മികച്ച ക്രെഡിറ്റ് സ്കോർ ജീവിതകാലം മുഴുവൻ നിലനിര്‍ത്തണോ?, ഈ മാര്‍ഗങ്ങള്‍ പിന്തുടരൂ

ലോണ്‍ എടുക്കുമ്പോള്‍ ക്രെഡിറ്റ് സ്കോർ ഒരു പ്രധാന ഘടകമാണെന്ന കാര്യം ഉപയോക്താക്കള്‍ ശ്രദ്ധിക്കേണ്ടതുണ്ട്. ലോണിന് അപേക്ഷിക്കുമ്പോള്‍ ബാങ്കുകൾ അപേക്ഷകന്റെ ക്രെഡിറ്റ് സ്കോർ പരിശോധിക്കുന്നത് അവരുടെ ക്രെഡിറ്റ് യോഗ്യത ഉറപ്പാക്കാനാണ്. ഉയർന്ന ക്രെഡിറ്റ് സ്കോർ (720 ന് മുകളിൽ) അപേക്ഷകന്‍ വിശ്വാസയോഗ്യനാണെന്ന് സൂചിപ്പിക്കുന്നു.

ധനകാര്യ സ്ഥാപനങ്ങള്‍ക്ക് സൗകര്യപ്രദമായ വ്യവസ്ഥകളിൽ വലിയ തുക വായ്പ വാഗ്ദാനം ചെയ്യാൻ ഇതിലൂടെ സാധിക്കും. നേരെമറിച്ച്, മോശം ക്രെഡിറ്റ് സ്കോർ ഉള്ള ഒരാൾക്ക് ഉയർന്ന പലിശ നിരക്കിലായിരിക്കും സാധാരണ വായ്പ ലഭിക്കുക. ജീവിതകാലം മുഴുവൻ നിലനിൽക്കാൻ മികച്ച ക്രെഡിറ്റ് സ്കോർ നിർമ്മിക്കാൻ സ്വീകരിക്കേണ്ട നടപടികളാണ് ഇവിടെ പരിശോധിക്കുന്നത്.

സുസ്ഥിരമായ ക്രെഡിറ്റ് സ്കോർ നിർമ്മിക്കാനുള്ള ഘട്ടങ്ങൾ

ഒരു ക്രെഡിറ്റ് ചരിത്രം സ്ഥാപിക്കുക: ഇതിനായി ഒരു സെക്യൂർഡ് ക്രെഡിറ്റ് കാർഡ് (Secured Credit Card) ഉപയോഗിച്ച് തുടങ്ങുക. അല്ലെങ്കിൽ ഒരു കുടുംബാംഗത്തിന്റെ ക്രെഡിറ്റ് കാർഡിന്റെ അധിക ഉപയോക്താവായി (Authorized User) ചേരുക. ഈ കാർഡ് ഉത്തരവാദിത്തോടെ ഉപയോഗിക്കുകയും എല്ലാ മാസവും മുഴുവൻ തുകയും അടച്ചുതീർക്കുകയും ചെയ്യുക. ഇത് വലിയ റിസ്ക് ഇല്ലാതെ ക്രെഡിറ്റ് പ്രവർത്തനം ആരംഭിക്കാൻ ഉപയോക്താവിനെ സഹായിക്കും.

കൃത്യസമയത്ത് ബില്ലുകൾ അടയ്ക്കുക: പേയ്‌മെന്റ് ചരിത്രമാണ് ക്രെഡിറ്റ് സ്കോറിനെ സ്വാധീനിക്കുന്ന ഏറ്റവും വലിയ ഘടകം. വൈകിയുള്ള പേയ്‌മെന്റുകൾ ഒഴിവാക്കാൻ ഓട്ടോപേ (Autopay) അല്ലെങ്കിൽ റിമൈൻഡറുകൾ സജ്ജീകരിക്കുക. മുഴുവൻ തുകയും അടയ്ക്കാൻ സാധിക്കുന്നില്ലെങ്കിൽ പോലും, കുറഞ്ഞത് മിനിമം തുകയെങ്കിലും കൃത്യസമയത്ത് അടയ്ക്കുക.

ക്രെഡിറ്റ് വിനിയോഗം നിയന്ത്രിക്കുക: നിങ്ങളുടെ ലഭ്യമായ ക്രെഡിറ്റിന്റെ 30 ശതമാനത്തിൽ താഴെയായി ക്രെഡിറ്റ് വിനിയോഗം നിലനിർത്താൻ ശ്രമിക്കുക. ലഭ്യമായ ക്രെഡിറ്റ് വർദ്ധിപ്പിക്കുന്നതിന് പുതിയ കാര്‍ഡുകള്‍ സ്വീകരിക്കുന്നത് കൂടാതെ തന്നെ പഴയ അക്കൗണ്ടുകളുടെ ക്രെഡിറ്റ് പരിധി വർദ്ധിപ്പിക്കാനും അപേക്ഷിക്കാന്‍ സാധിക്കും.

ക്രെഡിറ്റ് മിശ്രിതം വൈവിധ്യവത്കരിക്കുക: ക്രെഡിറ്റ് കാർഡുകൾ, വാഹന വായ്പകൾ, പണയങ്ങള്‍ തുടങ്ങിയ വിവിധതരം അക്കൗണ്ടുകൾ നിങ്ങളുടെ ക്രെഡിറ്റ് റിപ്പോർട്ടിൽ ഉൾപ്പെടുത്തുന്നത് നല്ലതാണ്. അതേസമയം ഉത്തരവാദിത്തത്തോടെ കൈകാര്യം ചെയ്യാൻ കഴിയുന്നവ മാത്രം തിരഞ്ഞെടുക്കുക.

പുതിയ അപേക്ഷകൾ കുറയ്ക്കുക: ഓരോ പുതിയ വായ്പക്കോ കാർഡിനോ വേണ്ടിയുള്ള അന്വേഷണവും (Hard Inquiry) താൽക്കാലികമായി നിങ്ങളുടെ സ്കോറിനെ ദോഷകരമായി ബാധിക്കും. ആവശ്യമാണെങ്കിൽ മാത്രം പുതിയവക്ക് വേണ്ടി അപേക്ഷിക്കുകയും, ഓരോ അപേക്ഷകൾക്കിടയിലും കൃത്യമായ ഇടവേള നൽകുകയും ചെയ്യുക.

ദീർഘകാലം നിലനിർത്താനുള്ള ടിപ്പുകള്‍

സ്ഥിരത പാലിക്കുക: ക്രെഡിറ്റ് കാര്‍ഡ്, മറ്റു ലോണുകള്‍ തുടങ്ങിയവയുടെ പെയ്മെന്റുകളില്‍ സ്ഥിരത (Consistency) നിലനിർത്താൻ ശ്രമിക്കുക.

പതിവായി നിരീക്ഷിക്കുക: ക്രെഡിറ്റ് റിപ്പോർട്ട് ആറുമാസത്തിലൊരിക്കലെങ്കിലും പതിവായി പരിശോധിക്കുക.

നീണ്ട ചരിത്രം നിലനിർത്തുക: ഉപയോഗിക്കാത്ത പഴയ അക്കൗണ്ടുകൾ പോലും അവസാനിപ്പിക്കാതിരിക്കുക. ഇത് നിങ്ങളുടെ ശരാശരി അക്കൗണ്ട് പ്രായം വർദ്ധിപ്പിക്കാൻ സഹായിക്കാന്‍ ഉതകും.

കടക്കെണി ഒഴിവാക്കുക: ഉയർന്ന പലിശയുള്ള കടങ്ങളിൽ അകപ്പെടാതിരിക്കാൻ ശ്രമിക്കുക.

മാറ്റങ്ങൾ ബാങ്കിനെ അറിയിക്കുക: ജോലി നഷ്ടപ്പെടുന്നത് പോലുള്ള ജീവിത സാഹചര്യങ്ങളിൽ മാറ്റം വന്നാൽ, ബാങ്കിന്റെ "ഹാർഡ്ഷിപ്പ് പ്രോഗ്രാമുകൾ" (hardship programs) ഉണ്ടെങ്കിൽ അതിനെക്കുറിച്ച് അറിയാനായി ബാങ്കുമായി ആശയവിനിമയം നടത്തുക.

_{Tips and strategies to build and maintain a lifelong sustainable credit score for better financial opportunities.}