കിന്റെ കസ്റ്റമർ കെയറിലോ ബ്രാഞ്ചിലോ ബന്ധപ്പെട്ട് എന്താണ് ഇത്തരമൊരു നടപടിക്ക് പ്രേരിപ്പിച്ചതെന്ന് കൃത്യമായി ചോദിച്ചറിയണം.

കാരണങ്ങള്‍ കണ്ടെത്തുക

കെവൈസി (KYC) രേഖകൾ പുതുക്കാത്തതാണ് അക്കൗണ്ട് മരവിപ്പിക്കാനുള്ള ഏറ്റവും സാധാരണമായ കാരണം. ആധാർ റീ-വെരിഫിക്കേഷൻ, പാൻ ലിങ്ക് ചെയ്യൽ അല്ലെങ്കിൽ വിലാസം മാറിയത് തുടങ്ങിയവ ഇതിന് കാരണമാകാം. ഇത്തരം സാഹചര്യത്തിൽ ആവശ്യമായ രേഖകൾ സമർപ്പിക്കുക, രേഖകൾ നൽകിക്കഴിഞ്ഞാൽ സാധാരണയായി 2 മുതൽ 5 പ്രവൃത്തി ദിവസത്തിനുള്ളിൽ അക്കൗണ്ട് പുനഃസ്ഥാപിക്കപ്പെടും.

അക്കൗണ്ടിലേക്ക് അസാധാരണമായ രീതിയിൽ വലിയ തുകകൾ വരികയോ ഉയർന്ന മൂല്യമുള്ള ഇടപാടുകൾ ആവർത്തിച്ച് നടക്കുകയോ ചെയ്താൽ ബാങ്ക് വിശദീകരണം ആവശ്യപ്പെട്ടേക്കാം. ഈ സാഹചര്യത്തിൽ പണത്തിന്റെ ഉറവിടം (ശമ്പളം, വസ്തു വിൽപന, ബിസിനസ് രസീതുകൾ തുടങ്ങിയവ) വ്യക്തമാക്കുന്ന രേഖകൾ ഉടൻ നൽകുന്നത് അക്കൗണ്ട് വേഗത്തിൽ സജീവമാക്കാൻ സഹായിക്കും. ആദായനികുതി നോട്ടീസ് അല്ലെങ്കിൽ കോടതി ഉത്തരവ് വഴിയാണ് അക്കൗണ്ട് മരവിപ്പിച്ചതെങ്കിൽ, ബന്ധപ്പെട്ട അധികാരികളിൽ നിന്ന് ക്ലിയറൻസ് വാങ്ങിയ ശേഷം അതിന്റെ രേഖകൾ ബാങ്കിന് നൽകേണ്ടതുണ്ട്.

അക്കൗണ്ട് മരവിപ്പിച്ചിരിക്കുന്ന സമയത്ത് ദൈനംദിന ആവശ്യങ്ങൾക്കായി മറ്റൊരു അക്കൗണ്ട് ഉപയോഗിക്കുകയോ ശമ്പളം താൽക്കാലികമായി മറ്റൊരു അക്കൗണ്ടിലേക്ക് മാറ്റാൻ ആവശ്യപ്പെടുകയോ ചെയ്യാം. ബാങ്ക് നൽകിയ സമയപരിധിക്കുള്ളിൽ നടപടി ഉണ്ടായില്ലെങ്കിൽ ബാങ്കിന്റെ ഗ്രീവൻസ് സെല്ലിനെയോ നോഡൽ ഓഫീസറെയോ ബന്ധപ്പെടാവുന്നതാണ്. അവിടെയും പരിഹാരമായില്ലെങ്കിൽ മാത്രം ബാങ്കിംഗ് ഓംബുഡ്‌സ്മാനെ സമീപിക്കുക. ബാങ്ക് ചോദിക്കുന്ന ചോദ്യങ്ങൾക്ക് മറുപടി നൽകാതിരിക്കുന്നത് നടപടികൾ കൂടുതൽ വൈകിപ്പിക്കാൻ മാത്രമേ സഹായിക്കൂ.

_{A practical guide on how to identify the reasons for a frozen bank account and the steps to reactivate it quickly.}