യു.പി.ഐ (UPI) വഴി ഉയർന്ന തുകകളുടെ വിനിമയം നടത്തുന്നതുകൊണ്ടു മാത്രം ആദായനികുതി വകുപ്പിൽ നിന്ന് നോട്ടീസ് വരണമെന്നില്ല. എന്നാൽ വ്യക്തികൾ പ്രഖ്യാപിച്ച വരുമാനത്തിന് അനുയോജ്യമല്ലാത്ത രീതിയിൽ ബാങ്ക് അക്കൗണ്ടിൽ വലിയ തുകകൾ എത്തുമ്പോൾ അതിൻ്റെ സ്രോതസ് വ്യക്തമാക്കാൻ നികുതി അധികൃതർ ആവശ്യപ്പെട്ടേക്കാം.
പണമായി (cash) നടത്തുന്ന നിക്ഷേപങ്ങൾക്ക് സേവിംഗ്സ് അക്കൗണ്ടിൽ പ്രതിവർഷം 10 ലക്ഷം രൂപയും കറൻ്റ് അക്കൗണ്ടിൽ 50 ലക്ഷം രൂപയുമാണ് സ്റ്റേറ്റ്മെന്റ് ഓഫ് ഫിനാൻഷ്യൽ ട്രാൻസാക്ഷൻസ് (SFT) പ്രകാരം റിപ്പോർട്ട് ചെയ്യപ്പെടാനുള്ള പരിധി. എന്നാൽ ഈ പരിധികൾ യു.പി.ഐ, എൻ.ഇ.എഫ്.ടി (NEFT), ആർ.ടി.ജി.എസ് (RTGS) പോലെയുള്ള ഡിജിറ്റൽ കൈമാറ്റങ്ങൾക്ക് ബാധകമല്ല.
യു.പി.ഐയിൽ സാധാരണയായി എന്‍.പി.സി.ഐയും (NPCI) ബാങ്കുകളും നിശ്ചയിക്കുന്ന പ്രതിദിന പരിധികൾ ഒരു ഇടപാടിന് 1 ലക്ഷം രൂപ വരെയാണ്. യുപിഐ ഇടപാട് പരിധികൾ എൻപിസിഐയും ബാങ്കും കാറ്റഗറി അനുസരിച്ച് നിശ്ചയിക്കുന്നു, അവ ആദായനികുതി റിപ്പോർട്ടിംഗ് പരിധികൾ അല്ല. 2025 ലെ ആദായനികുതി നിയമത്തിലെ സെക്ഷൻ 102 പ്രകാരം കൃത്യമായ സ്രോതസ് കാണിക്കാൻ സാധിക്കാത്ത തുകകൾക്ക് നികുതി നടപടികൾ നേരിടേണ്ടി വന്നേക്കാം. ഇത്തരത്തിലുള്ള തുക 60,000 രൂപ ആയാലും 6 ലക്ഷം രൂപ ആയാലും സ്രോതസ് തെളിയിക്കേണ്ടതുണ്ട്.
വ്യാപാര-വ്യക്തിഗത വിനിമയങ്ങൾ: ഫ്രീലാൻസർമാർ, ട്യൂട്ടർമാർ, ചെറുകിട വ്യാപാരികൾ എന്നിവർ ബിസിനസ് ആവശ്യങ്ങൾക്കും വ്യക്തിഗത ആവശ്യങ്ങൾക്കും ഒരേ യു.പി.ഐ ഐഡി ഉപയോഗിക്കുന്നത് നികുതി പരിശോധനകളിൽ സങ്കീർണതകൾ സൃഷ്ടിക്കും. അതിനാൽ ബിസിനസ് ആവശ്യങ്ങൾക്ക് പ്രത്യേക അക്കൗണ്ട് സൂക്ഷിക്കുന്നത് ഉചിതമാണ്.
മറ്റുള്ളവർക്കായി പണം കൈമാറൽ: സുഹൃത്തുക്കൾക്കോ ബന്ധുക്കൾക്കോ വേണ്ടി പണം വാങ്ങി മറ്റ് അക്കൗണ്ടുകളിലേക്ക് നിരന്തരം കൈമാറുന്നത് സംശയാസ്പദമായ ഇടപാടുകളായി കണക്കാക്കപ്പെടാം. സ്വന്തം വരുമാനമല്ലാത്ത തുകകൾ പതിവായി അക്കൗണ്ട് വഴി സ്വീകരിച്ച് കൈമാറുന്നുവെങ്കിൽ അവയുടെ ഉറവിടവും ഉദ്ദേശ്യവും തെളിയിക്കുന്ന രേഖകൾ സൂക്ഷിക്കുന്നത് ഉചിതമാണ്.
യു.പി.ഐ വഴി ലഭിക്കുന്ന വിനിമയങ്ങളുടെ രേഖകൾ, ഇൻവോയ്‌സുകൾ, ബാങ്ക് സ്റ്റേറ്റ്‌മെന്റുകൾ എന്നിവ കൃത്യമായി സൂക്ഷിക്കുന്നത് ഭാവിയിലെ നികുതി തടസങ്ങൾ ഒഴിവാക്കാൻ സഹായിക്കും.
Read DhanamOnline in English
Subscribe to Dhanam Magazine
