ഇൻഷുറൻസ് പ്രീമിയം കൃത്യസമയത്ത് അടച്ചാൽ മാത്രം ക്ലെയിം തുക ലഭിക്കുമെന്നാണ് മിക്കവാറും എല്ലാ പോളിസി ഉടമകളുടെയും വിശ്വാസം. എന്നാൽ പലപ്പോഴും ഒഴിവാക്കാവുന്ന പിഴവുകൾ, വിവരങ്ങൾ കൃത്യമായി നൽകാതിരിക്കൽ, പോളിസിയിലെ നിബന്ധനകൾ ശ്രദ്ധിക്കാത്തത് എന്നിവ കാരണം ഇൻഷുറൻസ് കമ്പനികൾ പതിവായി ക്ലെയിമുകൾ തള്ളാറുണ്ട്. ക്ലെയിമുകൾ നിരസിക്കപ്പെടാനുളള പ്രധാന കാരണങ്ങളും അവയ്ക്കുള്ള പരിഹാരങ്ങളുമാണ് ഇവിടെ പരിശോധിക്കുന്നത്.
1. ആരോഗ്യ ചരിത്രം വെളിപ്പെടുത്താതിരിക്കുന്നത്: ആരോഗ്യ, ലൈഫ് ഇൻഷുറൻസ് ക്ലെയിമുകൾ തള്ളാനുള്ള ഏറ്റവും വലിയ കാരണമാണിത്. തൈറോയ്ഡ് പ്രശ്നങ്ങൾ, രക്താതിമർദം (Hypertension), പഴയ ശസ്ത്രക്രിയകൾ തുടങ്ങിയവ 'മെറ്റീരിയൽ ഇൻഫർമേഷൻ' ആയി കണക്കാക്കപ്പെടുന്നു. ഇവ പോളിസി എടുക്കുമ്പോൾ മറച്ചുവെച്ചാൽ നിയമപരമായി ക്ലെയിം തള്ളാൻ കമ്പനിക്ക് അധികാരമുണ്ട്. അതിനാൽ എത്ര നിസാരമെന്ന് തോന്നിയാലും ആരോഗ്യവിവരങ്ങൾ കൃത്യമായി വെളിപ്പെടുത്തുക.
2. സജീവമല്ലാത്ത പോളിസികൾ: ഇൻഷുറൻസ് പരിരക്ഷ ലഭിക്കാൻ സംഭവസമയത്ത് പോളിസി സജീവമായിരിക്കണം. ഒരു ദിവസത്തെ പ്രീമിയം മുടങ്ങിയാൽ പോലും പോളിസി അസാധുവാകാം. ഇത് ഒഴിവാക്കാൻ പുതുക്കൽ ഓർമ്മപ്പെടുത്തലുകൾ ശ്രദ്ധിക്കുകയും ഓട്ടോ-ഡെബിറ്റ് സംവിധാനം ഉപയോഗിച്ച് പോളിസി സജീവമായി നിലനിർത്തുകയും ചെയ്യുക.
3. സമയപരിധി പാലിക്കാതിരിക്കൽ: ക്ലെയിം റിപ്പോർട്ട് ചെയ്യാൻ കമ്പനികൾ കർശനമായ സമയപരിധി നിശ്ചയിച്ചിട്ടുണ്ട്. ഉദാഹരണത്തിന്, ആശുപത്രിയിൽ പ്രവേശിപ്പിച്ചാൽ 24 മണിക്കൂറിനുള്ളിൽ വിവരം അറിയിക്കണം. താമസിച്ച് വിവരം നൽകുന്നത് ക്ലെയിമിന്റെ ആധികാരികത ചോദ്യം ചെയ്യാൻ കമ്പനിയെ അനുവദിക്കുന്നു.
4. ഒഴിവാക്കലുകൾ (Exclusions) ശ്രദ്ധിക്കാത്തത്: എല്ലാ ഇൻഷുറൻസ് പോളിസികളിലും ചില ചികിത്സകൾക്കോ സാഹചര്യങ്ങൾക്കോ പരിരക്ഷ ലഭിക്കില്ല. ഉദാഹരണത്തിന് സാഹസിക വിനോദങ്ങളിലെ പരിക്കുകൾക്കോ പ്രസവ ചികിത്സയ്ക്കോ മിക്ക സ്റ്റാൻഡേർഡ് പോളിസികളിലും പരിരക്ഷ ഉണ്ടാകില്ല. ഇത്തരം ഒഴിവാക്കലുകൾ മുൻകൂട്ടി വായിച്ച് മനസിലാക്കുക.
5. രേഖകളുടെ അഭാവം: ആശുപത്രി ബില്ലുകൾ, ഡിസ്ചാർജ് സമ്മറി, അപകടമരണമാണെങ്കിൽ എഫ്.ഐ.ആർ (FIR) തുടങ്ങിയ രേഖകൾ ഇല്ലാത്തത് ക്ലെയിം തള്ളാൻ ഇടയാക്കും. ചികിത്സാ രേഖകളും ബില്ലുകളും ഡിജിറ്റലായി സൂക്ഷിക്കുന്നത് ക്ലെയിം പ്രക്രിയ സുഗമമാക്കാൻ സഹായിക്കും.
പോളിസി വാങ്ങുമ്പോൾ പുലർത്തുന്ന ജാഗ്രതയും ക്ലെയിം സമയത്തുള്ള അച്ചടക്കവും വഴി ഇത്തരം സാമ്പത്തിക നഷ്ടങ്ങൾ പൂർണമായും ഒഴിവാക്കാമെന്ന കാര്യം ശ്രദ്ധിക്കുക.
Common mistakes that lead to insurance claim rejections and how to avoid them.
Read DhanamOnline in English
Subscribe to Dhanam Magazine
