പേഴ്സണൽ ലോൺ വേഗത്തിൽ തിരിച്ചടച്ച് പലിശ ലാഭിക്കാം; ഇക്കാര്യങ്ങൾ ശ്രദ്ധിക്കൂ

ഇന്ത്യയിൽ പേഴ്സണൽ ലോണുകൾക്ക് സാധാരണയായി 10 മുതൽ 18 ശതമാനം വരെയാണ് പലിശ ഈടാക്കുന്നത്. ഇത് മറ്റ് വായ്പകളെ അപേക്ഷിച്ച് ഉയർന്ന നിരക്കായതിനാൽ, വായ്പ എത്രയും വേഗം അടച്ചുതീർക്കുന്നത് സാമ്പത്തിക ഭദ്രതയ്ക്ക് അത്യന്താപേക്ഷിതമാണ്. വായ്പയുടെ തിരിച്ചടവ് വേഗത്തിലാക്കാൻ സഹായിക്കുന്ന ചില പ്രധാന വഴികൾ പരിശോധിക്കാം.

ഇവ ശ്രദ്ധിക്കുക

1. അസൽ തുക (Principal) നേരത്തെ കുറയ്ക്കുക: വായ്പ വേഗത്തിൽ അവസാനിപ്പിക്കാനുള്ള ഏറ്റവും ലളിതമായ മാർഗം അതിന്റെ അസൽ തുക എത്രയും വേഗം കുറയ്ക്കുക എന്നതാണ്. പലിശ കണക്കാക്കുന്നത് കുടിശ്ശികയുള്ള അസൽ തുകയുടെ അടിസ്ഥാനത്തിലായതിനാൽ, ഭാഗികമായ തിരിച്ചടവുകൾ (Part-prepayments) നടത്തുന്നത് ഗുണകരമാണ്. നിങ്ങളുടെ പക്കൽ അധികമായി വരുന്ന ചെറിയ തുകകൾ (ഉദാഹരണത്തിന് 25,000 അല്ലെങ്കിൽ 50,000 രൂപ) വായ്പയിലേക്ക് മുൻകൂട്ടി അടയ്ക്കുന്നത് ഭാവിയിലെ ആകെ പലിശ ഭാരം കുറയ്ക്കാൻ സഹായിക്കും.

2. പിഴകൾ പരിശോധിക്കുക: മുൻകൂട്ടി പണമടയ്ക്കുന്നതിന് മുൻപ് ബാങ്കിന്റെ നിബന്ധനകൾ ശ്രദ്ധിക്കണം. ആർബിഐ (RBI) നിയമപ്രകാരം ഫ്ലോട്ടിംഗ് റേറ്റ് വായ്പകൾക്ക് സാധാരണയായി പ്രീപേയ്മെന്റ് പിഴ ഈടാക്കാറില്ലെങ്കിലും, ഫിക്സഡ് റേറ്റ് വായ്പകൾക്ക് പ്രീപേയ്മെന്റ് പെനാൽറ്റി ഉണ്ടായേക്കാം.

3. പലിശ നിരക്ക് പുനഃപരിശോധിക്കുക: നിങ്ങളുടെ ക്രെഡിറ്റ് സ്കോർ മെച്ചപ്പെടുകയോ വരുമാനം വർദ്ധിക്കുകയോ ചെയ്തിട്ടുണ്ടെങ്കിൽ നിലവിലെ പലിശ നിരക്ക് കുറയ്ക്കാൻ ബാങ്കിനോട് ആവശ്യപ്പെടാവുന്നതാണ്. പലിശ നിരക്കിൽ ഉണ്ടാകുന്ന ഒരു ശതമാനത്തിന്റെ കുറവ് പോലും ദീർഘകാലാടിസ്ഥാനത്തിൽ വലിയ ലാഭം നൽകും.

4. അധിക വരുമാനം ഉപയോഗപ്പെടുത്തുക: ബോണസ്, ഇൻസെന്റീവ്, ടാക്സ് റീഫണ്ട് അല്ലെങ്കിൽ ഫ്രീലാൻസ് ജോലികളിൽ നിന്ന് ലഭിക്കുന്ന അധിക വരുമാനം ആഡംബരങ്ങൾക്കായി ചെലവാക്കാതെ വായ്പയുടെ അസൽ തുക കുറയ്ക്കാൻ ഉപയോഗിക്കുക. ഇത് വായ്പയുടെ കാലാവധി ഗണ്യമായി കുറയ്ക്കാൻ സഹായിക്കും.

5. തിരിച്ചടവിൽ അച്ചടക്കം പാലിക്കുക: തിരിച്ചടവുകൾ മുടങ്ങുന്നത് ക്രെഡിറ്റ് സ്കോറിനെ ബാധിക്കുകയും പിഴ പലിശ ഈടാക്കാൻ കാരണമാവുകയും ചെയ്യും. കൂടാതെ, ഒരു വായ്പ തിരിച്ചടയ്ക്കാൻ മറ്റൊരു പേഴ്സണൽ ലോൺ എടുക്കുന്ന രീതി (Loan stacking) ഒഴിവാക്കുക. എന്നാൽ വളരെ കുറഞ്ഞ നിരക്കിലുള്ള ബാലൻസ് ട്രാൻസ്ഫർ സൗകര്യം ലഭിക്കുകയാണെങ്കിൽ അത് പരിഗണിക്കാവുന്നതാണ്.

നിങ്ങളുടെ വായ്പയുടെ അസൽ തുക കുറയുന്നത് കൃത്യമായി നിരീക്ഷിക്കുന്നത് ലോൺ വേഗത്തിൽ തീർക്കാനുള്ള പ്രചോദനം നൽകും. വായ്പ എത്രയും വേഗം അവസാനിക്കുന്നുവോ, അത്രയും വേഗം പണം നിങ്ങള്‍ക്ക് മറ്റാവശ്യങ്ങൾക്കായി ഉപയോഗിക്കാൻ സാധിക്കും.

_{Tips to repay personal loans faster and save on interest – from prepayments to interest rate revisions.}