പണം കയ്യിലുണ്ടായിട്ടും നിങ്ങൾ സുരക്ഷിതരല്ലേ? കേവലം സമ്പാദ്യത്തിലൂടെ നമുക്ക് നഷ്ടമാകുന്നത് എന്താണ്?

പണം സമ്പാദിക്കുകയും ബാങ്കിൽ നല്ലൊരു തുക സൂക്ഷിക്കുകയും ചെയ്യുന്നുണ്ടെങ്കിലും സാമ്പത്തികമായ ഒരു ആത്മവിശ്വാസമില്ലായ്മയും തൃപ്തിയില്ലായ്മയും പലരെയും അലട്ടാറുള്ള ഒരു പ്രധാന പ്രശ്നമാണ്. പണം സമ്പാദിച്ച് സൂക്ഷിച്ച് വെക്കുന്നത് കൊണ്ട് മാത്രം സാമ്പത്തിക സുരക്ഷിതത്വം ലഭിക്കണമെന്നില്ല എന്നതാണ് ഇതിന് പ്രധാന കാരണം. ഇതിന് പിന്നിലെ പ്രധാന കാരണങ്ങൾ എന്തൊക്കെയാണെന്ന് നോക്കാം. യഥാർത്ഥ സാമ്പത്തിക സുരക്ഷിതത്വത്തിന് ആസൂത്രണം, റിസ്ക് നിയന്ത്രണം, കൃത്യമായ ഉൾക്കാഴ്ച എന്നിവ അത്യാവശ്യമാണ്.

സമ്പാദ്യമുണ്ട്, പക്ഷെ ലക്ഷ്യമില്ല

ഒരു പ്രത്യേക ലക്ഷ്യമില്ലാതെ പണം സമ്പാദിക്കുന്നത് മിക്കപ്പോഴും വ്യര്‍ത്ഥമായി അനുഭവപ്പെടാം. നേടുന്ന സമ്പാദ്യം എന്തിനുവേണ്ടിയാണ് ചെലവഴിക്കുക എന്ന് ഉറപ്പിക്കാത്ത പക്ഷം, നിങ്ങളുടെ സാമ്പത്തിക സ്ഥിതിയിൽ പുരോഗതിയുണ്ടോ എന്ന് വ്യക്തമായി പറയാന്‍ കഴിയില്ല. റിട്ടയർമെന്റ് അഥവാ ഉന്നത വിദ്യാഭ്യാസം തുടങ്ങിയ ദീർഘകാലത്തേക്കുളള ലക്ഷ്യങ്ങൾ അടിസ്ഥാനമാക്കി ആസൂത്രണം ചെയ്തില്ലെങ്കില്‍ എത്ര പണം കൈവശം സൂക്ഷിച്ചാലും പൂർണമായ സുരക്ഷിതത്വം അനുഭവപ്പെടണമെന്നില്ല.

ലിക്വിഡ് ഫണ്ടുകൾ മാത്രം പോരാ: അടിയന്തര ആവശ്യങ്ങൾക്കായി പണം കൈവശം വെക്കുന്നത് (Liquid funds) നല്ലതാണെങ്കിലും, അത് കൊണ്ട് മാത്രം ദീർഘകാല സുരക്ഷിതത്വം ലഭിക്കില്ല. ഭാവി ആവശ്യങ്ങൾക്കായി കൃത്യമായ പ്ലാൻ ഇല്ലാത്ത പക്ഷം, ബാങ്കിൽ വലിയ തുകയുണ്ടെങ്കിൽ പോലും ഒരാൾക്ക് സാമ്പത്തികമായി പൂർണ സുരക്ഷിതത്വം അനുഭവപ്പെടില്ല.

ഇൻഷുറൻസ് ഇല്ലാത്തത്

സമ്പാദ്യം കൊണ്ട് മാത്രം അഭിമുഖീകരിക്കാന്‍ സാധിക്കാത്ത ചില റിസ്കുകള്‍ പലരും നേരിടുന്നുണ്ട്. ഭാരിച്ച മെഡിക്കൽ എമർജൻസികൾ, അപകടം അല്ലെങ്കിൽ രോഗം തുടങ്ങിയവ കാരണം ജോലി ചെയ്യാൻ കഴിയാത്ത സാഹചര്യം, അപ്രതീക്ഷിതമായ ബാധ്യതകൾ മൂലം അവിചാരിതമായി നേരിടേണ്ടി വരുന്ന തൊഴിലില്ലായ്മ തുടങ്ങിയവ മൂലമുണ്ടാകുന്ന സാമ്പത്തിക ആഘാതം കേവലം സമ്പാദ്യം കൊണ്ട് മാത്രം മറികടക്കാൻ കഴിഞ്ഞെന്ന് വരില്ല. ഇവിടെയാണ് ഇൻഷുറൻസിന് വളരെ പ്രാധാന്യം നല്‍കേണ്ട സാഹചര്യമുളളത്. ഇക്കാരണത്താല്‍ ഇൻഷുറൻസ് പരിരക്ഷ ഇല്ലാത്തത് പലപ്പോഴും ആളുകളില്‍ ആശങ്കയുണ്ടാക്കുന്ന കാര്യമാണ്.

സാമ്പത്തിക അവസ്ഥയെക്കുറിച്ചുളള അജ്ഞത

തങ്ങളുടെ സാമ്പത്തിക അവസ്ഥയെക്കുറിച്ച് സമഗ്രമായ ഒരു ധാരണ ഇല്ലാത്തത് പലരിലും സംശയങ്ങൾ സൃഷ്ടിക്കാറുണ്ട്. വലിയ ചിത്രം (Bigger picture) കാണാൻ കഴിയാത്തതിനാൽ താൻ സമ്പാദിച്ച പണം മതിയോ എന്ന് വിലയിരുത്താൻ അവർക്ക് സാധിക്കുന്നില്ല. ബാങ്ക് ബാലൻസിനപ്പുറം തന്റെ ആസ്തികൾ എത്രത്തോളമുണ്ടെന്ന് കൃത്യമായി വിലയിരുത്താൻ കഴിയാത്തതാണ് ഇതിനുളള കാരണം.

പണം സമ്പാദിക്കുന്നതിനോടൊപ്പം തന്നെ നിക്ഷേപങ്ങൾ, കടബാധ്യതകൾ, കാഷ് ഫ്ലോ തുടങ്ങിയവ വ്യക്തമായി കൈകാര്യം ചെയ്യുന്ന ഒരു സിസ്റ്റം രൂപപ്പെടുത്തിയെടുക്കുമ്പോഴാണ് ശരിക്കുമുളള സുരക്ഷിതത്വം ആളുകള്‍ക്ക് അനുഭവപ്പെടുന്നത്. സ്വന്തം സാമ്പത്തിക ലക്ഷ്യങ്ങൾ എങ്ങനെ കൈവരിക്കാം എന്നത് സംബന്ധിച്ച് വ്യക്തമായ കാഴ്ചപ്പാടാണ് ഒരാളെ കൂടുതൽ ആത്മവിശ്വാസമുള്ളതാക്കി മാറ്റുന്നത്.

എന്താണ് നിങ്ങൾക്ക് നഷ്ടമാകുന്നത്?

പണം സമ്പാദിക്കുന്നതിൽ മാത്രം ശ്രദ്ധ കേന്ദ്രീകരിക്കുമ്പോൾ, റിസ്ക് മാനേജ്‌മെന്റ്, കൃത്യമായ നിക്ഷേപങ്ങൾ, കടബാധ്യതകൾ കൈകാര്യം ചെയ്യൽ എന്നിവ ഉൾപ്പെടുന്ന ഒരു സമഗ്രമായ സാമ്പത്തിക സംവിധാനമാണ് (Financial System) നിങ്ങൾക്ക് നഷ്ടമാകുന്നത്. കേവലം സമ്പാദിക്കുന്നതിനേക്കാൾ, തന്റെ സാമ്പത്തിക സ്ഥിതി എവിടെ നിൽക്കുന്നുവെന്നും ലക്ഷ്യങ്ങൾ നേടാൻ പണം എങ്ങനെ വിന്യസിച്ചിരിക്കുന്നുവെന്നും അറിയുന്നവർക്കാണ് യഥാർത്ഥ സുരക്ഷിതത്വം ലഭിക്കുക. മുൻകാല സാമ്പത്തിക ബുദ്ധിമുട്ടുകൾ ഉണ്ടാക്കുന്ന മാനസിക സമ്മർദ്ദവും (Anxiety) ഇത്തരം ആസൂത്രണത്തിലൂടെ മാത്രമേ മറികടക്കാൻ സാധിക്കൂ.

സാമ്പത്തിക സുരക്ഷിതത്വം എന്നത് ബാങ്കിലെ ഒരു അക്കമല്ല, മറിച്ച് നിങ്ങളുടെ ഇന്നത്തെയും നാളത്തെയും വെല്ലുവിളികളെ നേരിടാൻ സജ്ജമായ ഒരു കൃത്യമായ സംവിധാനമാണെന്ന കാര്യം പ്രത്യേകം ശ്രദ്ധിക്കുക.