2026-27 അസസ്മെന്റ് വർഷത്തേക്കുള്ള ആദായനികുതി റിട്ടേൺ (ITR) ജൂലൈ 31-ലെ അവസാന തീയതിക്ക് മുൻപ് തന്നെ ഫയൽ ചെയ്തെങ്കിലും, പിന്നീട് അതിൽ എന്തെങ്കിലും പിശകുകൾ കണ്ടെത്തിയാൽ പരിഭ്രാന്തരാകേണ്ടതില്ല. ആദായനികുതി നിയമം അത്തരം തെറ്റുകൾ തിരുത്താൻ നികുതിദായകർക്ക് നിയമപരമായ അവസരം നൽകുന്നുണ്ട്.
ആദായനികുതി നിയമത്തിലെ സെക്ഷൻ 139(5) പ്രകാരം, നിശ്ചിത സമയപരിധിക്കുള്ളിൽ യഥാർത്ഥ റിട്ടേൺ സമർപ്പിച്ച ഏതൊരു നികുതിദായകനും തെറ്റുകൾ തിരുത്താൻ അർഹതയുണ്ട്. വരുമാനം റിപ്പോർട്ട് ചെയ്യുന്നതിലെ വിട്ടുപോകലുകൾ, തെറ്റായ ഡിഡക്ഷനുകൾ (deductions) ക്ലെയിം ചെയ്യുക, ബാങ്ക് അക്കൗണ്ട് വിവരങ്ങളിലെ മാറ്റങ്ങൾ, മറ്റ് റിപ്പോർട്ടിംഗ് പിശകുകൾ എന്നിവ ഇത്തരത്തിൽ തിരുത്താവുന്നതാണ്.
എങ്ങനെ പരിഷ്കരിക്കാം? ആദായനികുതി വകുപ്പിന്റെ ഇ-ഫയലിംഗ് പോർട്ടൽ വഴി ഓൺലൈനായി തന്നെ 'റിവൈസ്ഡ് റിട്ടേൺ' (Revised Return) സമർപ്പിക്കാൻ സാധിക്കും. പുതിയ വിവരങ്ങൾ സമർപ്പിക്കുന്നതിന് മുമ്പ് നികുതിദായകർ തങ്ങളുടെ ഫോം 16, ആനുവൽ ഇൻഫർമേഷൻ സ്റ്റേറ്റ്മെന്റ് (AIS), ടാക്സ്പേയർ ഇൻഫർമേഷൻ സമ്മറി (TIS), ഫോം 26AS എന്നിവയുമായി പുതിയ വിവരങ്ങൾ ഒത്തുനോക്കേണ്ടത് അത്യാവശ്യമാണ്. വിവരങ്ങൾ പൂർണമായും കൃത്യമാണെന്ന് ഉറപ്പുവരുത്തിയ ശേഷം മാത്രമേ സബ്മിറ്റ് ചെയ്യാവൂ.
തെറ്റുകൾ തിരുത്താൻ അവസരമുണ്ടെങ്കിലും, ആവർത്തിച്ച് റിട്ടേണുകള് പരിഷ്കരിക്കുന്നത് ആദായനികുതി വകുപ്പിന്റെ പ്രത്യേക സൂക്ഷ്മപരിശോധനയ്ക്ക് (Scrutiny) കാരണമായേക്കാം. നിലവിൽ ആർട്ടിഫിഷ്യൽ ഇന്റലിജൻസ് അധിഷ്ഠിത ഡിജിറ്റൽ പരിശോധനകൾ ശക്തമായതിനാൽ വിവരങ്ങളുടെ കൃത്യതയ്ക്കും സുതാര്യതയ്ക്കും വലിയ പ്രാധാന്യമുണ്ട്. കൃത്യസമയത്ത് പിശകുകൾ തിരുത്തുന്നത് വിവരങ്ങളിലെ പൊരുത്തക്കേടുകൾ മൂലം ഭാവിയിൽ ലഭിക്കാവുന്ന നോട്ടീസുകൾ ഒഴിവാക്കാൻ സഹായിക്കും. ഓരോ റിവിഷനും പൂർണവും സത്യസന്ധവുമായ വിവരങ്ങളെ അടിസ്ഥാനമാക്കിയുള്ളതാണെന്ന് നികുതിദായകർ ഉറപ്പാക്കേണ്ടതുണ്ട്.
Read DhanamOnline in English
Subscribe to Dhanam Magazine
