നിലവിൽ ഉപയോഗിക്കാതെ കിടക്കുന്നതും ഉപേക്ഷിച്ചതോ മറന്നുപോയതോ ആയ യു.പി.ഐ (UPI) ഐഡികൾ ഉപയോക്താക്കളുടെ ബാങ്ക് അക്കൗണ്ടുകൾക്ക് വലിയ സുരക്ഷാ ഭീഷണിയുയർത്തുന്നതായി സാമ്പത്തിക വിദഗ്ദ്ധർ മുന്നറിയിപ്പ് നൽകുന്നു. ഡിജിറ്റൽ ഇടപാടുകൾ എളുപ്പമാക്കിയ സ്മാർട്ട്ഫോണുകളിലെ ഈ 'അദൃശ്യ ചതിക്കുഴികളെ' കൃത്യമായി തിരിച്ചറിഞ്ഞില്ലെങ്കിൽ, നിങ്ങൾ കഷ്ടപ്പെട്ട് സമ്പാദിച്ച പണം നിമിഷനേരം കൊണ്ട് നഷ്ടപ്പെട്ടേക്കാം. പുതിയ കാലഘട്ടത്തിലെ ഈ ഡിജിറ്റൽ കെണിയെക്കുറിച്ചും എങ്ങനെ ഇതിൽ നിന്നും സുരക്ഷിതമായിരിക്കാം എന്നും വിശദമായി നോക്കാം.
ഡിജിറ്റൽ പേയ്മെന്റുകൾ നടത്തുന്നതിനായി ഉപയോഗിച്ചിരുന്ന മൊബൈൽ ആപ്പുകൾ (TPAPs) അൺഇൻസ്റ്റാൾ (Uninstall) ചെയ്തതുകൊണ്ട് മാത്രം യു.പി.ഐ ഹാൻഡിലുകൾ റദ്ദാക്കപ്പെടുന്നില്ല. അതുകൊണ്ട് തന്നെ അതിൽ ഉണ്ടാക്കിയിട്ടുള്ള യു.പി.ഐ ഐ.ഡിയും ആക്ടീവ് സ്റ്റാറ്റസിൽ തുടരുന്നതായിരിക്കും. പിന്നീട് 12 മാസത്തോളം ഉപയോഗിക്കാതിരുന്നാൽ ഈ ഐ.ഡി നിഷ്ക്രിയമായി (ഡോർമന്റ് അല്ലെങ്കിൽ ഇനാക്ടീവ്) പോകും.
എന്നിരുന്നാലും ഇത്തരം ഡോർമന്റ് (Dormant) ഐ.ഡികൾ മൊബൈൽ ആപ്പുകളുടെ റെക്കോർഡുകളിൽ നിങ്ങളുടെ ഫോൺ നമ്പറുമായോ ബാങ്ക് അക്കൗണ്ടുമായോ ഇപ്പോഴും ബന്ധിപ്പിക്കപ്പെട്ട നിലയിലുണ്ടാകാം. തട്ടിപ്പുകാർക്ക് ഇവ ദുരുപയോഗം ചെയ്ത് വ്യാജ സന്ദേശങ്ങൾ അയക്കാനും പണം തട്ടിയെടുക്കാനും സാധിക്കും. അതിനാൽ സജീവമായ യു.പി.ഐ ഐഡികൾ കൃത്യമായി പരിശോധിച്ച്, ആവശ്യമില്ലാത്തവ നിർജ്ജീവമാക്കുക മാത്രമാണ് ഇതിനുള്ള ഏക പരിഹാരം.
യു.പി.ഐ ഐഡികൾ ബാങ്ക് അക്കൗണ്ടുകളേക്കാൾ ഉപരിയായി ഓരോ പേയ്മെന്റ് ആപ്പുകളിലാണ് നിർമ്മിക്കപ്പെടുന്നത്. അതിനാൽ നേരത്തെ ഉപയോഗിച്ചിട്ടുള്ള എല്ലാ ആപ്പുകളും പ്രത്യേകം പരിശോധിച്ച് നിഷ്ക്രിയമായി കിടക്കുന്ന യു.പി.ഐ ഐഡികൾ കണ്ടെത്തേണ്ടതുണ്ട്:
ഗൂഗിൾ പേ: പ്രൊഫൈൽ ചിത്രം തിരഞ്ഞെടുത്ത് 'Bank accounts' എന്നതിൽ ക്ലിക്ക് ചെയ്യുക. ലിങ്ക് ചെയ്തിരിക്കുന്ന ബാങ്ക് അക്കൗണ്ടിൽ ടാപ്പ് ചെയ്താൽ ആക്ടീവായിട്ടുള്ള എല്ലാ യു.പി.ഐ ഐഡികളും കാണാം.
ഫോൺപെ: പ്രൊഫൈൽ ചിത്രത്തിൽ ക്ലിക്ക് ചെയ്ത് 'My BHIM UPI ID' എന്ന സെക്ഷൻ പരിശോധിക്കുക.
പേടിഎം: ഹോം സ്ക്രീനിലെ 'BHIM UPI' സെക്ഷൻ വഴി യു.പി.ഐ ഐഡികൾ കണ്ടെത്താം.
ഭീം (BHIM): ഹോം പേജിലെ പ്രൊഫൈൽ പരിശോധിക്കുക.
നെറ്റ് ബാങ്കിംഗ് / ബാങ്ക് ആപ്പുകൾ: പ്രമുഖ ബാങ്കുകളുടെ ഔദ്യോഗിക മൊബൈൽ ആപ്പുകൾ വഴിയും നെറ്റ് ബാങ്കിംഗ് മുഖേനയും യു.പി.ഐ ആക്സസ് പരിശോധിക്കാനും നിയന്ത്രിക്കാനും സാധിക്കും.
ഉപയോഗശൂന്യമായ യു.പി.ഐ ഐഡികൾ കണ്ടെത്തിയാൽ, മൊബൈൽ ആപ്പ് ഡിലീറ്റ് ചെയ്യുന്നതിന് മുൻപായി ആപ്പിനുള്ളിൽ കയറി ആ ഐഡികൾ പൂർണമായും നിർജ്ജീവമാക്കേണ്ടതാണ് (Deactivate). ആപ്പുകളിൽ 'Active', 'Inactive', 'Pending' എന്നിങ്ങനെയുള്ള സ്റ്റാറ്റസ് ലേബലുകൾ പരിശോധിച്ച് ആവശ്യമില്ലാത്തവ ക്ലോസ് ചെയ്യുക.
നിലവിൽ ഉപയോഗിക്കുന്ന യു.പി.ഐ ഐഡികൾ സുരക്ഷിതമായി കാത്തുസൂക്ഷിക്കാൻ ശക്തമായ യു.പി.ഐ പിൻ (UPI PIN) നമ്പറുകൾ സജ്ജീകരിക്കുക. കൃത്യമായ ഇടവേളകളിൽ പിൻ നമ്പറുകൾ മാറ്റുക. എന്തെങ്കിലും സുരക്ഷാ വീഴ്ച സംശയിക്കുകയോ പിൻ നമ്പറുകൾ മറന്നുപോവുകയോ ചെയ്താൽ ഡെബിറ്റ് കാർഡ് വിവരങ്ങളോ ആധാർ വെരിഫിക്കേഷനോ ഉപയോഗിച്ച് 'Forgot UPI PIN' വഴി അവ പുനഃക്രമീകരിക്കാവുന്നതാണ്.
കൂടാതെ, മൊബൈൽ നമ്പർ മാറിയിട്ടുണ്ടെങ്കിൽ ബാങ്ക് അക്കൗണ്ടിലേക്ക് പുതിയ നമ്പർ ആദ്യം അപ്ഡേറ്റ് ചെയ്യേണ്ടതും നിർണായകമാണ്. കാരണം യു.പി.ഐ വെരിഫിക്കേഷനുകൾ പൂർണമായും ബാങ്കിൽ രജിസ്റ്റർ ചെയ്ത നമ്പറിനെ ആശ്രയിച്ചാണ് നിലകൊള്ളുന്നത്. ഫോൺ മാറ്റുമ്പോഴോ, ആപ്പുകൾ വീണ്ടും ഇൻസ്റ്റാൾ ചെയ്യുമ്പോഴോ കൃത്യമായ ഇടവേളകളിൽ യു.പി.ഐ ഐഡികൾ ഓഡിറ്റ് ചെയ്യുന്നത് സാമ്പത്തിക സുരക്ഷിതത്വം ഉറപ്പാക്കാൻ സഹായിക്കും.
Read DhanamOnline in English
Subscribe to Dhanam Magazine
