നിക്ഷേപകരെ സംബന്ധിച്ചിടത്തോളം വലിയ മാറ്റങ്ങളുടെയും അവസരങ്ങളുടെയും വര്ഷമാണ് 2026. ആഗോള സാമ്പത്തിക രംഗത്തെ പുതിയ ചലനങ്ങളും സാങ്കേതിക വിദ്യയിലെ മുന്നേറ്റവും എങ്ങനെ വരുമാനമാക്കി മാറ്റാം? പ്രമുഖ വെല്ത്ത് മാനേജ്മെന്റ് സ്ഥാപനമായ 'എസ്ക് പ്രൈവറ്റ് വെല്ത്ത്' (ASK Private Wealth) പുറത്തുവിട്ട റിപ്പോര്ട്ട് പ്രകാരം 2026-ല് നിക്ഷേപകര് ശ്രദ്ധിക്കേണ്ട ആറ് പ്രധാന മേഖലകള് ഇവയാണ്.
വെറുമൊരു സാങ്കേതിക വിദ്യ എന്നതിലുപരി, വരും വര്ഷങ്ങളില് എല്ലാ വ്യവസായങ്ങളെയും നിയന്ത്രിക്കുന്നത് AI ആയിരിക്കും. AI നടപ്പിലാക്കുന്ന കമ്പനികള് പ്രവര്ത്തനക്ഷമത വര്ധിപ്പിക്കുകയും ലാഭം കൂട്ടുകയും ചെയ്യും. അതിനാല് ടെക്നോളജി അധിഷ്ഠിത ഓഹരികളില് ദീര്ഘകാല നിക്ഷേപം നടത്തുന്നത് മികച്ച നേട്ടം നല്കും.
ആഗോള രാഷ്ട്രീയ അനിശ്ചിതത്വങ്ങളും നാണയപ്പെരുപ്പവും നിലനില്ക്കുന്ന സാഹചര്യത്തില് സുരക്ഷിത നിക്ഷേപമെന്ന നിലയില് സ്വര്ണത്തിന്റെ പ്രാധാന്യം ഏറുകയാണ്. പോര്ട്ട്ഫോളിയോയുടെ ഒരു നിശ്ചിത ശതമാനം (10-15%) സ്വര്ണത്തില് നിലനിര്ത്തുന്നത് വിപണിയിലെ ചാഞ്ചാട്ടങ്ങളെ പ്രതിരോധിക്കാന് നിക്ഷേപകരെ സഹായിക്കും.
ഇന്ത്യന് വിപണിയിലേക്ക് വിദേശ നിക്ഷേപകര് വീണ്ടും സജീവമായി എത്തുന്ന വര്ഷമായിരിക്കും 2026. ഇന്ത്യയുടെ ശക്തമായ ജിഡിപി വളര്ച്ചയും സാമ്പത്തിക സുസ്ഥിരതയും ആഗോള തലത്തില് ശ്രദ്ധിക്കപ്പെടുന്നു. വിദേശ നിക്ഷേപം വധിക്കുന്നത് ബാങ്കിംഗ്, ഐടി, നിര്മ്മാണ മേഖലകളിലെ ഓഹരികള്ക്ക് കരുത്തേകും.
പരമ്പരാഗത വ്യവസായങ്ങള് ഡിജിറ്റല് പ്ലാറ്റ്ഫോമുകളിലേക്ക് മാറുന്നത് തുടരുകയാണ്. ഇ-കൊമേഴ്സ്, ഡിജിറ്റല് പേയ്മെന്റുകള്, സൈബര് സെക്യൂരിറ്റി തുടങ്ങിയ മേഖലകളില് വലിയ മുന്നേറ്റമുണ്ടാകും. ഈ പരിവര്ത്തനത്തിന് നേതൃത്വം നല്കുന്ന കമ്പനികളുടെ ഓഹരികള് ശ്രദ്ധിക്കുന്നത് ഗുണകരമാകും.
ഇന്ത്യയിലെ ഇടത്തരക്കാരുടെ വരുമാന വര്ധനവും ജീവിതശൈലിയിലുണ്ടായ മാറ്റവും പ്രീമിയം ഉല്പന്നങ്ങളുടെ വിപണി വിപുലമാക്കി. എഫ്.എം.സി.ജി (FMCG), ഓട്ടോമൊബൈല്, ലക്ഷ്വറി ഗുഡ്സ് എന്നീ മേഖലകളില് വരും വര്ഷം വലിയ ഡിമാന്ഡ് പ്രതീക്ഷിക്കുന്നു.
ആഗോളതലത്തില് കേന്ദ്ര ബാങ്കുകള് പലിശ നിരക്കുകളില് വരുത്തുന്ന മാറ്റങ്ങള് ഡെറ്റ് (Debt) നിക്ഷേപങ്ങളില് പുതിയ അവസരങ്ങള് തുറക്കും. സ്ഥിര നിക്ഷേപങ്ങള്ക്കും ബോണ്ടുകള്ക്കും പുറമെ വൈവിധ്യമാര്ന്ന ഡെറ്റ് ഇന്സ്ട്രുമെന്റുകളില് നിക്ഷേപം നടത്തുന്നത് മികച്ച റിസ്ക്-അഡ്ജസ്റ്റഡ് റിട്ടേണ് നല്കാന് സഹായിക്കും.
ഏതൊരു നിക്ഷേപവും നിങ്ങളുടെ സാമ്പത്തിക ലക്ഷ്യങ്ങളും റിസ്ക് എടുക്കാനുള്ള കഴിവും കണക്കിലെടുത്തു വേണം തീരുമാനിക്കാന്. പോര്ട്ട്ഫോളിയോ വൈവിധ്യവല്ക്കരിക്കുന്നത് (Diversification) നഷ്ടസാധ്യത കുറയ്ക്കാന് സഹായിക്കും.
Read DhanamOnline in English
Subscribe to Dhanam Magazine
