സെപ്റ്റംബര് മാസം പിറക്കുന്നതോടെ നിങ്ങളുടെ വ്യക്തിഗത ധനകാര്യത്തെയും നിക്ഷേപങ്ങളെയും പ്രതിമാസ ചെലവുകളെയും ബാധിക്കുന്ന നിരവധി പുതിയ നിയമങ്ങളും സമയപരിധികളും പ്രാബല്യത്തില് വരികയാണ്. ഡിമാറ്റ് അക്കൗണ്ടുകള്, മ്യൂച്വല് ഫണ്ടുകള്, എക്സ്ചേഞ്ച് ട്രേഡഡ് ഫണ്ടുകള് (ETF), അഡ്വാന്സ് ടാക്സ്, പ്രവാസി നിക്ഷേപങ്ങള് (FCNR-B) എന്നിവയിലാണ് പ്രധാന മാറ്റങ്ങള്.
പണം കൈകാര്യം ചെയ്യുമ്പോഴും നിക്ഷേപ തീരുമാനങ്ങള് എടുക്കുമ്പോഴും ഈ മാസത്തില് ശ്രദ്ധിക്കേണ്ട പ്രധാന കാര്യങ്ങള് നോക്കാം.
ഡിമാറ്റ് അക്കൗണ്ടുകളിലും മ്യൂച്വല് ഫണ്ടുകളിലും നോമിനേഷന് പൂര്ത്തിയാക്കുന്നതുമായി ബന്ധപ്പെട്ട് പരിഷ്കരിച്ച നിബന്ധനകള് പ്രാബല്യത്തിലാകും. നിക്ഷേപകര് അവരുടെ അക്കൗണ്ടുകളിലെ നോമിനേഷന് സ്റ്റാറ്റസ് പരിശോധിച്ച്, ആവശ്യമായ വിവരങ്ങളോ നോമിനേഷനില് നിന്ന് ഒഴിവാകാനുള്ള (Opt-out) പ്രക്രിയയോ പൂര്ത്തിയാക്കിയിട്ടുണ്ടെന്ന് ഉറപ്പാക്കണം.
എക്സ്ചേഞ്ച് ട്രേഡഡ് ഫണ്ടുകള്ക്കുള്ള (ETF) സെബിയുടെ (SEBI) പുതിയ മാര്ഗനിര്ദ്ദേശങ്ങള് സെപ്റ്റംബര് 7 മുതല് നടപ്പിലാകും. ഇ.ടി.എഫുകളുടെ ബേസ് പ്രൈസ്, പ്രൈസ് ബാന്ഡുകള്, പ്രീ-ഓപ്പണ് കോള് ഓക്ഷന്, ക്ലോസ്-ഔട്ട് നടപടിക്രമങ്ങള് എന്നിവയിലാണ് സുതാര്യത ഉറപ്പാക്കാന് മാറ്റങ്ങള് വരുത്തുന്നത്.
വിദേശമലയാളികള് അടക്കമുള്ള പ്രവാസികള്ക്ക് ആശ്വാസമായിരുന്ന ആര്.ബി.ഐയുടെ എഫ്.സി.എന്.ആര് (ബി) (FCNR-B) ഡോളര്-രൂപ സ്വാപ്പ് വിന്ഡോയുടെ ആനുകൂല്യം ആഗസ്റ്റ് 31-ഓടെ അവസാനിക്കുകയാണ്. സെപ്റ്റംബര് 1 മുതല് ആരംഭിക്കുന്ന പുതിയ എഫ്.സി.എന്.ആര് (ബി) നിക്ഷേപങ്ങള്ക്ക് ഈ പ്രത്യേക ആനുകൂല്യം ലഭിക്കില്ല. എങ്കിലും, സാധാരണ എഫ്.സി.എന്.ആര് ഡെപ്പോസിറ്റുകള് ബാങ്കുകളില് ലഭ്യമായിരിക്കും. ബാങ്കുകള് നിശ്ചയിക്കുന്ന പലിശനിരക്കനുസരിച്ചായിരിക്കും ഇനി പുതിയ നിക്ഷേപങ്ങള് സ്വീകരിക്കുക.
കണക്കാക്കപ്പെട്ട നികുതി ബാധ്യതയുള്ള വ്യക്തികളും സ്ഥാപനങ്ങളും ഈ സാമ്പത്തിക വര്ഷത്തെ അഡ്വാന്സ് ടാക്സിന്റെ (Advance Tax) രണ്ടാം ഗഡു സെപ്റ്റംബര് 15-നകം അടയ്ക്കണം. മൊത്തം അഡ്വാന്സ് ടാക്സ് ബാധ്യതയുടെ കുറഞ്ഞത് 45 ശതമാനമെങ്കിലും ഈ തീയതിക്കകം ഒടുക്കേണ്ടതുണ്ട്.
ചെറുകിട സമ്പാദ്യ പദ്ധതികളില് (Small Savings Schemes) നിക്ഷേപിച്ചിട്ടുള്ളവര്ക്ക് സെപ്റ്റംബര് 30 സുപ്രധാന തീയതിയാണ്. ഒക്ടോബര് - ഡിസംബര് പാദത്തിലേക്കുള്ള പലിശനിരക്കുകള് കേന്ദ്ര സര്ക്കാര് സെപ്റ്റംബര് 30-ഓടെ പ്രഖ്യാപിക്കും. പി.പി.എഫ്, സുകന്യ സമൃദ്ധി, എന്.എസ്.സി തുടങ്ങിയ പദ്ധതികളുടെ പലിശനിരക്കില് മാറ്റമുണ്ടാകുമോ എന്നത് അപ്പോഴറിയാം.
ഇന്ത്യയിലെ വിമാനത്താവളങ്ങള് വഴി വിദേശത്തേക്ക് യാത്ര ചെയ്യുന്നവര്ക്ക് ഇനി മുതല് ബോര്ഡിംഗ് പാസുകളില് ഇമിഗ്രേഷന് കൗണ്ടറുകളില് നിന്ന് സ്റ്റാമ്പ് ചെയ്യേണ്ടതില്ല. യാത്രക്കാര്ക്ക് മൊബൈലിലെ ഡിജിറ്റല് ബോര്ഡിംഗ് പാസോ പ്രിന്റഡ് കോപ്പിയോ ഉപയോഗിച്ച് ഇമിഗ്രേഷന് നടപടികള് വേഗത്തില് പൂര്ത്തിയാക്കാം. വിദേശ മലയാളി യാത്രക്കാര്ക്കും പ്രവാസി കൈരളി സമൂഹത്തിനും ഇത് ഏറെ യാത്രാസൗകര്യം നല്കും.
ഗാര്ഹിക എല്.പി.ജി കണക്ഷനുകള്ക്ക് ആധാര് അധിഷ്ഠിത ബയോമെട്രിക് ഇ-കെ.വൈ.സി (e-KYC) പൂര്ത്തിയാക്കാനുള്ള തീയതി ആഗസ്റ്റ് 31-ഓടെ അവസാനിക്കും. ഇത് പൂര്ത്തിയാക്കാത്ത ഉപഭോക്താക്കള്ക്ക് സബ്സിഡി ആനുകൂല്യങ്ങളിലും സിലിണ്ടര് വിതരണത്തിലും തടസ്സങ്ങള് നേരിടാന് സാധ്യതയുണ്ട്.
Read DhanamOnline in English
Subscribe to Dhanam Magazine
