അവസാന നിമിഷത്തെ തിരക്ക്: ഐടിആർ പോർട്ടലുകൾ മന്ദഗതിയിൽ, ലക്ഷക്കണക്കിന് റിട്ടേണുകൾ കെട്ടിക്കിടക്കുന്നു, സമയപരിധി നീട്ടുമോ?

ആദായനികുതി റിട്ടേണുകൾ (ITR) സമർപ്പിക്കാനുള്ള സമയപരിധി അവസാനിക്കാൻ ദിവസങ്ങള്‍ മാത്രമാണ് ബാക്കിയുളളത്. സെപ്റ്റംബർ 15 ആണ് റിട്ടേണുകള്‍ സമര്‍പ്പിക്കാനുളള അവസാന തീയതി. കഴിഞ്ഞ വർഷത്തില്‍ 2024 ജൂലൈ 31 വരെ 7.28 കോടി ഐടിആറുകളാണ് ഫയൽ ചെയ്തത്. എന്നാല്‍ ഈ വർഷം ഫയലിംഗുകൾ മന്ദഗതിയിലാണ്. സെപ്റ്റംബർ 11 വരെ 5.47 കോടി റിട്ടേണുകൾ മാത്രമാണ് ഫയൽ ചെയ്തിരിക്കുന്നത്. പോര്‍ട്ടലില്‍ സാങ്കേതിക പ്രശ്നങ്ങള്‍ നേരിടുന്നതും നികുതിദായകരെ വലക്കുന്നു. റിട്ടേണുകള്‍ സമര്‍പ്പിക്കാനുളള സമയപരിധി നീട്ടുമെന്ന പ്രതീക്ഷയിലാണ് നികുതിദായകര്‍.

സാങ്കേതിക പ്രശ്നങ്ങള്‍

പ്രധാന ഇ-ഫയലിംഗ് പ്ലാറ്റ്‌ഫോമുകളായ വാർഷിക വിവര പ്രസ്താവന (AIS), ഫോം 26AS, നികുതിദായക വിവര സംഗ്രഹം (TIS) തുടങ്ങിയവ ഇടയ്ക്കിടെ പ്രവർത്തനരഹിതമാകുന്നുണ്ട്. ടി.ഡി.എസുമായി ബന്ധപ്പെട്ട ഫയലിംഗിന് അത്യാവശ്യമായ TRACES പോർട്ടല്‍ പ്രവർത്തനരഹിതമായതിനാൽ നികുതിദായകർക്കും പ്രൊഫഷണലുകൾക്കും ഫോം 26AS ആക്‌സസ് ചെയ്യാനോ TDS സർട്ടിഫിക്കറ്റുകൾ ഡൗൺലോഡ് ചെയ്യാനോ നികുതി ക്രെഡിറ്റുകൾ പരിശോധിക്കാനോ കഴിയുന്നില്ല. നിരവധി നികുതിദായകരും പ്രൊഫഷണലുകളും സമൂഹ മാധ്യമങ്ങളില്‍ തകരാറുകൾ ചൂണ്ടിക്കാട്ടി രംഗത്തെത്തി. ആദായനികുതി പോർട്ടലായ www.incometax.gov.in വഴിയും വാർഷിക വിവര പ്രസ്താവനയും നികുതി വിവര പ്രസ്താവനയും (Tax Information Statement) ഡൗണ്‍ലോഡ് ചെയ്യുന്നതിൽ പ്രശ്നങ്ങൾ നേരിടുന്നുണ്ട്.

സമയപരിധി നീട്ടണമെന്ന് ആവശ്യപ്പെട്ട് ഒന്നിലധികം പ്രൊഫഷണൽ അസോസിയേഷനുകൾ ധനമന്ത്രി നിർമ്മല സീതാരാമന് കത്തെഴുതിയിട്ടുണ്ട്. അഡ്വക്കേറ്റ്സ് ടാക്സ് ബാർ അസോസിയേഷൻ (ATBA) ഓഡിറ്റ് ചെയ്യാത്ത ഐടിആർ സമയപരിധി ഒക്ടോബർ 15 ലേക്ക് നീട്ടണമെന്ന് ആവശ്യപ്പെട്ടു.

സെൻട്രൽ ബോർഡ് ഓഫ് ഡയറക്ട് ടാക്സസ് (CBDT) ഓഡിറ്റ് ചെയ്യാത്ത ഐ.ടി.ആര്‍ സമയപരിധി ജൂലൈ 31 ൽ നിന്ന് സെപ്റ്റംബർ 15 വരെ നീട്ടിയിട്ടുണ്ടെങ്കിലും, മിക്ക യൂട്ടിലിറ്റികളും വളരെ വൈകിയാണ് പുറത്തിറങ്ങിയത്. ITR-2 ഉം ITR-3 ഉം ജൂലൈ 11 ന് പുറത്തിറങ്ങി, ITR-5, ITR-6, ITR-7 ഓഗസ്റ്റിൽ വന്നു. കഴിഞ്ഞ വർഷം നികുതിദായകർക്ക് ഏകദേശം മൂന്ന് മാസത്തെ തയ്യാറെടുപ്പ് സമയം ലഭിച്ചിരുന്നു. മിക്ക ഫോമുകളും ഏപ്രിൽ ആദ്യത്തോടെ പുറത്തിറങ്ങി.

സമയപരിധി നീട്ടാനായി കാത്തിരിക്കേണ്ടതില്ല

സമയപരിധി ഇളവുകൾക്കായി വ്യത്യസ്ത കോണുകളില്‍ നിന്ന് ആവശ്യമുയരുമ്പോള്‍ തന്നെ നികുതിദായകർ അത് കണക്കാക്കരുതെന്ന് വിദഗ്ധർ ഉപദേശിക്കുന്നു. അവസാന നിമിഷം ഫയൽ ചെയ്യുന്നത് കൂടുതല്‍ പ്രശ്നങ്ങൾ സൃഷ്ടിക്കാന്‍ സാധ്യതയുണ്ട്. കനത്ത ട്രാഫിക്കിൽ ആദായനികുതി പോർട്ടൽ മന്ദഗതിയിലാകുകയോ ഹാംഗ് ആകുകയോ ചെയ്യാം. വേരിഫിക്കേഷന്‍ പരാജയപ്പെടുക, ആധാർ OTP യില്‍ കാലതാമസം നേരിടുക, പോർട്ടൽ അറ്റകുറ്റപ്പണി മൂലമുളള തടസങ്ങൾ പോലുള്ള സാങ്കേതിക തകരാറുകൾ സംഭവിച്ചേക്കാമെന്നും ചൂണ്ടിക്കാണിക്കപ്പെടുന്നു.

_{ITR filing rush slows portals, triggering calls for deadline extension amid widespread technical glitches.}