യുപിഐ പ്ലാറ്റ്ഫോം വഴി ബാങ്കുകൾ നൽകുന്ന ഇൻസ്റ്റന്റ് വായ്പാ സൗകര്യമാണ് യുപിഐ ക്രെഡിറ്റ് ലൈൻ. ബാങ്കുകൾ തങ്ങളുടെ യോഗ്യരായ ഉപഭോക്താക്കൾക്ക് മുൻകൂട്ടി അനുവദിക്കുന്ന (Pre-approved) ഒരു വായ്പാ പരിധിയാണിത്. ബാങ്ക് അക്കൗണ്ടിൽ പണമില്ലാത്ത സമയത്തും ഉപയോക്താക്കള്ക്ക് യുപിഐ വഴി പണമടയ്ക്കാനും പിന്നീട് അത് തിരിച്ചടയ്ക്കാനും ഈ സംവിധാനം സഹായിക്കുന്നു.
സാധാരണ വ്യക്തിഗത വായ്പകളിൽ നിന്ന് വ്യത്യസ്തമായി, അനുവദിച്ച തുക മുഴുവനായി മുൻകൂറായി അക്കൗണ്ടിലേക്ക് ലഭിക്കില്ല. പകരം, ഉപഭോക്താവ് യുപിഐ വഴി പേയ്മെന്റ് നടത്തുമ്പോൾ മാത്രമേ നിശ്ചിത പരിധിയിൽ നിന്ന് പണം പിൻവലിക്കപ്പെടുന്നുള്ളൂ. വായ്പാദാതാവിന്റെ നിബന്ധനകൾക്കനുസൃതമായി പലിശരഹിത കാലയളവോ അല്ലെങ്കിൽ തിരിച്ചടവ് ഇഎംഐ (EMI) ആക്കി മാറ്റാനോ ഉള്ള സൗകര്യങ്ങൾ ഇതിൽ ലഭ്യമാണ്. റിസർവ് ബാങ്ക് (RBI) ഈ സേവനത്തെ മറ്റ് റീട്ടെയിൽ വായ്പകളെപ്പോലെ തന്നെയാണ് നിയന്ത്രിക്കുന്നത്. അതായത്, യുപിഐ ക്രെഡിറ്റ് ലൈനുകൾ മറ്റ് പേഴ്സണൽ ലോണുകൾക്ക് സമാനമായ റിസ്ക് മാനേജ്മെന്റ് രീതികളും ഗവേണൻസ് ഫ്രെയിംവർക്കും പിന്തുടരുന്നു.
ഉപഭോക്താവിന്റെ വരുമാനം, തിരിച്ചടവ് ശേഷി, നിലവിലുള്ള ബാധ്യതകൾ, മുൻകാല ക്രെഡിറ്റ് ഹിസ്റ്ററി എന്നിവ പരിശോധിച്ചാണ് ബാങ്കുകൾ ഈ സൗകര്യം അനുവദിക്കുന്നത്. ഇതൊരു ഔദ്യോഗിക വായ്പാ സൗകര്യമായതിനാൽ, ഓരോ ഇടപാടും തിരിച്ചടവ് രീതിയും ക്രെഡിറ്റ് ബ്യൂറോകളെ അറിയിക്കുന്നുണ്ട്. അതിനാൽ, കൃത്യസമയത്തുള്ള തിരിച്ചടവ് പുതിയ നിക്ഷേപകർക്ക് നല്ലൊരു ക്രെഡിറ്റ് ഹിസ്റ്ററി ഉണ്ടാക്കാൻ സഹായിക്കും. എന്നാൽ തിരിച്ചടവ് വൈകുന്നത് സ്കോറിനെ ദോഷകരമായി ബാധിക്കും.
ചെറുകിട ഇടപാടുകൾക്ക് ക്രെഡിറ്റ് കാർഡുകൾക്ക് പൂരകമായ ഒരു സംവിധാനമായാണ് ഇതിനെ സാമ്പത്തിക വിദഗ്ദ്ധർ വിലയിരുത്തുന്നത്. ഈ സൗകര്യം ഉപയോഗിക്കുന്നതിന് മുൻപ് പലിശ എപ്പോൾ മുതൽ കണക്കാക്കുന്നു എന്നും മറ്റ് ചാർജുകൾ ഉണ്ടോ എന്നും ഉപഭോക്താക്കൾ പരിശോധിക്കേണ്ടതാണ്. യുപിഐ ക്രെഡിറ്റ് ലൈൻ സാധാരണ വരുമാനത്തിന് പകരമായി കാണരുത് എന്നും തിരിച്ചടവ് ശേഷിക്കനുസരിച്ച് മാത്രമേ ഉപയോഗിക്കാവൂ എന്നും വിദഗ്ദ്ധർ നിർദേശിക്കുന്നു.
Read DhanamOnline in English
Subscribe to Dhanam Magazine
