വിരമിക്കൽ ജീവിതത്തിലേക്ക് കടക്കുമ്പോൾ വീട് വാങ്ങുന്നതിനോ, ബിസിനസ് ആരംഭിക്കുന്നതിനോ അല്ലെങ്കിൽ മറ്റ് ആവശ്യങ്ങൾക്കോ വേണ്ടി മക്കൾ സാമ്പത്തിക സഹായം ചോദിക്കുന്നത് സാധാരണമാണ്. എന്നാൽ ശമ്പളവരുമാനം ഇല്ലാത്ത സാഹചര്യത്തിൽ വിരമിക്കൽ സമ്പാദ്യം (Retirement Corpus) അടുത്ത 25 വർഷത്തിലേറെ കാലത്തേക്ക് ജീവിക്കാനും ഉയർന്നുവരുന്ന ചികിത്സാ ചെലവുകൾക്കും ആവശ്യമാണ്. സ്വന്തം സാമ്പത്തിക ഭദ്രത ഉറപ്പാക്കിക്കൊണ്ട് മക്കളെ എങ്ങനെ സഹായിക്കാമെന്ന് താഴെ പറയുന്ന കാര്യങ്ങൾ വ്യക്തമാക്കുന്നു.
സ്വന്തം ആവശ്യങ്ങൾക്ക് പ്രഥമ പരിഗണന നൽകുക: മാസാന്ത്യ ജീവിതച്ചെലവുകൾ, അടിയന്തര ഫണ്ട് (Emergency Fund), ആരോഗ്യ ഇൻഷുറൻസിന് പുറമെയുള്ള പ്രത്യേക മെഡിക്കൽ ഫണ്ട് എന്നിവ മാറ്റിവെച്ച ശേഷം ബാക്കിയുള്ള തുക മാത്രം സഹായത്തിനായി ഉപയോഗിക്കുക.
വലിയ തുക സമ്മാനമല്ല, കടമായി നൽകുക: വലിയ തുകകൾ ആവശ്യപ്പെടുമ്പോൾ അത് വെറും സമ്മാനമായി (Gift) നൽകാതെ കൃത്യമായ തിരിച്ചടവ് വ്യവസ്ഥകളോടെ രേഖാമൂലമുള്ള കരാറുണ്ടാക്കി വായ്പയായി (Loan) നൽകുക. പണമായി നൽകാതെ ബാങ്ക് ട്രാൻസ്ഫർ മാത്രം ഉപയോഗിക്കുക.
വരുമാന സ്രോതസുകൾ തടസപ്പെടുത്തരുത്: സീനിയർ സിറ്റിസൺസ് സേവിംഗ്സ് സ്കീം (SCSS) പോലെയുള്ള മാസാന്ത്യ വരുമാനം തരുന്ന നിക്ഷേപങ്ങൾ പിൻവലിക്കുന്നത് ദീർഘകാല വരുമാനത്തെ ബാധിക്കും. കൂടാതെ മക്കളുടെ ബാങ്ക് വായ്പകൾക്ക് ഗ്യാരന്റർ (Guarantor) ആകാതിരിക്കാനും ശ്രദ്ധിക്കുക.
വീടിന്റെ ഉടമസ്ഥത കൈമാറരുത്: വീടാണ് മുതിർന്നവരുടെ ഏറ്റവും വലിയ സാമ്പത്തിക സുരക്ഷാ കവചം. അതിനാൽ ജീവിച്ചിരിക്കുമ്പോൾ വീടിന്റെ ഉടമസ്ഥാവകാശം കൈമാറുന്നതിന് പകരം വിൽപത്രം (Will) തയ്യാറാക്കി വെക്കുന്നതാണ് സുരക്ഷിതം.
സഹായത്തിന് ബജറ്റ് നിശ്ചയിക്കുക: ഓരോ വർഷവും നൽകാൻ കഴിയുന്ന പരമാവധി തുക മുൻകൂട്ടി നിശ്ചയിച്ച് മക്കളോട് തുറന്നുപറയുക.
സ്വന്തം സാമ്പത്തിക ഭാവിയും ആരോഗ്യ പരിരക്ഷയും ഉറപ്പുവരുത്തിയ ശേഷമുള്ള സഹായമാണ് കൂടുതൽ പ്രായോഗികമെന്ന കാര്യം പ്രത്യേകം ശ്രദ്ധിക്കുക.
Read DhanamOnline in English
Subscribe to Dhanam Magazine
