സംരംഭം വളര്ത്താം, പ്രധാന ബിസിനസില് നിന്ന് വ്യതിചലിക്കാതെ
ഇന്ന് പല വിജയകരമായ സംരംഭകരും നേരിടുന്ന സങ്കീര്ണമായ ഒരു പ്രശ്നമാണ് വളരാനുള്ള അമിതമായ അവസരങ്ങള്. ഒരു ബിസിനസ് വിജയകരമാകുമ്പോള്, അനുബന്ധ മേഖലകളിലേക്ക്-അതായത് ഇന്ഡസ്ട്രിയിലെ 'പുതിയ തിളങ്ങുന്ന വസ്തുക്കളിലേക്ക്'-തിരിയാനുള്ള പ്രലോഭനം തടയാന് ബുദ്ധിമുട്ടാണ്. കേരളത്തില് വിജയകരമായ ഒരു ആശുപത്രി/ക്ലിനിക്ക് ശൃംഖല നടത്തുന്ന എന്റെ ഒരു ക്ലയ്ന്റിനെ ഉദാഹരണമായി എടുക്കാം.
സമാന്തരമായി ഒരു ഫാര്മസി ശൃംഖലയോ, ഡയഗ്നോസ്റ്റിക് ലാബുകളോ തുടങ്ങണോ എന്ന് അവര് പലതവണ എന്നോട് ചോദിച്ചിട്ടുണ്ട്. ഇവ ആരോഗ്യസേവന രംഗത്തെ സ്വാഭാവികമായ വിപുലീകരണങ്ങളായി തോന്നാമെങ്കിലും, ഞാന് അവരെ ഇതില് നിന്ന് നിരുത്സാഹപ്പെടുത്തുകയാണ് ചെയ്തത്. ആശുപത്രികളും ക്ലിനിക്കുകളും നിര്മിക്കാനും നടത്തിക്കൊണ്ടുപോകാനും നിങ്ങള്ക്ക് ശേഷിയുണ്ടെന്ന് തെളിയിക്കപ്പെട്ടതാണെങ്കില് നിങ്ങളുടെ ശ്രദ്ധ 'നിങ്ങളുടെ പ്രധാന ബിസിനസ് വളര്ത്തുന്നതില്ത്തന്നെയായിരിക്കണം.'
വൈവിധ്യവല്ക്കരണത്തിന്റെ മറഞ്ഞിരിക്കുന്ന ചെലവ്
ഫാര്മസികള് മാത്രമായി തുടങ്ങുന്നതിലെ യുക്തി, കടലാസുകളില് ശരിയാണെന്ന് തോന്നാം. 'ഞങ്ങള് ഇതിനകം മരുന്നുകള് വാങ്ങുന്നുണ്ട്, നിയമങ്ങള് അറിയുകയും ചെയ്യാം; അപ്പോള് എന്തുകൊണ്ട് റീറ്റെയ്ല് വിപണി കൂടി പിടിച്ചെടുത്തു കൂടാ?' എന്നാല്, ഇത് ബിസിനസ് മോഡലുകളില് വന്ന അടിസ്ഥാനപരമായ മാറ്റത്തെ അവഗണിക്കുകയാണ് ചെയ്യുന്നത്.
ഒരു ആശുപത്രിയിലെ ഫാര്മസി എന്നത് വലിയൊരു ക്ലിനിക്കല് സംവിധാനത്തിന്റെ ഭാഗമാണ്; അവിടത്തെ രോഗികളുടെ ഒഴുക്ക് ആശുപത്രിയിലെ ഡോക്ടര്മാര് തന്നെ ഉറപ്പാക്കുന്നു. നേരെ മറിച്ച്, ഒരു സ്വതന്ത്ര ഫാര്മസിയെന്നത് ഒരു 'റീറ്റെയ്ല്' ബിസിനസാണ്. അതിന് മികച്ച സ്ഥലങ്ങളില് ഷോപ്പുകള് കണ്ടെത്താനും, സ്റ്റോക്ക് മാനേജ്മെന്റിനും വമ്പന് റീറ്റെയ്ല് ശൃംഖലകളോട് മത്സരിക്കാന് ശക്തമായ മാര്ക്കറ്റിങ്ങിനും പ്രത്യേക വൈദഗ്ധ്യം ആവശ്യമാണ്.
ഒരു ഹെല്ത്ത്കെയര് ഗ്രൂപ്പ് അവരുടെ മാനേജ്മെന്റ് ശ്രദ്ധയും മൂലധനവും ഇത്തരം സ്വതന്ത്ര സംരംഭങ്ങളിലേക്ക് തിരിച്ചുവിടുമ്പോള്, അടിസ്ഥാന സൗകര്യങ്ങള് അതിവേഗം വിപുലീകരിക്കുന്ന ചാരിറ്റബിള് ട്രസ്റ്റ് ആശുപത്രികള് നേരിടുന്ന അതേ കെണിയില് ഇവരും വീഴാനുള്ള സാധ്യതയുണ്ട്. അവര് വലിയ തോതിലുള്ള വായ്പകളും പലിശഭാരവും ഏറ്റെടുക്കുന്നു. ഇത് ബിസിനസിലെ ലാഭം ചോര്ത്തിക്കളയുന്നു. നിര്ണായകമായ മെഡിക്കല്ഉപകരണങ്ങള് നവീകരിക്കുന്നതിനും മാറ്റിസ്ഥാപിക്കുന്നതിനും വേണ്ടി ലാഭം ഉപയോഗിക്കുന്നതിന് പകരം, കാര്യക്ഷമത കുറഞ്ഞ ഈ പുതിയ ബിസിനസ് ശാഖയുടെ ചെലവുകള്ക്കായി പണം നഷ്ടപ്പെടുന്ന സ്ഥിതിവരുന്നു.
സംയോജിത ശക്തി
ഒരു ആശുപത്രി ശൃംഖലയുടെ യഥാര്ത്ഥ കരുത്ത് അതിന്റെ സംയോജിത സ്വഭാവത്തിലാണ്. ഒരു ആശുപത്രി എന്നത് വെറുമൊരു കെട്ടിടമല്ല; അത് കണ്സള്ട്ടേഷനുകള്, രോഗനിര്ണയം, ഫാര്മസി സേവനങ്ങള് എന്നിവ ഒത്തുചേര്ന്ന് പ്രവര്ത്തിക്കുന്ന ഒരു കേന്ദ്രമാണ്. ഈ പ്രധാന മോഡലില് ഉറച്ചുനില്ക്കുന്നത് മികച്ച തന്ത്രമാകാനുള്ള മൂന്ന് കാരണങ്ങള് നോക്കാം.
- സമന്വയവും കാര്യക്ഷമതയും (Synergy and Efficiency): ഒരു ആശുപത്രിയിലോ ക്ലിനിക്കിലോ ഫാര്മസിക്കും ലാബിനും 'ഉറപ്പായ' ഉപഭോക്താക്കളെ ലഭിക്കുന്നു. രോഗികളെ ഫാര്മസിയിലേക്ക് എത്തിക്കാന് പ്രത്യേക മാര്ക്കറ്റിങ് ബജറ്റ് ആവശ്യമില്ല. ചികിത്സക്കായി അവര് അവിടെ തന്നെയുണ്ട്. ഇത് നിങ്ങളുടെ ആസ്തികളുടെ പരമാവധി ഉപയോഗം ഉറപ്പാക്കുന്നു.
-ബ്രാന്ഡ് വ്യക്തത (Brand Cohesion): ക്ലിനിക്കല് മികവും രോഗീപരിചരണവുമാണ് നിങ്ങളുടെ പ്രധാന വൈദഗ്ധ്യം. നിങ്ങള് മറ്റൊരു ക്ലിനിക്കോ ആശുപത്രിയോ നിര്മിക്കുമ്പോള്, ഒരു സമ്പൂര്ണ ആരോഗ്യ സേവനദാതാവ് എന്ന നിലയിലുള്ള നിങ്ങളുടെ ബ്രാന്ഡിനെ നിങ്ങള് ശക്തിപ്പെടുത്തുകയാണ്. എന്നാല് സ്വതന്ത്ര റീറ്റെയ്ല് സ്റ്റോറുകള് തുടങ്ങുന്നത് നിങ്ങളുടെ പ്രൊഫഷണല് ഇമേജിനെ ബാധിക്കുകയും ശ്രദ്ധ തിരിക്കുകയും ചെയ്തേക്കാം.
- മൂല്യശൃംഖല പൂര്ണമായി പിടിച്ചെടുക്കല് (Capturing the Full Value Chain): ഓരോ തവണയും നിങ്ങള് ഒരു പുതിയ ക്ലിനിക്കോ ആശുപത്രിയോ നിര്മിക്കുമ്പോള്, സ്വാഭാവികമായും ഒരു പുതിയ ഫാര്മസിയും ലാബും കൂടി കെട്ടിപ്പടുക്കുകയാണ്. നിങ്ങളുടെ പ്രധാന ബിസിനസ് വളര്ത്തുന്നതിലൂടെ കടുത്ത മത്സരമുള്ള റീറ്റെയ്ല് വിപണിയിലെ തുച്ഛമായ ലാഭത്തിനായി പോരാടുന്നതിന് പകരം സുരക്ഷിതമായ ചുറ്റുപാടില് ഇത്തരം അനുബന്ധ സേവനങ്ങളെ സ്വാഭാവികമായി വികസിപ്പിക്കാന് നിങ്ങള്ക്ക് സാധിക്കുന്നു.
തന്ത്രപരമായ പുനര്നിക്ഷേപം കൊണ്ട് അമിതബാധ്യത
ആരോഗ്യ സംരക്ഷണ രംഗത്തെ ഒരു സ്ഥാപനത്തിന്റെ വിജയത്തിന്റെ താക്കോല് അടിസ്ഥാന സൗകര്യങ്ങളുടെ നവീകരണത്തിലും ഉപകരണങ്ങള് പരിഷ്ക്കരിക്കുന്നതിലുമാണ്. നിങ്ങള് നിങ്ങളുടെ പ്രധാന ബിസിനസായ ആശുപത്രികളിലും ക്ലിനിക്കുകളിലും ശ്രദ്ധ കേന്ദ്രീകരിക്കുമ്പോള്, നിങ്ങള്ക്ക് മികച്ച സാമ്പത്തിക നേട്ടം ലഭിക്കുന്നു. നിലവിലുള്ള സംവിധാനങ്ങള് മികവുറ്റതാക്കുന്നതിലൂടെ (ഉദാഹരണത്തിന് മെച്ചപ്പെട്ട ബുക്കിങ് സിസ്റ്റം വഴി രോഗികളുടെ എണ്ണം വര്ധിപ്പിക്കുക), എംആര്ഐ അല്ലെങ്കില് സിടി സ്കാനുകള് പോലുള്ള പുതിയ മെഡിക്കല് ഉപകരണങ്ങള് വാങ്ങാന് ആവശ്യമായ പണം പുറത്തുനിന്നുള്ള വായ്പകളില്ലാതെ തന്നെ കണ്ടെത്താനാകും.
അതേ മൂലധനം പത്ത് സ്വതന്ത്ര ഫാര്മസികളിലായി നിങ്ങള് ചിതറിച്ചാല്, വരുമാനം കുറഞ്ഞ ഒരു മേഖലയില് നിങ്ങള് വായ്പാ ബാധ്യത (Principal+Interest) വര്ധിപ്പിക്കുകയാണ് ചെയ്യുന്നത്. ഇത് ക്രമേണ സേവന നിരക്കുകള് കൂട്ടാന് നിങ്ങളെ നിര്ബന്ധിതരാക്കും. അങ്ങനെ നിങ്ങളെ മുന്നിലെത്തിച്ച മത്സരക്കരുത്ത് നിങ്ങള്ക്ക് നഷ്ടപ്പെടുകയും ചെയ്യും.
ഉപസംഹാരം
വളര്ച്ച അളക്കേണ്ടത് നിങ്ങള് നടത്തുന്ന ബിസിനസുകളുടെ വൈവിധ്യം കൊണ്ടല്ല, മറിച്ച് നിങ്ങളുടെ പ്രധാന ദൗത്യത്തിന്റെ കരുത്തും ആഴവും കൊണ്ടാണ്. ആശുപത്രി ഭരണത്തിന്റെ സങ്കീര്ണമായ ലോകം കൈകാര്യം ചെയ്യാന് നിങ്ങള്ക്ക് വൈദഗ്ധ്യമുണ്ടെങ്കില്, ഒരു റീറ്റെയ്ല് ഫാര്മസിസ്റ്റായി ഒതുങ്ങിപ്പോകരുത്. നിങ്ങളുടെ മൂലധനവും ഊര്ജവും കൂടുതല് ക്ലിനിക്കുകളും ആശുപത്രികളും നിര്മിക്കുന്നതിനായി വിനിയോഗിക്കുക. അതിലൂടെ നിങ്ങളുടെ കരുത്ത് വര്ധിപ്പിക്കാനും രോഗികള്ക്ക് മികച്ച സേവനം നല്കാനും സുസ്ഥിരമായ വളര്ച്ച ഉറപ്പാക്കാനും സാധിക്കും. ആരോഗ്യസംരക്ഷണ രംഗത്ത്, ഏറ്റവും വിജയകരമായ പാത എപ്പോഴും വിസ്തൃതിയുള്ളതാവണമെന്നില്ല, അത് ലക്ഷ്യബോധമുള്ളതായിരിക്കണം.
Read DhanamOnline in English
Subscribe to Dhanam Magazine
