ഇന്ത്യയിലെ പുതിയ ആദായനികുതി വ്യവസ്ഥ ഭവന വായ്പകളെക്കുറിച്ചുള്ള ഉപഭോക്താക്കളുടെ തീരുമാനങ്ങളിൽ വലിയ മാറ്റങ്ങൾ വരുത്തുന്നു. മുൻകാലങ്ങളിൽ നികുതി ലാഭിക്കുന്നതിനായി വായ്പ എടുക്കുന്ന രീതിയായിരുന്നു ഇന്ത്യക്കാർ പിന്തുടർന്നിരുന്നതെങ്കിൽ, ഇപ്പോൾ വായ്പയുടെ തിരിച്ചടവ് ശേഷിക്കും (repayment capacity) അത് താങ്ങാനുള്ള കഴിവിനുമാണ് (affordability) കൂടുതൽ പ്രാധാന്യം നൽകുന്നത്.
വർഷങ്ങളായി ഭവന വായ്പകൾ എടുക്കുന്നവർ സെക്ഷൻ 24(ബി) പ്രകാരം പലിശയ്ക്കും സെക്ഷൻ 80സി പ്രകാരം വായ്പാ മുതലിനും ലഭിക്കുന്ന നികുതി ഇളവുകൾ മുൻനിർത്തിയാണ് വായ്പ തുക നിശ്ചയിച്ചിരുന്നത്. എന്നാൽ പുതിയ നികുതി വ്യവസ്ഥയിലേക്ക് മാറുന്നതോടെ ഇത്തരം ഇളവുകൾ ലഭ്യമല്ലാതാകുന്നു. ഇതിനാൽ തന്നെ, നികുതി ലാഭം നോക്കി വലിയ തുകകൾ വായ്പ എടുക്കുന്നതിന് പകരം, തങ്ങളുടെ പ്രതിമാസ വരുമാനത്തിന് അനുയോജ്യമായ ഇഎംഐ (EMI) തുകകൾ തിരഞ്ഞെടുക്കാൻ വായ്പ എടുക്കുന്നവർ ശ്രദ്ധിക്കുന്നു.
ആദ്യമായി വീട് വാങ്ങുന്നവർക്കിടയിൽ ഈ മാറ്റം പ്രകടമാണ്. പലിശ നിരക്കുകളിൽ മാറ്റം വന്നാലും തിരിച്ചടവ് മുടങ്ങാത്ത രീതിയിലുള്ള സുസ്ഥിരമായ വായ്പാ തുകകളാണ് അവർ ഇപ്പോൾ തിരഞ്ഞെടുക്കുന്നത്. ഇത് സാമ്പത്തികമായ അച്ചടക്കം വർദ്ധിപ്പിക്കാൻ സഹായിക്കുന്നുവെന്ന് വിദഗ്ധർ ചൂണ്ടിക്കാട്ടുന്നു. വലിയ തുക വായ്പയുള്ളവർക്കും കൂടുതൽ പലിശ അടയ്ക്കുന്നവർക്കും പഴയ നികുതി വ്യവസ്ഥ ഇപ്പോഴും ലാഭകരമാണെങ്കിലും, ഭൂരിഭാഗം പേരും പുതിയ വ്യവസ്ഥയിലേക്ക് മാറുന്നതോടെ വായ്പയെടുക്കുന്നതിലെ മുൻഗണനകൾ മാറുകയാണ്.
ബാങ്കുകളുടെ സമീപനത്തിലും മാറ്റം: വായ്പ നൽകുന്ന ധനകാര്യ സ്ഥാപനങ്ങളും ഇപ്പോൾ നികുതി ലാഭത്തെ അടിസ്ഥാനമാക്കിയുള്ള കണക്കുകൂട്ടലുകൾക്ക് പകരം അപേക്ഷകന്റെ വരുമാന സ്ഥിരതയ്ക്കും തിരിച്ചടവ് ശേഷിക്കുമാണ് പ്രാധാന്യം നൽകുന്നത്. നികുതി ആസൂത്രണം എന്നതിനേക്കാൾ ഉപരിയായി സാമ്പത്തിക അച്ചടക്കവും വരുമാനവും ഭവന വായ്പകളിലെ നിർണായക ഘടകങ്ങളായി മാറുകയാണ്.
Read DhanamOnline in English
Subscribe to Dhanam Magazine
