ക്രെഡിറ്റ് കാര്‍ഡ് നഷ്ടപ്പെട്ടോ? പണം നഷ്ടപ്പെടാതിരിക്കാനും തട്ടിപ്പുകള്‍ തടയാനും ഉടനടി സ്വീകരിക്കേണ്ട മാര്‍ഗങ്ങള്‍ ഇവയാണ്

ക്രെഡിറ്റ് കാർഡ് നഷ്ടപ്പെടുന്നത് വളരെ പരിഭ്രാന്തിയുണ്ടാക്കുന്ന അനുഭവമാണ്. ക്രെഡിറ്റ് കാര്‍ഡുകള്‍ നഷ്ടപ്പെടുമ്പോള്‍ ജാഗ്രതയുടെയും സമയബന്ധിതമായും പ്രതികരിക്കേണ്ടത് അത്യാവശ്യമാണ്. ക്രെഡിറ്റ് കാർഡുമായി ബന്ധപ്പെട്ട തട്ടിപ്പുകൾ വർദ്ധിച്ചുവരുന്ന സാഹചര്യത്തിൽ ഇത്തരം സന്ദര്‍ഭങ്ങളെ സൂക്ഷ്മതയോടെ കൈകാര്യം ചെയ്യേണ്ടതുണ്ട്.

ഉടന്‍ ചെയ്യേണ്ടത്

നിങ്ങളുടെ ക്രെഡിറ്റ് കാർഡ് നഷ്ടപ്പെട്ടാൽ ആദ്യം ചെയ്യേണ്ടത്, കാർഡ് നൽകുന്ന ധനകാര്യ സ്ഥാപനവുമായി ബന്ധപ്പെട്ട് വിവരം റിപ്പോർട്ട് ചെയ്യുക എന്നതാണ്. മിക്ക ബാങ്കിംഗ്, ധനകാര്യ സ്ഥാപനങ്ങളും ഇതിനായി 24/7 ഉപഭോക്തൃ സേവനം നൽകുന്നുണ്ട്. കാർഡ് നഷ്ടപ്പെട്ടാലോ മോഷണം പോലുള്ള സാഹചര്യങ്ങള്‍ സംഭവിച്ചാലോ കൈകാര്യം ചെയ്യുന്നതിനും ഉപയോക്താക്കളെ സഹായിക്കുന്നതിനും അവരുടെ ഉപഭോക്തൃ സേവന ടീമുകൾക്ക് കൃത്യമായ പരിശീലനം നൽകിയിട്ടുണ്ട്. 24/7 ഉപഭോക്തൃ സേവനവുമായി ബന്ധപ്പെടുന്നതിലൂടെ നിങ്ങൾക്ക് ക്രെഡിറ്റ് കാർഡ് ബ്ലോക്ക് ചെയ്യാനും അനധികൃത ഇടപാടുകൾ തടയാനും കഴിയും.

മറ്റ് രീതികളിലൂടെയും നിങ്ങള്‍ക്ക് ക്രെഡിറ്റ് കാർഡ് ബ്ലോക്ക് ചെയ്യാൻ സാധിക്കും.

നെറ്റ് ബാങ്കിംഗ്, മൊബൈൽ ബാങ്കിംഗ് ആപ്പുകള്‍, ധനകാര്യ സ്ഥാപനങ്ങളുടെ പരാതി പരിഹാര ടീമിന് വിശദാംശങ്ങൾ ഇമെയിൽ ചെയ്യുക തുടങ്ങിയ മാര്‍ഗങ്ങള്‍ അവലംബിച്ചും കാര്‍ഡ് ബ്ലോക്ക് ചെയ്യാവുന്നതാണ്.

ക്രെഡിറ്റ് കാർഡ് തട്ടിപ്പ് പ്രശ്നങ്ങൾ പരിഹരിക്കുന്നതിൽ ബാങ്കിംഗ് സ്ഥാപനവുമായി എപ്പോഴെങ്കിലും ബുദ്ധിമുട്ടുകൾ നേരിടേണ്ടി വന്നാൽ , ആർ‌ബി‌ഐ പോലുള്ള നിയന്ത്രണ സ്ഥാപനങ്ങൾക്ക് ഉപഭോക്തൃ താൽപ്പര്യങ്ങൾ സംരക്ഷിക്കുന്നതിനുള്ള സംവിധാനങ്ങളുണ്ടെന്ന കാര്യം ഓർക്കുക.

ക്രെഡിറ്റ് റിപ്പോർട്ടുകള്‍ നിരീക്ഷിക്കുക

നഷ്ടപ്പെട്ട കാർഡില്‍ സംശയാസ്പദമായ എന്തെങ്കിലും പ്രവർത്തനങ്ങൾ നടക്കുന്നുണ്ടോ എന്ന് കണ്ടെത്താൻ ക്രെഡിറ്റ് കാർഡ് സ്റ്റേറ്റ്‌മെന്റുകൾ, ഡെബിറ്റ് സന്ദേശങ്ങള്‍, ഓൺലൈൻ ബാങ്കിംഗ് പോർട്ടലുകൾ തുടങ്ങിയവ സൂക്ഷ്മമായി നിരീക്ഷിക്കണം. അനധികൃത ഇടപാടുകൾ എത്ര ചെറുതാണെങ്കിലും ഉടനടി അധികൃതരെ അറിയിക്കണം. പ്രധാന ക്രെഡിറ്റ് ബ്യൂറോകളിൽ തട്ടിപ്പ് അലേർട്ട് നൽകുന്നത് നിങ്ങളുടെ പേരിൽ പുതിയ അക്കൗണ്ടുകൾ തുറക്കുന്നതിൽ നിന്ന് തട്ടിപ്പുകാരെ തടയാൻ സഹായിക്കും.

ഉപയോക്താക്കള്‍ സ്വീകരിക്കേണ്ട മുന്‍കരുതലുകള്‍

നിങ്ങളുടെ എല്ലാ ധനകാര്യ അക്കൗണ്ടുകൾക്കും തനതായ പാസ്‌വേഡുകൾ, OTP-കൾ, PIN-കൾ എന്നിവ ഉപയോഗിക്കുക. അവ സ്ഥിരമായി അപ്‌ഡേറ്റ് ചെയ്യുക.

അനധികൃത ഇടപാടുകൾ ഉടനടി കണ്ടെത്തുന്നതിന് നിങ്ങളുടെ ക്രെഡിറ്റ് കാർഡിൽ SMS അല്ലെങ്കിൽ ഇമെയിൽ വഴി ഇടപാട് അലേർട്ടുകൾ പ്രാപ്തമാക്കുക. നിങ്ങളുടെ സാമ്പത്തിക അക്കൗണ്ടുകളെക്കുറിച്ചുള്ള തത്സമയ വിവരങ്ങൾ ലഭിക്കുന്നതിന് ഈ മാര്‍ഗങ്ങള്‍ സഹായകരമാണ്.

സുരക്ഷിതമല്ലാത്ത പൊതു വൈ-ഫൈ നെറ്റ്‌വർക്കുകൾ, അജ്ഞാത കമ്പ്യൂട്ടർ മെഷീനുകൾ, കടകൾ എന്നിവയിലൂടെ ഒരിക്കലും ഇടപാടുകൾ നടത്തരുത്. പേയ്‌മെന്റുകൾ നടത്തുന്നതിനും ഇടപാടുകൾ പൂർത്തിയാക്കുന്നതിനും സുരക്ഷിത ഡാറ്റാ കൈമാറ്റം ഉറപ്പാക്കുന്ന HTTPS ഉള്ള വെബ്‌സൈറ്റുകൾ മാത്രം ഉപയോഗിക്കുക.

ക്രെഡിറ്റ് കാർഡ് വിശദാംശങ്ങൾ, സിവിവി നമ്പർ, പിൻ, ഒടിപി, ബാർകോഡ് വിവരങ്ങൾ തുടങ്ങിയ പ്രധാന വിവരങ്ങൾ ഒരിക്കലും മറ്റൊരാളുമായി പങ്കിടരുത്.

_{Steps to take immediately if your credit card is lost to avoid fraud and financial loss.}