ഐടിആർ ഫയലിംഗും ടിഡിഎസും: ജൂലൈ മാസത്തിൽ നികുതിദായകർ മറക്കരുതാത്ത പ്രധാന സമയപരിധികൾ

നികുതിദായകർക്ക് വളരെ പ്രധാനപ്പെട്ട മാസമാണ് ജൂലൈ. ഇൻകം ടാക്സ് റിട്ടേൺ (ITR) ഫയൽ ചെയ്യുന്നത് മുതൽ ടിഡിഎസ് അടക്കുന്നത് വരെ കൃത്യസമയത്ത് ചെയ്യേണ്ടത് അത്യാവശ്യമാണ്. സമയപരിധി നഷ്ടമായാല്‍ നികുതിദായകര്‍ പിഴയും മറ്റു പ്രത്യാഘാതങ്ങളും നേരിടേണ്ടി വരും. നികുതിദായകർ ശ്രദ്ധിക്കേണ്ട പ്രധാന സമയപരിധികളാണ് ഇവിടെ പരിശോധിക്കുന്നത്.

ശ്രദ്ധിക്കേണ്ട തീയതികള്‍

ജൂലൈ 7: ക്വാർട്ടർലി പേയ്‌മെന്റ് അനുമതിയുള്ളവർ ഏപ്രിൽ-ജൂൺ പാദത്തിലെ TDS നിക്ഷേപിക്കേണ്ട അവസാന തീയതിയാണിത്.

ജൂലൈ 15: സ്റ്റോക്ക് എക്സ്ചേഞ്ചുകൾ, സർക്കാർ ഓഫീസുകൾ, ഐ.എഫ്.എസ്.സി (IFSC) യൂണിറ്റുകൾ എന്നിവ വിവിധ റിപ്പോർട്ടിംഗ് ബാധ്യതകൾ പൂർത്തിയാക്കേണ്ട ദിവസമാണിത്.

ജൂലൈ 30: ജൂൺ മാസത്തിൽ പിടിച്ചെടുത്ത നിശ്ചിത നികുതികളുടെ ചലാൻ-കം-സ്റ്റേറ്റ്‌മെന്റ് ഫയൽ ചെയ്യേണ്ട തീയതിയാണിത്.

ജൂലൈ 31: വ്യക്തിഗത നികുതിദായകർ (ITR-1, ITR-2) തങ്ങളുടെ ഇൻകം ടാക്സ് റിട്ടേൺ ഫയൽ ചെയ്യേണ്ട ഏറ്റവും പ്രധാനപ്പെട്ട ദിവസമാണിത്.

ജൂലൈ 31: ഏപ്രിൽ-ജൂൺ പാദത്തിലെ വിവിധ ക്വാർട്ടർലി TDS, TCS സ്റ്റേറ്റ്‌മെന്റുകൾ സമർപ്പിക്കേണ്ട അവസാന തീയതിയാണിത്.

ജൂലൈ 31: വാടക കിഴിവ് (Form 10BA), ശമ്പള കുടിശ്ശികയിലെ ഇളവ് (Form 10E), വിദേശ വരുമാനം (Form 10H) എന്നിവയുമായി ബന്ധപ്പെട്ട വിവിധ ഫോമുകൾ സമർപ്പിക്കേണ്ട അവസാന തീയതിയാണിത്.

സമയപരിധി തെറ്റിച്ചാൽ എന്ത് സംഭവിക്കും?

നിശ്ചിത തീയതിക്കകം ഐ.ടി.ആർ ഫയൽ ചെയ്തില്ലെങ്കിൽ വൈകിയ വേളയിലുള്ള റിട്ടേൺ (Belated Return) സമർപ്പിക്കാൻ ഡിസംബർ 31 വരെ സമയമുണ്ടെങ്കിലും ഇതിന് പിഴ നൽകേണ്ടി വരും. നികുതിദായകന്റെ ആകെ വരുമാനം 5 ലക്ഷത്തിന് മുകളിലാണെങ്കിൽ 5,000 രൂപയും, 5 ലക്ഷത്തിൽ താഴെയാണെങ്കിൽ 1,000 രൂപയുമാണ് പിഴയായി ഈടാക്കുക. കൂടാതെ അടയ്ക്കാത്ത നികുതിക്ക് പലിശ നൽകേണ്ടി വരികയും, ബിസിനസ് നഷ്ടങ്ങൾ അടുത്ത വർഷത്തേക്ക് കൊണ്ടുപോകാനുള്ള (Carry forward) അവകാശം നഷ്ടപ്പെടുകയും ചെയ്യും. അതിനാൽ അവസാന നിമിഷത്തെ സമ്മർദ്ദം ഒഴിവാക്കാനായി നേരത്തെ തന്നെ നികുതി അടക്കാന്‍ ശ്രദ്ധിക്കുക.